Галатиядакилерге 4 - Мукъаддес Китап

¹ Шуны да айтам: мирасчы даа яш бала олгъанда, о, эписининъ эфендиси олса да, къулдан фаркъланмай,

² лякин бабасы бельгилеген вакъыткъадже о, незаретчилернинъ ве эв бакъыджыларнынъ астындадыр.

³ Бизлер де бала олгъанымызда, дюньянынъ рухий кучьлерине къул эдик.

⁴ Амма вакъты-саати кельгенде, Алла Озь Огълуны, къадындан догъулгъанны ве Къанунгъа бойсунгъанны, ёллады.

⁵ О, Къанунгъа къул олгъанларны сатын алып къуртараджакъ ве бизни озь огъуллары этеджек эди.

⁶ Сиз Алланынъ огъуллары олгъанынъыз себептен, Алла юреклеримизге Озь Огълунынъ Рухуны ёллады, ве бу Рух: «Баба, Бабачыгъым!» – деп чагъыра.

⁷ Шунынъ ичюн, сен энди къул дегильсинъ, амма огъулсынъ. Огъул олсанъ, Алла сени мирасчы да деп япты.

Павелнинъ галатиядакилерге олгъан къасевети

⁸ Кечмиште сизлер Алланы бильмей эдинъиз, лякин аллалар олмагъан путларнынъ къуллары ола эдинъиз.

⁹ Шимди исе, Алланы бильгенинъизде, даа догърусы, сизни Алла бильгенде, насыл этип, кене шу кучьсюз ве заваллы рухий кучьлерге къайтасынъыз? Янъыдан озьлеринъиз къуллукъкъа берильмеге истейсинъизми?

¹⁰ Сизлер насылдыр куньлерни, айларны, мевсимлерни ве йылларны тутасынъыз!

¹¹ Мен сизинъ ичюн къоркъам. Аджеба, мен сизлер ичюн о къадар чокъ бошуна чалыша эдимми?

¹² Дин къардашларым, сизлерге ялварам: сизлер киби олгъаным ичюн, мен киби олунъыз. Сизлер манъа ич бир яманлыкъ япмадынъыз.

¹³ Сиз билесиз ки, мен сизлерге Къуванчлы Хаберни биринджи сефер бильдиргенимде, мен озюм хаста эдим.

¹⁴ Беден хасталыгъым сизлерге бир сынав олса да, сиз менден игренмединъиз, менден вазгечмединъиз, амма мени Алланынъ мелегини киби, Иса Месихни киби, къабул эттинъиз.

¹⁵ Сизинъ о вакъыттаки бахтынъыз къаерде? Озюм сизлерге шаатым: эгер мумкюн олса эди, о вакъыт сиз озь козьлеринъизни чекип чыкъарыр ве манъа берер эдинъиз!

¹⁶ Энди мен сизлерге акъикъатны айткъанымда, душманынъыз олдыммы?

¹⁷ Бирилери сизлер ичюн пек къасеветленелер. Амма шу яхшы дегиль. Олар сизлерни бизден айырмагъа ве сизлернинъ олар ичюн къасеветленгенини истейлер.

¹⁸ Эр вакъыт гузель ниетнен къасеветленмек яхшыдыр, лякин бу къасевет эр вакъыт, мен сизде олмагъанда да олсун.

¹⁹ Балаларым, Месих сизлерде пекитильмегендже, сизлерни кене догъураяткъаным киби, къыйналам.

²⁰ Сизни пек къасевет эткеним ичюн, шимди янынъызда олмагъа ве башкъаджа лаф этмеге истер эдим.

Хагъар ве Саре

²¹ Сизлер, Къанун астында олмагъа истегенлер, манъа айтынъыз: сиз Къанунны анъламайсызмы?

²² Ибраимнинъ эки огълу олгъан, бири – къул къадындан, башкъасы – азат, озь апайындан эди, деп язылгъан.

²³ Къул къадыннынъ огълу башкъа балалар киби догъды, азат къадыннынъ огълу исе Алланынъ вадесине коре догъды.

²⁴ Бунда гизли мана бар. Эки къадын – эки васиеттир. Биринджиси Синай дагъындан кельди ве балаларны къуллукъ ичюн догъура. Бу васиет – Хагъардыр.

²⁵ Хагъар – Арабистандаки Синай дагъыдыр, о, шимдики Ерусалимге тенъдир, чюнки Ерусалим ве онынъ балалары шимди къуллукътадыр.

²⁶ Тёпедеки Ерусалим исе азат, о, бизим анамыздыр,

²⁷ чюнки бойле язылгъан: «Эй, догъып оламагъан, баласыз къадын, къуван! Багъыр, къуванчнен къычыр, эй, догъып азап чекмеген! Къысыр къадыннынъ балалары акъайы олгъан къадыннынъ балаларындан чокътыр!»

²⁸ Сиз исе, агъа-къардашлар, Исхакъ киби, ваде балаларысынъыз.

²⁹ О вакъытларда башкъалары киби догъулгъан огъул Рухнен догъулгъанны къувалай эди. Шимди де ойле ола.

³⁰ Амма Язы не айта? «Къул апайны огълунен берабер айдап йибер». Къул апайнынъ огълу азат къадыннынъ огълунен берабер мирасчы олмаз.

³¹ Шунынънен, агъа-къардашлар, биз къул къадыннынъ балалары дегиль, азат къадыннынъ балаларымыз.