Еудийлерге 5 - Мукъаддес Китап

¹ Эр бир баш руханий адамларнынъ арасындан сайланып алына, адамларнынъ адындан Аллагъа хызмет эте, гуналар ичюн Аллагъа бахшышлар ве къурбанларны кетире.

² Бильмеген, ёлдан урулгъан адамларгъа о мераметнен бакъып ола, чюнки озю де гуналы адамдыр.

³ Шу себептен халкънынъ гуналары ичюн киби, озь гуналары ичюн де къурбанны кетирмек керек.

⁴ Ич кимсе бу урьметли ишни озь истегинен аламай. Адамны чагъырмакъ ве бу ишни онъа, Харунгъа киби, бермек тек Алла мумкюн.

⁵ Месих де баш руханийнинъ шуретли хызметини Озю алмады, амма: «Сен Меним Огълумсынъ. Бугунь Мен санъа Баба олдым», – айтып, Исагъа бу хызметни Алла берди.

⁶ Башкъа бир ерде Алла: «Сен, Мелкиседек киби, эбедий руханий оладжакъсынъ», – деди.

⁷ Ер юзюнде яшагъан куньлеринде Месих пек багъырып ве козьяш тёкип, Оны олюмден къуртармагъа кучю олгъан Аллагъа ялварды ве дува окъуды. Иса юваш ве иманлы олгъаны ичюн, Алла Онынъ дуваларыны эшите эди.

⁸ Лякин Алланынъ Огълу олса да, Иса азаплардан кечип, Алланы динълемеге огренди

^9-10 ве эр тарафтан къусурсыз олды. Алла Исаны, Мелкиседекни киби, баш руханий этип къойды ве Исагъа Оны динълеген эр кеске эбедий къуртулышны багъышламагъа имкян берди.

Ёлдан урулманъыз

¹¹ Бу акъта айтаджакъ лафымыз чокъ, амма сизге анълатмагъа агъыр, чюнки сиз ярамай анълайсынъыз.

¹² Бу вакъыткъадже сизлер оджа олмакъ керек эдинъиз, лякин сизлерге кене Алла Сёзюнинъ башлангъыч эсасларыны огретмек керек. Сизге агъыр аш дегиль, сют керек.

¹³ Тек сютни иче бильген адам – уфакъ баладыр. О, догърулыкъ не олгъаныны бильмей.

¹⁴ Агъыр аш исе буюк адамларгъа, яхшылыкънен яманлыкъны айырмагъа теджрибелеринден огренген адамларгъа яраша.