Галатиядакилерге 5 - Мукъаддес Китап

Месих бизге азатлыкъ берди

¹ Биз азат олайыкъ деп, Месих бизни азат этти. Шунынъ ичюн къатты турунъыз ве кене къуллукъ боюндырыгъыны такъманъыз.

² Мен, Павел, сизлерге буны айтам: эгер сизлер сюннет олсанъыз, Месих сизлерге файда этмез.

³ Сюннет этильген эр бир адамгъа кене бильдирем: о, бутюн Къанунны беджермек керек.

⁴ Къанунны беджерювде акъланув къыдыргъанлар! Сиз Месихтен айырылдынъыз ве Алланынъ эйилигини алмадынъыз.

⁵ Биз Рухнынъ ярдымынен ве иманнен акъланаджагъымызны умют этип беклеймиз.

⁶ Иса Месихте не сюннетнинъ, не сюннетсизликнинъ файдасы ёкъ, тек севгиде озюни косьтерген иманнынъ файдасы бар.

⁷ Сизлер чапувны яхшы башладынъыз. Лякин акъикъаткъа итаат этмеге сизге ким ёл бермеди?

⁸ Ким сизлерни къандырды? Эбет, буны сизни чагъыргъан Алла япмады!

⁹ Азачыкъ мая бутюн хамырны маялы эте!

¹⁰ Раббиде эминим ки, сизлер бу акъта башкъаджа тюшюнмейджексинъиз. Амма сизни ёлдан шашыргъан, ким олса олсун, озь джезасыны аладжакъ.

¹¹ Агъа-къардашлар, эгер мен але даа сюннетнинъ тарафдары олсам, не ичюн мени къувалайлар? Ойле олса, хач себебинден къавгъа токътар эди.

¹² Сизлерни ёлдан шашыргъан адамлар озьлерининъ бутюн шейлерини кесип ташласалар, яхшы олур эди!

¹³ Агъа-къардашлар, сизлер азатлыкъкъа чагъырылгъан эдинъиз. Тек бу азатлыкъ беден истеклерини беджереджегине себеп олмасын, лякин бири-биринъизге севгинен хызмет этинъиз.

¹⁴ Къануннынъ бутюни бир эмирде бирлештириле: «Якъын адамны озюнъизни киби севинъиз».

¹⁵ Амма эгер сизлер бири-биринъизни тишлесенъиз ве ашасанъыз, сакът олунъыз, ёкъса сиз бири-биринъизни ёкъ этеджексинъиз!

Рухнынъ мейвасы ве беденнинъ ишлери

¹⁶ Мен шуны айтам: Рухнынъ истегинен яшанъыз, о вакъыт беденинъизнинъ яман истеклерини беджермезсиз.

¹⁷ Инсан бедени Рухкъа къаршы олгъан шейлерни, Рух исе инсан беденине къаршы олгъанны истей. Олар бири-бирине къаршы чыкъалар; шунынъ ичюн сизлер истемеген шейлеринъизни япасыз.

¹⁸ Амма эгер Рух сизни алып барса, сиз Къанун астында дегильсиз.

¹⁹ Беденнинъ ишлери беллидир, булар – ороспулыкъ, пислик, ахлякъсызлыкъ,

²⁰ путперестлик, этне, душманлыкъ, къавгъа, пахыллыкъ, гъазап, давалар, бозгъунлыкълар, фыркъаларгъа болюнювлер,

²¹ нефрет, ичкиджилик, намуссыз отурышлар ве шунъа ошагъан ишлер. Сизлерни эвельден тенбиелей эдим, кене эвельден айтам: бойле ишлерни япкъанлар Алланынъ Падишалыгъыны мирас этип алмайджакълар.

²² Рухнынъ мейвасы исе – севги, къуванч, тынчлыкъ-аманлыкъ, сабыр, мерамет, яхшылыкъ, ишанч,

²³ йымшакълыкъ ве озюни къолда тутув. Буларгъа къаршы ич бир къанун ёкъ.

²⁴ Месихнинъкилер озь беденини яман арзуларнен ве истеклернен берабер хачкъа мыхлап къойдылар.

²⁵ Эгер биз Рухнынъ истегинен яшасакъ, Рухнынъ истегинен арекет этейик.

²⁶ Бош шуретни къыдырмайыкъ, бири-биримизни ачувландырмайыкъ, бир-биримизни пахылламайыкъ.