Эстер 9 - Мукъаддес Китап

Ехудалыларнынъ акътыманы

¹ 12-нджи айнынъ, яни Адар айынынъ 13-юнджи кунюнде падишанынъ буюргъаны ве къануны беджерильмеге вакъты-саати кельди. О куню ехудалыларнынъ душманлары оларны бойсундырмакъ умютинде эдилер, амма аксине чыкъып, ехудалылар душманларыны бойсундырдылар.

² Ехудалылар Ахашверош падишанынъ бутюн виляетлериндеки шеэрлерде топландылар ве оларгъа яманлыкъ япмагъа истегенлерни ольдюрдилер. Эписи халкълар ехудалылардан пек къоркъкъанлары ичюн, оларгъа къаршы кимсе чыкъмады.

³ Виляет башлыкъларынынъ эписи, акимлер, башкъа башлыкълар ве падиша ишлерини беджергенлер Мордекъайдан пек къоркътылар ве ехудалыларгъа къол туттылар.

⁴ Падишанынъ эвинде Мордекъай буюк адам олды, онынъ намы бутюн виляетлерде белли эди. Кунь-куньден Мордекъайнынъ кучю арта эди.

⁵ Ехудалылар бутюн душманларыны къылычнен урып ольдюрдилер ве ёкъ эттилер. Озь душманларынен истегенлерини яптылар.

⁶ Шушан къалесинде ехудалылар 500 адамны ольдюрип ёкъ эттилер.

⁷ Паршандата, Далфон, Аспатаны,

⁸ Пората, Адалья, Аридатаны,

⁹ Пармашта, Арисай, Аридай ве Вайзатаны

¹⁰ – ехудалыларнынъ душманынынъ, Хаммедатанынъ огълу Хаманнынъ он огълуны ольдюрдилер. Мал-мульклерине исе къолларыны узатмадылар.

¹¹ Шушан къалесинде ольдюрильгенлернинъ сайысы шу куню падишагъа хабер этильди.

¹² Падиша Эстер къыраличеге: – Шушан къалесинде ехудалылар 500 адамны ве Хаманнынъ он огълуны ольдюрип ёкъ эттилер. Падишалыкънынъ башкъа виляетлеринде олар нелер яптылар? Юрегинъ не истей? Оны беджереджегим! Башкъа истеклеринъ насыл? Олар да япыладжакълар, – деди.

¹³ – Эгер падишанынъ истеги олса, Шушандаки ехудалыларгъа ярын да бугуньки къанунгъа коре япмагъа разылыкъ берсинлер. Хаманнынъ он огълуны исе дирекке ассынлар, – деди Эстер.

¹⁴ Падиша буны япмагъа буюрды. Шушанда къанун чыкъарылды, ве Хаманнынъ он огълуны астылар.

¹⁵ Шушандаки ехудалылар Адар айынынъ 14-юнджи куню де кене топланып, шеэрде 300 адамны ольдюрдилер. Мал-мульклерине исе къолларыны узатмадылар.

¹⁶ Падишанынъ башкъа виляетлеринде яшагъан башкъа ехудалылар топлаштылар, душманлардан къоркъмайып яшамакъ ичюн, яшайышларыны къорчаламагъа турдылар ве 75 000 душманны ольдюрдилер. Мал-мульклерине исе къолларыны узатмадылар.

¹⁷ Булар эписи Адар айынынъ 13-юнджи куню олып кечти. Айнынъ 14-юнджи куню исе олар тынчландылар ве о кунни байрам ве къуванч куню яптылар.

¹⁸ Шушандаки ехудалылар исе айнынъ эм 13-юнджи, эм 14-юнджи куню топландылар. Айнынъ 15-инджи куню исе олар тынчландылар ве о кунни байрам ве къуванч куню яптылар.

¹⁹ Онынъ ичюн диварсыз шеэрлерде яшагъан ехудалылар Адар айынынъ 14-юнджи куню къуванчнен ве зияфетлернен байрам япалар ве бири-бирлерине бахшышлар ёллайлар.

Пурим Байрамы

²⁰ Мордекъай бу вакъиаларны язып алды ве Ахашверош падишанынъ узакъ ве якъын эписи виляетлеринде яшагъан ехудалыларгъа мектюплерни ёллады

²¹ ве эр йыл Адар айынынъ 14-юнджи ве 15-инджи куньлери байрам япмагъа буюрды.

²² О куньлерде ехудалылар душманларындан къуртулдылар, ве о айда оларнынъ гъамы къуванчкъа, кедерлери де байрам кунюне айландылар. Шунынъ ичюн о куньлер зияфет ве шенълик куньлери олдылар, ве шу куньлери бири-бирлерине бахшышларны ёлламагъа, фукъарелерге де бахшышларны бермеге башладылар.

²³ Бойлеликнен, ехудалылар Мордекъайнынъ оларгъа язгъанларыны къабул эттилер ве озьлери де башлагъаныны девам эттилер.

²⁴ Эписи ехудалыларнынъ душманы агъагълы Хаммедатанынъ огълу Хаман ехудалыларны ёкъ этмеге истеди ве оларны ольдюрмеге ве къырмагъа ичюн «пур» ташлады, яни джереп чекти.

²⁵ Лякин хабер падишагъа кельген сонъ, падиша кягъытны йиберди ве Хаманнынъ ехудалыларгъа къаршы тюшюнип чыкъаргъан яманлыгъыны онынъ башына къайтарды, ве онен огъулларыны да дирекке астылар.

²⁶ Онынъ ичюн бу куньлерге «пур» сёзюнден келип чыкъкъан «Пурим» деген ад бердилер. Шу мектюпнинъ бутюн сёзлерине, озь козьлеринен корип эшиткенлерине коре,

²⁷ ехудалылар эписини къабул эттилер ве сёз бердилер ки, озьлери, эвлятлары ве оларгъа къошулгъанларнынъ эписи бу эки кунни мытлакъа байрам япаджакълар, язылгъанына коре ве озь вакътында, эр бир йыл буны этеджеклер.

²⁸ Бу куньлер хатыралыкъ куньлери оладжакъ эди, ве оларны эр несильде, эр къабиледе, эр виляетте, эр шеэрде тутаджакъ эдилер. Пурим куньлери ехудалылардан айырылмасынлар, олар даима эвлятларнынъ акълында олсун.

²⁹ Ехудалылар Пурим акъкъында язылгъан мектюпни тутсунлар деп, Авихаилнинъ къызы Эстер къыраличе ве ехудалы Мордекъай гъайретнен сорап яздылар

³⁰ ве Ахашверош падишалыгъынынъ 127 виляетине бу мектюплерни аманлыкъ ве акъикъатлыкъ тилеклеринен ёлладылар.

³¹ Эстер къыраличе ве ехудалы Мордекъай тайинлеген вакътында ехудалылар бу Пурим куньлерини эр вакъыт тутмакъ керек эдилер. Бу куньлерни аштан вазгечюв ве матем куньлери оларакъ озьлерине ве балаларына сайладылар.

³² Бойледже Эстернинъ эмири Пурим акъкъында сёзни тасдыкълады, ве о, китапкъа язылды.