Еудийлерге 3 - Мукъаддес Китап

Месих Мусадан юксек

¹ Шунынъ ичюн, азиз дин къардашларым, коклерден чагъырылгъан адамлар! Алланынъ Эльчисини, биз инангъан баш руханий Исаны тюшюнинъиз!

² Муса Алланынъ бутюн эвинде ишанчлы олгъаны киби, Эльчи де Оны ёллагъан Аллагъа ишанчлыдыр.

³ Эвден эвни къургъан къуруджы урьметли олгъаны киби, Иса Мусадан чокъ шуретке ляйыкътыр.

⁴ Эр бир эвнинъ къуруджысы бар, эр шейнинъ яратыджысы исе – Алла.

⁵ Муса, хызметчи олып, Алланынъ бутюн эвинде ишанчлы эди ве келеджек шейлер акъкъында хабер эте эди.

⁶ Месих исе, Огъул олып, Алланынъ Эвинде башлыкъ эте. Онынъ Эви исе – бизмиз. Лякин бизге ишанчымызны ве биз макътангъан умютимизни сонъунадже къатты тутмакъ керек.

Алланынъ халкъы ичюн раатлыкъ

⁷ Мына, Мукъаддес Рух айткъаны киби: – Бугунь Алланынъ сесини эшитсенъиз,

⁸ юреклеринъизни таш этменъиз! Манъа къаршы чыкъкъан вакътында киби, сахрада сынав заманында киби, олманъыз.

⁹ О ерде бабаларынъыз Мени сынавдан кечирдилер ве Мени сынап, къыркъ йыл ичинде ишлеримни корьдилер.

¹⁰ Шунынъ ичюн бу несильге ачувландым ве дедим: «Бу халкънынъ юреклери эр вакъыт адаша, олар Меним ёлларымны огренмедилер».

¹¹ Шунынъ ичюн Мен гъазапланып, ант эттим: «Олар мытлакъа Меним раатлыкъ ериме кирмейджеклер».

¹² Эй, дин къардашларым, мукъайт олунъыз, ич биринъизде яман ве имансыз бир юрек олмасын, Тири Алладан вазгечменъиз.

¹³ Ич кимсе гунагъа алданмасын, юрегини таш киби этмесин деп, «бугунь» демеге даа мумкюн олгъанда, бири-биринъизге эр кунь акъыл огретинъиз.

¹⁴ Биз Месихнинъ аркъадашлары олдыкъ ве, эгер баштаки ишанчымызны сонъунадже сакъласакъ, ойле де къалырмыз.

¹⁵ Айтылгъанына коре, бугунь Алланынъ сесини эшитсенъиз, юреклеринъизни таш этменъиз! Онъа къаршы чыкъкъан вакъытта олгъанынъыз киби, олманъыз!

¹⁶ Алланынъ сесини эшиткен, лякин Онъа къаршы чыкъкъан адамлар ким эди? Муса Мысырдан чыкъаргъанларнынъ эписи!

¹⁷ Алла къыркъ йыл ичинде кимге ачувлана эди? Гуна япкъан адамларгъа! Шунынъ ичюн оларнынъ олю беденлери сахрада къалды.

¹⁸ Алла: «Олар Меним раатлыкъ ериме кирмейджеклер», – деп, кимлер акъкъында ант этти? Оны динълемеген адамлар акъкъындадыр!

¹⁹ Коремиз ки, олар имансыз олгъаны ичюн, раатлыкъ ерине кирип оламадылар.