Эстер 4 - Мукъаддес Китап

Ехудалылар аштан вазгечелер ве дува окъуйлар

¹ Мордекъай эр олып кечкен шейни бильген сонъ, озь урбаларыны йыртты, устюне чувал токъумасыны кийди, озь башына куль септи, шеэрнинъ меркезине барды ве къычырып аджджы сеснен агълап башлады.

² Сарайнынъ къапусы янына барып токътады. Сарай къапуларына чувал токъумасыны кийип кирмеге мумкюн дегиль эди.

³ Эр бир виляетте де, падишанынъ буюргъаны ве къануны бильдирильген эр бир ерде ехудалылар чокъ агълап башладылар, ашамакътан вазгечтилер, козь яшы тёктилер ве къычырдылар. Бир чокълары чувал токъумасы ве куль устюнде ята эдилер.

⁴ Эстернинъ къул къызлары ве хызметчилери келип, онъа эр шейни айтып бердилер. Къыраличе пек раатсызланды. О, Мордекъай чувал токъумасыны чыкъарсын ве башкъа урбаларны кийсин деп, онъа урбаларны йиберди. Лякин о урбаны алмады.

⁵ О заман Эстер Хатакъны, падишанынъ онъа хызмет этмек ичюн къойгъан бир везирини чагъырды. О, оны Мордекъайдан, не олгъаныны ве о, буны не ичюн япкъаныны бильмек ичюн ёллады.

⁶ Хатакъ Мордекъайгъа шеэр мейданына, падиша сарайы къапусынынъ огюне кетти.

⁷ Мордекъай бутюн олгъан шейлерни онъа айтып берди. Ехудалыларны ёкъ этмек ичюн Хаманнынъ сарай хазинесине бермеге сёз берген кумюшнинъ там сайысыны да бильдирди.

⁸ Бундан гъайры, о, ехудалыларны ольдюрюв акъкъында Шушанда даркъалгъан къануннынъ копиясыны да онъа берди. О, кягъытны Эстерге косьтереджек ве анълатаджакъ эди. Мордекъай Эстерге, о, падишагъа барсын, ондан мерамет истесин ве озь халкъы ичюн ялварсын деп, буюрды.

⁹ Хатакъ келип, Мордекъайнынъ сёзлерини Эстерге айтып берди.

¹⁰ Эстер Хатакъны Мордекъайгъа бойле хабернен ёллады:

¹¹ «Падишанынъ эписи хызметчилери ве падишанынъ виляетлеринде яшагъан халкълар билелер ки, эгер бирде-бир акъай, я да къадын чагъырылмайып падишанынъ янына ички азбаргъа кирсе, онынъ джезасы бир оладжакъ – оны ольдюреджеклер. Ялынъыз, падиша кимге алтын таягъыны узатса, о сагъ къалыр. Мени исе энди отуз куньдир падишанынъ огюне чагъырмадылар».

¹² Мордекъайгъа Эстернинъ сёзлерини бильдирдилер.

¹³ Мордекъай исе Эстерге бойле джевап берди: «Эписи ехудалыларны ольдюргенде, сен падишанынъ эвинде къуртуладжакъсынъ, деп тюшюнме.

¹⁴ Эгер сен шимди агъзынъны ачмасанъ, ярдым ве къуртулыш ехудалыларгъа башкъа ерден келир. Сен ве бабанънынъ сою исе гъайып оладжакъсынъыз. Ким бильсин, бельки сен тамам бойле вакъыт ичюн къыраличе олдынъ?»

¹⁵ Эстер Мордекъайгъа бойле джевап берди:

¹⁶ «Бар да, Шушанда олгъан эписи ехудалыларны топла. Мен ичюн ашамакътан вазгечинъиз, учь кунь не гедже, не куньдюз ашаманъыз-ичменъиз. Мен де хызметчи къызларымнен берабер ашамакътан вазгечерим. Сонъ, къанунгъа къаршы олса да, падишанынъ янына барарым. Эгер мен ольсем – олерим».

¹⁷ Мордекъай андан кетип, Эстернинъ онъа буюргъаныны япты.