Эстер 6 - Мукъаддес Китап

Мордекъайгъа урьмет бильдирелер

¹ О гедже падишанынъ юкъусы къачты, ве о, хатыралыкъ куньделик тарих китабыны кетирмеге буюрды. Китапны падишагъа окъуп башладылар.

² Китапта къапунынъ къаравуллары, падишанынъ эки везири Бигтан ве Тереш Ахашверош падишаны ольдюрмеге истегени, Мордекъай исе буны бильдиргени акъкъында язылгъан эди.

³ Падиша: – Буны япкъаны ичюн Мордекъайгъа насыл урьмет косьтерильген? Оны ненен мукяфатладылар? – деп сорады. Падишанынъ янында хызмет эткен яш огъланлар: – Онъа ич бир шей япылмады, – деп джевап бердилер.

⁴ – Азбарда ким бар? – деп сорады падиша. О вакъыт падиша эвининъ тыш азбарында Хаман турмакъта эди. О, озю азырлагъан директе Мордекъайны асмакъ акъкъында падишанен лаф этмек ичюн кельген эди.

⁵ Яш хызметчилер падишагъа: – Азбарда Хаман турмакъта, – дедилер. – Кирсин, – деди падиша.

⁶ Хаман кирди. Падиша ондан: – Эгер падиша насылдыр бир адамгъа урьмет косьтермеге истесе, шу адамгъа не япмалы? – деп сорады. Хаман ичинден: «Менден гъайры падиша кимге урьмет косьтермеге истейджек?» – деп тюшюнди.

⁷ Падишагъа исе Хаман бойле джевап берди: – Падиша урьмет косьтереджек адамгъа

⁸ падишалыкъ урбасыны, падишагъа ляйыкъ урбаларны кетирсинлер, падиша юрген атны да кетирсинлер, атнынъ башына падишагъа ляйыкъ ильванлар такъсынлар.

⁹ Урбанен атны падишанынъ башлыкъларындан энъ яхшысына берсинлер, о исе падиша урьмет косьтермеге истеген адамны кийиндирсин. Оны ат устюнде шеэр мейданына чыкъарсынлар ве онынъ огюнде къычырып бойле илян этсинлер: «Падиша урьмет косьтермеге истеген адамгъа бойле япылыр!»

¹⁰ Падиша Хамангъа: – Тез урбанен атны ал да, сен айткъанынъ киби, сарайнынъ къапусы янында отургъан ехудалы Мордекъайгъа яп. Бакъ, айткъанларынъдан бир шейни къачырма, – деди.

¹¹ Хаман урбанен атны алды ве Мордекъайны кийиндирди, оны ат устюнде шеэрнинъ мейданына чыкъарды ве онынъ огюнде къычырып бойле илян этти: «Падиша урьмет косьтермеге истеген адамгъа бойле япылыр!»

¹² Сонъ Мордекъай кене сарай къапусы янына къайтты. Хаман исе бетини къапатып, гъам ичинде эвине ашыкъты.

¹³ Хаман Зереш апайына ве эписи достларына онен олгъанларнынъ эписини айтып берди. Онынъ акъылданелери ве апайы Зереш онъа бойле дедилер: – Эгер Мордекъай ехудалы халкъындан олса, – сен исе онынъ огюнде бойле алчакъланмагъа башладынъ, – сен оны енъмейджексинъ, мытлакъа онынъ огюнде ёкъ олып кетеджексинъ.

Хаманны ольдюрелер

¹⁴ Олар онен даа лаф эткенде, падишанынъ везирлери келип, Хаманны Эстернинъ азырлагъан зияфетине кетмек ичюн ашыкътырып башладылар.