Йирмея 27 - Мукъаддес Китап

Ехуда Вавилоннынъ падишасына хызмет этеджек

¹ Ёшиянынъ огълу Цидкия Ехудада падишалыкъ этип башлагъанда, РАББИден Йирмеягъа бойле хабер кельди:

² – РАББИ манъа бойле деди: Озюнъе тыршав ве боюндырыкъ яп ве бойнунъа кечир.

³ Сонъ Ерусалимге, Ехуда падишасы Цидкиягъа кельген эльчилер ярдымынен Эдомнынъ падишасына, Моавнынъ падишасына, Аммон огъулларынынъ падишасына, Тир шеэрининъ ве Сидон шеэрининъ падишаларына айны ойле сойларыны ёлла.

⁴ Озь падишаларына бойле айтмагъа эльчилерге буюр: Ордулар РАББИси, Исраильнинъ Алласы, эфендилеринъизге бойле дей:

⁵ «Мен ер юзюни, адамларны ве ер юзюндеки айванларны Озюмнинъ буюк къудретимнен, кучьлю къолумнен яраттым ве Озюм истеген адамнынъ къолуна бердим.

⁶ Шимди бутюн бу топракъларны къулума Вавилон падишасы Невукъаднеццаргъа берем, тарла айванларны биле, онъа хызмет этсинлер деп, берем.

⁷ Онынъ ве мемлекетининъ йыкъыладжакъ вакъты-саати кельмегендже, бутюн халкълар онъа, огълуна ве торунына хызмет этеджеклер. Онъа чокъ халкълар ве буюк падишалар хызмет этеджеклер.

⁸ Эгер насылдыр бир халкъ я да падишалыкъ Вавилон падишасына Невукъаднеццаргъа хызмет этмеге истемесе, бойнуны Вавилон падишасынынъ боюндырыгъына эгмесе, бу халкъны Мен къылычнен, ачлыкънен ве ольдюриджи хасталыкънен джезалайджагъым, – дей РАББИ. – Оларны падишанынъ къолунен бутюнлей ёкъ этеджегим.

⁹ Сизлерге: “Вавилон падишасына хызмет этмейджексинъиз”, – деген пейгъамберлеринъизни, ырымджыларынъызны, тюшлерни корьгенлеринъизни, аляметлерни бакъып келеджекни айткъанларынъызны ве этнеджилеринъизни динълеменъиз.

¹⁰ Олар сизлерге ялан пейгъамберлик этелер. Оларны динълесенъиз, сизлерни мемлекетлеринъизден узакълаштыраджагъым, къувалайджагъым ве гъайып этеджегим.

¹¹ Бойнуны Вавилон падишанынъ боюндырыгъына эгген ве онъа хызмет эткен халкъны исе Мен онынъ топрагъында къалдырырым. О халкъ озь топрагъыны ишлетип, анда яшайджакъ», – дей РАББИ.

¹² Эписи бу сёзлерни мен Ехуда падишасы Цидкиягъа айтып: – Бойнунъызны Вавилон падишасынынъ боюндырыгъына эгинъиз, онъа ве онынъ халкъына хызмет этинъиз ве сагъ къалынъыз, – къоштым.

¹³ – РАББИнинъ айткъанына коре, Вавилон падишасына хызмет этмеген эр бир халкъ къылычтан, ачлыкътан ве ольдюриджи хасталыкътан ёкъ оладжакъ. Санъа ве халкъынъа ойле ольмеге не керек?

¹⁴ Сизлерге: «Вавилон падишасына хызмет этмейджексинъиз», – деген пейгъамберлерининъ сёзлерине къулакъ асманъыз, олар сизге ялан пейгъамберлик этелер.

¹⁵ РАББИ: «Мен оларны ёлламадым, – дей. – Олар Меним Адымдан ялан пейгъамберлик этелер. Оларны эшитсенъиз, Мен сизни ве сизге пейгъамберлик эткен пейгъамберлеринъизни къуваларым, ве сизлер гъайып олурсынъыз».

¹⁶ Руханийлерге ве бутюн бу халкъкъа мен бойле дедим: – РАББИ бойле дей: Сизге пейгъамберлик этип: «Мына, тезден РАББИ Эвининъ савутлары Вавилондан арткъа къайтарыладжакъ», – деген пейгъамберлернинъ сёзлерине къулакъ асманъыз, олар сизге ялан пейгъамберлик этелер.

¹⁷ Оларны динълеменъиз, Вавилон падишасына хызмет этинъиз де, сагъ къалынъыз. Не керек бу шеэрни харап этмеге?

¹⁸ Олар пейгъамберлер олсалар, РАББИнинъ Адындан лаф этселер, Ордулар РАББИсине ялварсынлар да, РАББИнинъ Эвиндеки, Ехуда падишасынынъ эвиндеки ве Ерусалимдеки савутлар Вавилонгъа алып кетирильмесинлер.

^19-20 Бу шеэрде диреклер, «Денъиз» адландырылгъан бакъыр хавуз, савут аякълары ве башкъа шейлер даа къалдылар. Вавилон падишасы Невукъаднеццар Ехуданынъ падишасыны Ехоякимнинъ огълу Еконьяны ве Ехуданынъ ве Ерусалимнинъ эписи мырзаларыны Ерусалимден Вавилонгъа сюргюн эткенде, бу шейлерни алмады. Ордуларнынъ РАББИси бу шейлернинъ акъкъында хабер бере.

²¹ РАББИнинъ Эвинде, Ехуда падишасынынъ эвинде ве Ерусалимде къалгъан савутлар акъкъында Ордуларнынъ РАББИси, Исраильнинъ Алласы бойле дей:

²² «Оларны Вавилонгъа алып кетерлер, ве олар анда оладжакълар. Мен баргъанда исе, – дей РАББИ, – оларны андан аладжагъым ве бу ерге къайтараджагъым».