Филиплердекилерге 4 - Мукъаддес Китап

Павелнинъ огютлери

¹ Шунынънен, мен севген ве корьмеге истеген агъа-къардашларым, къуванчым ве таджым! Раббинен бирликте олып, къатты турунъыз, эй, севимлилерим!

² Эводиягъа ялварам, Синтихиягъа да ялварам: Раббиде олып, муаббетликте яшанъыз.

³ Эбет, ишанчлы ёлдашым, санъа да ялварам, о къадынларгъа ярдым эт. Олар меннен, ве Клементнен, ве меннен берабер башкъа чалышкъанларнен Къуванчлы Хаберни даркъатмакъ ичюн арекет этелер. Оларнынъ адлары яшайыш китабында язылгъандыр.

⁴ Раббиде олып, эр вакъыт къуванынъыз! Даа айтам: къуванынъыз!

⁵ Сизинъ алчакъгонъюллигинъиз эписине белли олсун. Рабби якъын.

⁶ Ич бир шейге къасевет этменъиз, амма эр вакъыт дува окъуп ве ялварып, эр бир истегинъизни Алланынъ алдында миннетдарлыкънен ачынъыз.

⁷ О вакъыт сизинъ юреклеринъизни ве фикирлеринъизни адам акълына сыгъмагъан, Алла берген тынчлыкъ-аманлыкъ Иса Месихте сакълайджакъ.

⁸ Сонъунда, агъа-къардашлар, эр бир акъикъий, намуслы, догъру, темиз, гузель, шуретли, мукеммель ве макътавгъа ляйыкъ шейлер акъкъында тюшюнинъиз.

⁹ Сизлер менден нени огренип къабул эткен олсанъыз, нени эшитип, корьген олсанъыз, шуны япынъыз. О вакъыт сизлернен тынчлыкъ-аманлыкъ берген Алла оладжакъ.

Бахшышлар ичюн миннетдарлыкъ

¹⁰ Мен Раббиде пек къувандым, чюнки сизлер кене мени къайгъыра башладынъыз. Сиз эвель де къайгъыра эдинъиз, амма буны косьтермеге фырсат ёкъ эди.

¹¹ Буларны мухтадж олгъаным ичюн айтмайым. Мен эр бир алда къуванмагъа огрендим.

¹² Ёкъсуллыкъта да, боллукъта да яшамагъа огрендим. Эм токъ, эм ач олып, боллукъта ве мухтаджлыкъта, эр бир алда яшамакънынъ сырларыны огрендим.

¹³ Манъа кучь берген Иса Месихнинъ ярдымынен эр шейни япып олам.

¹⁴ Эр алда, сизлер меним къасеветиме къошулып, яхшы иш яптынъыз.

¹⁵ Сиз билесиз, эй, Филиплер шеэринде яшагъанлар, мен Македониядан чыкъып, Къуванчлы Хаберни биринджи кере даркъатып башлагъанымда, сизлерден башкъа иманлыларнынъ джемиетлеринден ич бириси манъа бир шей бермеди ве менден бир шей алмады.

¹⁶ Тессалонике шеэринде олгъанымда, сизлер бир-эки кере манъа керекли ярдымны ёлладынъыз.

¹⁷ Мен сизден бахшыш истемейим, сизинъ эйилигинъиз ичюн мукяфат алгъанынъызны истейим.

¹⁸ Менде эр шей бар, боллукъта биле яшайым. Сизлер ёллагъан шейлерни Эпафродиттен алдым, меним эр бир шейим бар. Бу шейлер – гузель къокъудыр, къабул этильген ве Алланы разы эткен къурбандыр.

¹⁹ Меним Аллам сизге керек олгъан шейлерни Иса Месих аркъалы, Озюнинъ улу байлыгъындан берсин!

²⁰ Аллагъа ве Бабамызгъа асырлар бою шуретлер олсун! Амин.

Селямлар

²¹ Иса Месихте олгъан азизлернинъ эписине селям этинъиз. Сизлерге меннен берабер олгъан агъа-къардашлар селям ёллайлар.

²² Алланынъ бутюн азизлери ве айрыджа императорнынъ сарайында хызмет эткенлер селям ёллайлар.

²³ Рабби Иса Месихнинъ эйилиги сизинъ рухунъызнен олсун!