Еудийлерге 4 - Мукъаддес Китап

¹ Шунынъ ичюн мукъайт олунъыз, Алланынъ раатлыкъ ерине кирмеге имкян даа олгъанда, сизлерден ич бир адам кеч къалмасын.

² Бизлер, олар киби, бу яхшы хаберни эшиттик, амма олар эшиткен сёзлерни иманнен къабул этмегенлери ичюн, эшиткенлерининъ файдасы ёкъ эди.

³ Лякин эгер биз инансакъ, раатлыкъ ерине кирермиз. Инанмагъанлар акъкъында исе Алла бойле деген: «Мен гъазапланып, ант эттим: “Олар мытлакъа Меним раатлыкъ ериме кирмейджеклер”». Дюнья яратылгъандан берли Алла бутюн ишлерини битирди.

⁴ Язынынъ бир еринде единджи кунь акъкъында айтылгъан ки, Алла единджи куню Озюнинъ бутюн ишлеринден раатланды.

⁵ Амма кене, бойле айтылгъан: «Олар Меним раатлыкъ ериме кирмейджеклер».

⁶ Демек, даа базылары кирмек мумкюнлер. Эвельден яхшы хаберни эшиткен адамлар имансызлыгъы ичюн раатлыкъ ерине кирмеди.

⁷ Шунынъ ичюн чокъ вакъыттан сонъ Алла башкъа бир кунни, демек, «бугуньки кунни» айырды ве, юкъарыда айтылгъаны киби, Давутнен бойле деди: «Бугунь Алланынъ сесини эшитсенъиз, юреклеринъизни таш этменъиз!»

⁸ Эгер Ехошуа Исраиль огъулларыны раатлыкъ ерине кирсеткен олса, бундан сонъ Алла башкъа бир кунь акъкъында айтмаз эди.

⁹ Демек, Алланынъ халкъы ичюн даа раатлыкъ вакъты бар.

¹⁰ Онынъ раатлыкъ ерине кирген адам, Алла Озь ишлеринден насыл раатлангъан олса, озь ишлеринден бойле де раатланаджакъ.

¹¹ Бойлеликнен, раатлыкъ ерине кирмеге тырышайыкъ, ве ич кимсе, олар киби, имансызлыкъкъа огърамасын.

¹² Алланынъ Сёзю тири ве къудретли, эр тюрлю эки тарафлы кескин къылычтан кескиндир. О, ичине, джаннен рух айырылгъан ерге, бугъумларнен кемиклери олгъан ерге сокъулып кире ве юреклернинъ тюшюнджелерини эм ниетлерини сынап бакъа.

¹³ Ич бир яратылгъан шей Алланынъ козьлеринден сакъланмаз, Онынъ козю огюнде эр шей ачыкъ ве чыплакътыр. Ве биз Онъа джевап береджекмиз.

Иса – буюк баш руханий

¹⁴ Коклерден Аллагъа кечип кеткен Иса, Алланынъ Огълу, бизим буюк баш руханийимиз олгъаны ичюн, иманымызны къатты тутайыкъ.

¹⁵ Бизим баш руханийимиз къуветсизлигимизни анълай. О, бизлер киби, эр тарафтан сыналгъан эди, амма бизге бакъкъанда, ич бир гуна япмады.

¹⁶ Шунынъ ичюн, мераметли Алланынъ тахтына джесарет иле якъынлашайыкъ ве вакътында ярдым ве мерамет тапайыкъ.