Эстер 2 - Мукъаддес Китап

Эстер къыраличе

¹ Бундан сонъ Ахашверош падишанынъ гъазабы ятышты, ве о, Вашти акъкъында, онынъ япкъаны ве онъа къаршы чыкъарылгъан къарар акъкъында тюшюнди.

² Падишанынъ янында хызмет эткен яш огъланлар онъа бойле дедилер: – Падишагъа яш дюльбер къызларны къыдырсынлар.

³ Падиша бутюн падишалыкънынъ виляетлеринде озь векиллерини къойсун, ве олар эндамлары дюльбер эписи къызларны Шушан къалесинде, падишанынъ апайлары эвинде топласынлар. Падишанынъ везири Хегай, апайларнынъ къаравулы, оларны бакъсын. Апайларгъа мис къокъулы майлар берсинлер.

⁴ Сонъ падиша бегенген къыз Ваштининъ ерине къыраличе олсун. Падиша бу сёзлерни бегенди ве ойле де япты.

⁵ Шушан къалесинде Мордекъай адлы бир ехудалы яшай эди. Онынъ бабасы – Яир, Яирнинъ бабасы – Шимий, Шимийнинъ бабасы – Киш, Киш исе Биньяминнинъ къабилесинден эди.

⁶ Вавилон падишасы Невукъаднеццар Мордекъайны Ерусалимден кочюрген. О, Ехуда падишасы Еконьянен берабер кочюрильген эсирлерден бири эди.

⁷ О, эмджесининъ къызы Хадассаны (яни Эстерни) осьтюрип тербиеледи, чюнки онынъ не анасы, не де бабасы бар эди. Къызнынъ эм бедени, эм бети дюльбер эди. Ана-бабасы ольген сонъ, Мордекъай оны озь къызы оларакъ озюне алгъан.

⁸ Падишанынъ буюргъаныны ве къануныны илян эттилер ве Шушан къалесинде чокъ къызларны топладылар. Хегай олар ичюн джевапкяр эди. О заман Эстерни де падишанынъ сарайына алып кетирдилер, ве Хегай, апайларнынъ къаравулы, оны да козьден кечирди

⁹ ве къызны пек бегенди. Къыз онынъ козюнде урьмет къазанды. Хегай ашыкъып, онъа керекли майларны ве онынъ пайыны берди. Падишанынъ сарайындан Хегай еди корюмли къызны, Эстернинъ янында олсунлар деп, алып кетирди ве оны къызларынен берабер апайлар эвининъ энъ яхшы къысмында ерлештирди.

¹⁰ Эстер не озь халкъы, не сою акъкъында бир шей айтмады, чюнки Мордекъай онъа буны айтмамагъа буюргъан эди.

¹¹ Мордекъай Эстернинъ сагълыгъыны ве алыны бильмек ичюн, эр кунь апайлар эвининъ азбарына келе эди.

¹² Эр бир къыз озь сырасында Ахашверош падишанынъ янына кельди. Апайлар акъкъындаки къанунгъа коре, эр бир къызны он эки ай ичинде азырладылар. Бу вакъыт ичинде къызны сюрттилер: алты ай оны мюр майынен сюрте эдилер ве башкъа алты ай оны мис къокъулы шейлернен ве мельэмлернен сюрте эдилер.

¹³ Бундан сонъ къыз падишанынъ янына келе эди. Апайларнынъ эвинден чыкъып падишанынъ сарайына кирмек ичюн, къызгъа бутюн истеген шейлерини бере эдилер.

¹⁴ Акъшам къыз падишанынъ эвине кире эди, ве саба о, апайларнынъ башкъа эвине бара эди ве энди оны падишанынъ везири, джариелернинъ къаравулы Шаашгъаз бакъа эди. Бундан сонъ къыз кене падишанынъ огюне кельмей эди. Амма падиша оны бегенген олса, оны падишагъа адынен чагъыра эдилер.

¹⁵ Эстернинъ падишагъа кирмеге вакъты кельди. (Эстер Авихаилнинъ къызы, Авихаил – Мордекъайнынъ эмджеси эди. Мордекъай Эстерни озь къызы оларакъ озюне алгъан.) Эстер озюне ич бир шейни истемеди, тек падишанынъ везири, апайларнынъ къаравулы Хегай онъа айткъан шейлерни алды. Ве бойледже Эстер эр кеснинъ урьметини къазанды.

¹⁶ Ахашверош падишалыгъынынъ единджи йылында, онунджы айда, яни Тевет айында Эстерни Ахашверош падишагъа, падишанынъ сарайына алып кетирдилер.

¹⁷ Падиша Эстерни башкъа къызлардан зияде севди. Эстер эр бир яш къызлардан зияде онынъ урьметини ве севгисини къазанды. Падиша Эстернинъ башына къыраличе таджыны кийдирди ве оны Ваштининъ ерине къыраличе япты.

¹⁸ Падиша эписи башлыкъларына ве хызметчилерине буюк байрам япты. Байрамны Эстер ичюн япты. Ондан гъайры падиша озь виляетлери ичюн раатлыкъ кунюни ве падишагъа ляйыкъ джумертликнен бахшышлар берди.

Мордекъай падишаны къуртара

¹⁹ Къызларны экинджи кере алып топлагъанларда, Мордекъай падишанынъ къапусы янында отура эди.

²⁰ Эстер, Мордекъай онъа буюргъаны киби, озь сой-соплугъы ве халкъы акъкъында бир шей айтмагъан эди. Мордекъайнынъ эвинде осип яшагъанындаки киби, Эстер эп онынъ айткъанларыны япа эди.

²¹ Мордекъай падишанынъ къапусы янында отургъан вакъытта, къапунынъ къаравуллары, падишанынъ эки везири Бигтан ве Тереш, Ахашверош падишагъа къаршы ачувланып, оны ольдюрмеге истедилер.

²² Бу хабер Мордекъайгъа белли олды, ве о, бунынъ акъкъында Эстер къыраличеге хабер этти. Эстер исе Мордекъайнынъ адындан хаберни падишагъа бильдирди.

²³ Иш огренильди, ве лаф догъру олгъаны билинди. Эки везирни исе терекке астылар. Бу вакъиа падишанынъ огюнде куньделик тарих китабына язылгъан эди.