Галатиядакилерге 6 - Мукъаддес Китап

Бир-биринъизнинъ юклерини ташынъыз

¹ Агъа-къардашлар, эгер бир адамнынъ гуна япкъаны белли олса, сизлер, рухий олып, оны йымшакълыкънен тюзетинъиз ве, ёлдан урулмамакъ ичюн, озюнъизге сакът олунъыз.

² Бири-биринъизнинъ агъырлыкъларыны ташынъыз. Бойле япып, сиз Месихнинъ Къануныны беджерирсиз.

³ Эгер бир адам, ич бир шейге ярамайып, озюни буюк, деп сайса, о, озь-озюни алдата.

⁴ Эр ким озь ишини сынасын; о вакъытта о, озюни башкъаларынен къыясламайып, озь енъишлерине бакъып гъурурланып оладжакъ.

⁵ Эр ким озю озь юкюни ташымакъ керек.

⁶ Иманда огренген оны огреткен адамнен озюнинь эр бир яхшы шейинен пайлашсын.

⁷ Алданманъыз: Алланы алдатмазсынъыз. Адам не сачса, оны орар.

⁸ Озь беден истеклерини япкъан адам озь беденинден олюм алыр. Рухнынъ истеклерини япкъан адам исе Рухтан эбедий аятны алыр.

⁹ Яхшылыкъ япкъанда, рухтан тюшмейик. Эгер болдурып токътамасакъ, озь вакътында берекет орып алырмыз.

¹⁰ Шунынъ ичюн, даа вакътымыз олгъанда, эписине ве эр шейден эвель озюмизнинъ иман аркъадашларымызгъа яхшылыкъ япайыкъ.

Сонъки огютлер

¹¹ Бакъынъыз, сизлерге озь къолумнен насыл буюк арифлерни яздым!

¹² Озьлерини бу дюньяда яхшы тарафтан косьтермеге истегенлер сизлерни сюннет олмагъа меджбур этелер, оларнынъ бирден-бир макъсады исе – Месихнинъ хачы ичюн къувалавдан къачмакътыр.

¹³ Сюннетлилер озьлери биле Къанунны тутмайлар ве беджермейлер, амма, сизлернинъ беденлеринъизнен макътанмакъ ичюн, сизинъ сюннет этильгенинъизни истейлер.

¹⁴ Мен Раббимиз Иса Месихнинъ хачындан гъайры башкъа ич бир шейнен макътанмайым. Онынънен бу дюнья мен ичюн хачкъа мыхлангъан, мен де бу дюнья ичюн хачкъа мыхлангъаным.

¹⁵ Сюннетнинъ де, сюннетсизликнинъ де ич бир къыймети ёкъ, тек янъыдан яратылгъан инсан олмакъ керек.

¹⁶ Бу къаиденен яшагъанларнынъ эписине ве Алланынъ Исраилине тынчлыкъ-аманлыкъ ве мерамет олсун!

¹⁷ Шимдиден сонъ ич кимсе мени раатсызламасын, чюнки мен Иса ичюн алгъан яраларны озь тенимде алып юрем.

¹⁸ Агъа-къардашлар, Раббимиз Иса Месихнинъ эйилиги сизинъ рухунъызнен олсун. Амин.