Филимонгъа 1 - Мукъаддес Китап

Селямлашув

¹ Павел (Иса Месихнинъ мабюси) ве дин къардаш Тимотей – севимли ишдешимиз Филимонгъа,

² эм де къызкъардашымыз Апфиягъа, бизнен берабер курешкен аркъадашымыз Архиппке ве эвинъдеки иманлылар джемиетине:

³ Алла Бабамыз ве Рабби Иса Месих сизге эйилик ве тынчлыкъ-аманлыкъ берсин!

Филимоннынъ севгиси ве садыкълыгъы

⁴ Сен ичюн дува эткенимде, эр вакъыт Аллама шукюр этем,

⁵ чюнки Рабби Исагъа олгъан иманынъ ве эписи азизлерге олгъан севгинъ акъкъында эшитип турам.

⁶ Бизим сеннен берабер бир олгъан иманымыз Месих бизге берген эр бир эйиликни санъа анъламагъа ярдым этсин.

⁷ Сенинъ севгинъ манъа буюк къуванч берди ве гонълюмни алды, чюнки сен, къардашым, азизлерни юреклендирдинъ.

Онисим ичюн риджа

⁸ Шунынъ ичюн, керек шейни япмагъа мен санъа Месихнинъ Адынен ачыкъ-айдын эмир этип олур эдим,

⁹ лякин севгинен ялварам. Мен, Иса Месихнинъ эльчиси Павел, энди Онынъ мабюси,

¹⁰ санъа огълум Онисим ичюн ялварам. Зынджырларда олгъанымда, мен онынъ бабасы киби олдым.

¹¹ Бир вакъытта о, санъа файдасыз эди, энди исе санъа да, манъа да файдалыдыр. Оны санъа къайтарып ёллайым.

¹² Мен оны пек севем.

¹³ Онисим манъа сенинъ еринъе хызмет этсин деп, мен Къуванчлы Хабер ичюн зынджырларда олгъан вакъытта оны янымда алып къалмагъа истер эдим.

¹⁴ Амма сенден разылыкъ алмайып, ич бир шей япмагъа истемедим. Сен япаджакъ эйилигинъ меджбурий дегиль, гонъюлли олгъаныны истедим.

¹⁵ Бельки Онисим шимди сенинъ янынъда эбедиен олсун деп, о сенден вакътынджа айырылгъандыр.

¹⁶ Лякин энди о, къул киби дегиль, къулдан юкъары, севимли дин къардаш оларакъ сеннен берабер оладжакъ. О меним севимли дин къардашым, даа зияде о сенинъ де севимли дин къардашынъ, эм адам киби, эм Раббиге инангъан къардаш киби.

¹⁷ Шунынъ ичюн, эгер сен мени аркъадашынъ сайсанъ, Онисимни мени киби къабул эт.

¹⁸ Эгер исе о санъа бир шейде яманлыкъ япкъан олса я да санъа борджлу олса, буны меним эсабыма юкле.

¹⁹ Мен, Павел, буны озь къолумнен язам: мен тёлерим. Лякин сен де озюнъни манъа борджлу олгъанынъны акълынъа кетирмеге керекмей.

²⁰ Эбет, къардашым, Рабби ичюн сенден бир файдаланайым! Месих ичюн юрегимни къувандыр!

²¹ Сен меним сёзлериме къулакъ асаджагъынъа ишанып, яздым. Айткъанларымдан зияде япаджагъынъны да билем.

²² Бундан гъайры, манъа мусафир олып къалмакъ ичюн бир ер азырла, чюнки дуваларынъызгъа коре кене санъа кельмеге манъа имкян багъышланаджагъына умют этем.

Селямлар

²³ Эпафрас санъа селям эте. (О Иса Месих ичюн меннен берабер тюрьмеде ята.)

²⁴ Ишдешлерим Марк, Аристарх, Демас, Лукадан да селям.

²⁵ Рабби Иса Месихнинъ эйилиги сизинъ рухунъызнен олсун!