Галатиядакилерге 1 - Мукъаддес Китап

Селямлашув

¹ Павел эльчи (меним эльчилигим не инсанлардан, не бирде-бир инсаннынъ ярдымынен кельди, мени Иса Месих ве Оны олюлерден тирильткен Алла Бабамыз эльчи яптылар)

² ве меннен берабер олгъан бутюн дин къардашларым – Галатиядаки иманлылар джемиетлерине:

³ Алла Бабамыз ве Рабби Иса Месих сизге эйилик ве тынчлыкъ-аманлыкъ берсин!

⁴ Иса Месих, Алланынъ ве Бабамызнынъ истегенине коре, бизни шимдики яман замандан къуртарайым деп, Озюни бизим гуналарымыз ичюн берди.

⁵ Аллагъа эр заман шан-шурет олсун! Амин.

Тек бир Къуванчлы Хабер бар

⁶ Мен шашам, сизлер не къадар тез сизни Месихнинъ эйилигинен чагъыргъан Алладан «башкъа бир Къуванчлы Хаберге» чевирильдинъиз!

⁷ Аслы башкъасы ёкъ. Тек базы адамлар сизни ёлдан уралар ве Месихнинъ Къуванчлы Хаберини бозмагъа истейлер.

⁸ Сизге берильген Къуванчлы Хаберимизден башкъасыны биримиз я да коктен бир мелек кетирсе, онъа лянет олсун!

⁹ Эвельден айткъанларымызгъа коре, шимди кене айтам: кимдир сизлер къабул эткен Къуванчлы Хаберге къаршы олгъан хаберни кетирсе, онъа лянет олсун!

¹⁰ Шимди мен макътавны адамлардан къыдыраммы, я Алладанмы? Мен адамларнынъ разылыгъыны къазанмагъа тырышаммы? Эгер мен але даа адамларнынъ разылыгъыны къазанмагъа тырышсам, Месихнинъ къулу олмаз эдим!

Павелнинъ эльчи олувы

¹¹ Дин къардашларым, сизлерге айтам: мен бильдирген Къуванчлы Хабер – инсан тюшюнип тапкъан хабер дегиль.

¹² Мен оны инсандан къабул этмедим ве ич кимседен огренмедим, оны манъа Иса Месих ачты.

¹³ Меним еудий дининде кечкен эвельки аятым акъкъында эшиттинъиз: мен Алланынъ иманлылар джемиетини къарардан зияде къувалай эдим, оны ёкъ этмеге тырыша эдим.

¹⁴ Еудий динини туткъанымда, чокъ яшдашларыма коре мен биринджи эдим, баба-деденинъ урф-адетлерини гъайретнен тута эдим.

¹⁵ Амма мен даа анамнынъ къурсагъында олгъанымда, Алла мени сайлап алды ве Озь эйилигинен мени чагъырды.

¹⁶ Сонъ Онынъ Огълу акъкъындаки Къуванчлы Хаберни халкъларгъа бильдирейим деп, Алла Озь Огълуны меним ярдымымнен ачмагъа истеди. О вакъытта мен ич бир адамларнен акъыл танышмадым,

¹⁷ озюмден эвель эльчи олгъанларнен корюшмек ичюн, Ерусалимге бармадым, амма Арабистангъа кеттим, сонъ кене Дамасккъа къайттым.

¹⁸ Учь йылдан сонъ, Кифанен корюшмек ичюн, Ерусалимге бардым ве онынъ янында он беш кунь олдым.

¹⁹ Башкъа эльчилерден мен тек Якъупны, Раббимиз Исанынъ къардашыны, корьдим.

²⁰ Алланынъ огюнде ант этем: мен сизлерге язгъанларым ялан дегиль.

²¹ Ондан сонъ Сурие ве Киликия виляетлерине бардым.

²² Еудиедеки иманлылар джемиетлери мени бетимден бильмей эдилер,

²³ олар тек: «Бир вакъытлары о, бизни къувалай эди, шимди исе о, озю ёкъ этмеге истеген иманны даркъата», – дегенини эшитип,

²⁴ мен ичюн Алланы шуретледилер.