Йирмея 32 - Мукъаддес Китап

Йирмея тарла сатын ала

¹ Цидкия онунджы йылы Ехудада падишалыкъ эткенде, Невукъаднеццар 18-инджи йылы падиша олгъанда, РАББИден Йирмеягъа хабер кельди.

² О заман Вавилон падишасынынъ ордусы Ерусалимни алкъада тута эди. Йирмея пейгъамбер исе Ехуда падишанынъ эвиндеки къаравуллар азбарында къапалы эди.

³ Ехуданынъ падишасы Цидкия оны анда къапаткъан эди. О, Йирмеядан бойле сорады: – Не ичюн пейгъамберлик этип, бойле дейсинъ: «РАББИ айта: Бу шеэрни мытлакъа Вавилон падишасынынъ къолуна береджегим, о онынъ сабысы оладжакъ.

⁴ Ехуданынъ падишасы Цидкия къасдийлилернинъ къолундан къуртулып оламайджакъ, о, мытлакъа Вавилон падишасынынъ къолуна бериледжек, онен юзьме-юзь лаф этеджек, козьлери де онынъ козьлерини кореджек.

⁵ Вавилоннынъ падишасы Цидкияны Вавилонгъа алып кетеджек, ве о, Мен онъа кельмегендже, анда къаладжакъ, – дей РАББИ. – Сиз къасдийлилернен дженк этсенъиз де, енъмейджексинъиз»?

⁶ Йирмея джевап берди: – РАББИ манъа деди:

⁷ Мына, Шаллум эмдженънинъ огълу Ханамел санъа: «Анатот шеэриндеки тарламны сатын ал. Сой-соплукъ акъкъынен оны сен сатын алмакъ керексинъ», – айтмагъа янынъа келе.

⁸ РАББИ айткъаны дайын, эмджемнинъ огълу Ханамел, къаравуллар азбарында яныма келип: «Биньямин топрагъындаки Анатот шеэринде ерлешкен тарламны сатын ал, – деди. – Оны сатын алмагъа ве онынъ сабысы олмагъа акъ сенинъдир. Оны сатын ал». О заман бу – РАББИнинъ сёзю олгъаныны анъладым

⁹ ве эмджемнинъ огълу Ханамелден Анатотта ерлешкен тарланы сатын алдым. Онъа он еди кумюш чекип бердим.

¹⁰ Буны кягъыткъа яздым да, печат къойдым. Шаатларны чагъырып, кумюшни теразеде чектим.

¹¹ Сонъ мен сатыш кягъытынынъ эки копиясыны: эм къанунгъа ве низамнамеге коре печат къоюлгъан копияны, эм ачыкъ къалгъан союны алдым да,

¹² Махсеянынъ торунына, Нериянынъ огълуна Барукъкъа бердим. Буны корьгенлернинъ арасында эмджемнинъ огълу Ханамел, сатыш кягъытында язгъан шаатлар ве къаравуллар азбарында отургъан бутюн ехудалылар эди.

¹³ Эписилернинъ козьлери огюнде мен Барукъкъа бойле буюрдым:

¹⁴ – Ордуларнынъ РАББИси, Исраильнинъ Алласы бойле дей: Бу языларны: эм печат къоюлгъан сатыш кягъытыны, эм ачыкъ копияны ал да, чокъ вакъыткъа бардакъкъа къой.

¹⁵ Ордуларнынъ РАББИси, Исраильнинъ Алласы, бойле дей: Бу мемлекетте эвлер, тарлалар ве юзюмликлер кене сатын алынаджакълар.

Йирмеянынъ дувасы

¹⁶ Сатыш кягъытыны Нериянынъ огълу Барукъкъа берип, мен РАББИге дува эттим:

¹⁷ РАББИ-ТААЛЯ! Сен буюк кучюнънен, къудретинънен коклерни ве ер юзюни яраттынъ! Сенинъ къолунъдан кельмейджек бир шей ёкъ!

¹⁸ Сен бинълер адамларгъа мерамет эйлейсинъ, бабаларнынъ къабаатлары ичюн балаларыны джезалайсынъ. Буюк ве кучьлю Алла! Сенинъ Адынъ – Ордуларнынъ РАББИсидир!

¹⁹ Ниетлери – буюк, ишлери – эсапсыз! Козьлеринъ инсан огъуллары туткъан бутюн ёлларына ачыкътыр. Эр кеске туткъан ёлуна ве эткен ишлерине коре бересинъ!

²⁰ Сен Мысыр топрагъында аляметлерни косьтердинъ, аджайип ишлерни яптынъ, бу куньге къадар эм Исраильде, эм халкълар арасында шуны япасынъ. Сен Озюнъе буюк Нам къазандынъ.

²¹ Аляметлерни косьтерип, аджайип ишлерни япып, кучьлю къолунънен ве къудретинънен, орталыкъта буюк къоркъу сачып, Исраильни Мысыр топрагъындан чыкъардынъ,

²² деделерине бермеге ант эткен бу топракъны, сют ве бал акъкъан мемлекетни оларгъа бердинъ.

²³ Олар келип, топракънынъ сабылары олдылар, амма Сенинъ сёзюнъни динълемедилер, Къанунынъа коре арекет этмедилер, Сен оларгъа буюргъан шейлерни беджермедилер, ве Сен бутюн бу беляларны башларына тюшюрдинъ.

²⁴ Бакъынъыз! Шеэрни алмакъ ичюн, диварлары янында топракъ обаларыны къурдылар; шеэр къылычтан, ачлыкътан ве ольдюриджи хасталыкътан чекише, онъа къаршы дженк эткен къасдийлилернинъ къолуна кече. Бутюн Сенинъ айткъанларынъ ерине келе, мына, Сен буны коресинъ!

²⁵ Сен де, РАББИ-ТААЛЯ, манъа: «Тарланы озюнъе кумюшке сатын ал да, шаатларны чагъыр», – дейсинъ, о вакъытта исе шеэр къасдийлилернинъ къолуна кече.

Раббининъ джевабы

²⁶ РАББИ Йирмеягъа джевап берди:

²⁷ – Мен – РАББИм, бутюн тири джанларнынъ Алласыдырым! Меним къолумдан кельмейджек шей бармы?

²⁸ Онынъ ичюн РАББИ бойле дей: Бакъынъыз, Мен мытлакъа бу шеэрни къасдийлилерге ве Вавилоннынъ падишасына Невукъаднеццаргъа береджегим, олар оны запт этеджеклер.

²⁹ Шеэрге къаршы дженк эткен къасдийлилер ичери киреджеклер, оны ве эвлерини якъаджакълар. Эвлерининъ дамларында Баалгъа къокъулы отларны якъа эдилер, ябанджы аллаларгъа ичимлик бахшышларыны кетире эдилер ве бойле этип, Мени ачувландырдылар.

³⁰ Яшлыкъ чагъындан берли Исраиль ве Ехуда огъуллары козюм огюнде тек яманлыкъ япа эдилер; къоллары япкъан ишлеринен Исраиль огъуллары Мени тек ачувландыра эдилер, – дей РАББИ.

³¹ – Къурулгъан кунюнден башлап бугуньгедже бу шеэр Мени ачувландыра ве гъазапландыра эди, шунынъ ичюн Мен ондан юзюмни чевиреджегим.

³² Исраиль огъуллары ве Ехуда огъуллары чокъ яманлыкъ яптылар, падишалары, башлыкълары, руханийлери, пейгъамберлери, ехудалылар ве Ерусалимде яшагъанлар Мени ачувландырдылар.

³³ Олар Манъа юзьлерини дегиль, аркъаларыны чевирдилер. Мен оларны огрете эдим, къайта-къайта оларны огрете эдим, олар Мени динълемей, огютлериме къулакъ асмай эдилер.

³⁴ Адымны ташыгъан Эвнинъ ичине олар тюрлю джиренч шейлерини къойдылар ве оны арамладылар.

³⁵ Бен-Хинном вадийинде Баалгъа ибадет тёпелерини къурдылар, Молекке къурбан оларакъ огъулларыны ве къызларыны атеште якъа эдилер. Мен исе буны буюрмадым, олар бу писликлерни япаджакъларыны ве ехудалыларны ёлдан ураджакъларыны тюшюнмедим биле.

³⁶ Сизлер шеэр акъкъында: «Къылычтан, ачлыкътан ве ольдюриджи хасталыкътан чекишип, шеэр Вавилоннынъ падишасына кече», – дейсинъиз. Энди РАББИ, Исраильнинъ Алласы, бойле айта:

³⁷ – Бакъынъыз, Мен оларны эписи мемлекетлерден, ачувнен, гъазабымнен, буюк хышымнен къувалагъан ерлерден топлайджагъым ве бу ерге къайтараджагъым, оларгъа къоркъусыз яшайыш береджегим.

³⁸ Олар Меним халкъым олурлар, Мен де оларнынъ Алласы оладжагъым.

³⁹ Оларгъа бир ёл ве бир юрек береджегим; олар омюрбилля Менден къоркъаджакълар, ве бойле этип, озьлери ве эвлятлары яхшылыкъ кореджеклер.

⁴⁰ Мен оларгъа эбедий васиет береджегим, оларгъа бир даа аркъамны чевирмейджегим, эр вакъыт эйилик япаджагъым, Менден ич айырылмасынлар деп, юреклерине къоркъу сачарым.

⁴¹ Джан-юректен оларгъа къуванаджагъым, чокъ эйилик этеджегим, оларны бу мемлекетте ерлештирип къавийлештиреджегим.

⁴² РАББИ бойле дей: – Бу халкъкъа буюк яманлыкъ алып кетирдим, Мен энди оларгъа айткъан эйиликни де япаджагъым.

⁴³ Сизлер: «Бу топракъ бакъымсыз, адамсыз, айвансыз олгъан сахрадыр, къасдийлилернинъ къолуна берильгендир», – дей эдинъиз, амма бу топракъта кене тарлалар сатын аладжакълар.

⁴⁴ Биньяминнинъ топрагъында, Ерусалимнинъ чевресинде, Ехуданынъ шеэрлеринде, дагълыкъ шеэрлеринде, Шефела шеэрлеринде ве Негев шеэрлеринде кумюш берип, тарларарны сатын аладжакълар, шаатларны чагъырып, сатыш кягъытларына печат къояджакълар. Мен оларны эсирликтен къайтараджагъым, – дей РАББИ.