Эстер 3 - Мукъаддес Китап

Хаманнынъ къара ниети

¹ Бу вакъиалардан сонъ Ахашверош падиша агъагълы Хаммедатанынъ огълу Хаманны буюк адам япты. Падиша оны юксельтти ве онъа эписи башлыкълардан юксек ерни берди.

² Падишанынъ буюргъанына бойсунып, сарай къапусы янында отургъан падишанынъ эписи хызметчилери Хаманнынъ огюнде тиз чёке ве бель буке эдилер. Мордекъай исе не тиз чёкти, не де бель букти.

³ Падишанынъ эписи хызметчилери сарай къапусы янында отургъанда, Мордекъайдан: – Сен не ичюн падишанынъ буюргъаныны бозасынъ? – деп сорай эдилер.

⁴ Олар буны Мордекъайгъа эр кунь айта эдилер, лякин о, оларгъа къулакъ асмай эди. Сонъ олар буны Хамангъа бильдирдилер, Мордекъайнынъ ехудалы олгъаныны билип, о, озь сёзюнде тураджакъмы-ёкъмы бакъмагъа истедилер.

⁵ Хаман, Мордекъай онъа тиз чёкмегенини ве бель букмегенини корип, онъа къаршы олгъан ачувы толып-ташты.

⁶ Хамангъа, Мордекъайнынъ къайсы халкътан олгъаныны бильдирдилер, шунынъ ичюн ялынъыз Мордекъайны ольдюрмеге Хамангъа аз корюнди. О, Мордекъайнынъ бутюн халкъыны, Ахашверошнынъ падишалыгъында яшагъан эписи ехудалыларны ёкъ этмеге истеди.

⁷ Ахашверош падишалыгъынынъ 12-нджи йылында, биринджи айда, яни Нисан айында, олар Хаманнынъ огюнде «пур» ташладылар, яни джереп чектилер, къайсы куньде ве къайсы айда арекет этмеге кереклигини бильмеге истедилер. Джереп 12-нджи айгъа, яни Адар айына тюшти.

⁸ Хаман Ахашверош падишагъа бойле деди: – Падишалыгъынънынъ бутюн виляетлери бою халкълар арасында даркъалгъан ве дагъылгъан бир халкъ яшай. Оларнынъ къанунлары башкъа халкъларнынъ къанунларындан фаркълыдыр, ве падишанынъ къанунларыны олар беджермейлер. Падишагъа оларны озь алына къалдырмагъа олмаз.

⁹ Падишанынъ истеги олса, оларны ольдюрмеге бир эмир язылсын. Мен исе ишни беджереджек адамларгъа 10 000 чувал кумюш береджегим, оларны падишанынъ хазинесине къойсунлар.

¹⁰ О заман падиша къолундаки юзюгини чыкъарды ве агъагълы Хаммедатанынъ огълу Хамангъа, ехудалыларнынъ душманына берди.

¹¹ Падиша Хамангъа: – Кумюшни озюнъе къалдыр. Халкъны да санъа берем. Не истесенъ, оны яп, – деди.

¹² Биринджи айнынъ 13-юнджи куню падишанынъ кятиплерини чагъырдылар. Хаманнынъ буюргъанына коре, олар эр бир шейни падишанынъ акимлерине, эр виляетнинъ башлыкъларына ве эр халкънынъ башлыкъларына яздылар. Мектюплер эр виляетке озьлерининъ языларынен ве эр халкъкъа озюнинъ тилинен, Ахашверош падишанынъ адындан язылдылар ве падишанынъ юзюгинен муурьлендилер.

¹³ Мектюплер падишанынъ эписи виляетлерине хаберджилернен ёлланды. 12-нджи айда, яни Адар айында, 13-юнджи куню бутюн ехудалыларны – яшы-къартыны, балаларны ве къадынларны – бир кунь ичинде къырмакъ, ольдюрмек, ёкъ этмек ве оларнынъ шейлерини чайпап алмагъа мумкюн оладжакъ эди.

¹⁴ Язылгъан кягъытнынъ копиясы къанун оларакъ эр виляеттеки бутюн халкъларгъа бильдириледжек эди, олар бу кунь ичюн азыр олсунлар.

¹⁵ Хаберджилер падишанынъ эмиринен тез ёлгъа чыкътылар. Къанун Шушан къалесинде де илян этильген эди. Падишанен Хаман отурып иче эдилер, Шушан шеэрининъ халкъы исе шашкъынлыкъ ичинде эди.