Эстер 1 - Мукъаддес Китап

Вашти къыраличенинъ тарихы

¹ Бу, Ахашверошнынъ куньлеринде олды. Шу Ахашверош Индистандан Хушкъадже 127 виляетке падишалыкъ япа эди.

² О заман Ахашверош падиша Шушан къалесиндеки тахттан падишалыкъ япа эди.

³ Падишалыгъынынъ учюнджи йылында о, бутюн башлыкълары ве хызметчилери ичюн, фарслы ве мадайлы орду башлыкълары ве мырзалары, эм де озь янындаки виляетлерининъ башлыкълары ичюн байрам япты.

⁴ О, чокъ кунь, 180 кунь ичинде озь падишалыгъынынъ сонъсуз байлыгъыны ве улулыгъынынъ шуретли гузеллигини косьтерди.

⁵ Бу куньлерден сонъ падиша Шушан къалесинде олгъан бутюн халкъ ичюн – эм буюклер, эм уфакълар ичюн – озь сарайынынъ багъчасы азбарында еди кунь байрам япты.

⁶ Беяз ве мор тюстеки басмалар мермер колонналардаки кумюш алкъаларгъа индже ишленген кетен ве мавылы къырмызы тюстеки йиплернен багъланып асылгъан эдилер.

⁷ Мермер, садеф ве дегерли ешиль ве къара ташларнен тёшельген юксекликте алтын ве кумюш ятакълар ерлештирильди.

⁸ Ичимликлер алтын ве чешит тюрлю савутларда бериле эди. Падишанынъ шараплары, онынъ байлыгъы киби, пек чокъ эди. Кимсе мусафирлерни къабул этильген къанунгъа коре ичмеге зорламай эди, чюнки падиша бутюн эвдеки хызметчилерине эр кеснинъ истеклерини беджермеге буюрды.

⁹ Вашти къыраличе де Ахашверош падишанынъ сарайында къадынлар ичюн байрам япты.

¹⁰ Единджи куню падишанынъ юреги шараптан шенъленгенде, Ахашверош падиша онъа хызмет эткен еди везирлерине – Мехуман, Бизта, Харбона, Бигта, Абагта, Зетар ве Къаркъаскъа –

¹¹ Вашти къыраличени, башында къыраличе таджынен, онъа алып кельмеге буюрды. Падиша халкъларгъа ве башлыкъларына онынъ не къадар дюльбер олгъаныны косьтермеге истеди. О, керчектен де пек дюльбер эди.

¹² Лякин Вашти къыраличе везирлернен берильген падишанынъ эмирине бойсунмагъа ве кельмеге истемеди.

¹³ Падиша пек ачувланды ве гъазаптан пек къызды. Падиша эр вакъыт озь ишлери акъкъында къанунларны ве акъ-укъукъларны бильген адамларнен акъыл таныша эди. Шунынъ ичюн бу сефер де падиша заманларны бильген икметли адамларнен акъыл танышты.

¹⁴ О вакъыт Къаршена, Шетар, Адмата, Таршиш, Мерес, Марсена ве Мемукъан падишанынъ якъынлары эдилер. Бу еди фарслы ве мадайлы башлыкъ даима падишанен корюшкен ве падишалыкъта энъ буюк адамлар эдилер.

¹⁵ Падиша олардан: – Ахашверошнынъ везирлеринен берильген эмирине бойсунмагъаны ичюн, Вашти къыраличенен къанунгъа коре не япмалы? – деп сорады.

¹⁶ Падишанынъ ве башлыкъларнынъ огюнде Мемукъан бойле деди: – Вашти къыраличе ялынъыз падишанынъ огюнде къабаатлы дегиль. О, эписи башлыкъларнынъ огюнде ве Ахашверош падишанынъ бутюн виляетлеринде яшагъан эписи халкъларнынъ огюнде къабаатлы олды.

¹⁷ Эгер онынъ япкъаны эписи къадынларгъа барып етсе, олар: «Ахашверош падиша Вашти къыраличени озюне кетирмеге буюрды да, о бармады», – дейджеклер ве озьлерининъ акъайларыны ашалайджакълар.

¹⁸ Энди фарслы ве мадайлы ханымлар къыраличенинъ япкъаныны эшитеджеклер ве айны шу сёзлерни падишанынъ башлыкъларына айтаджакълар. Шунынъ ичюн ачувнынъ ве масхаралыкънынъ сонъу олмайджакъ.

¹⁹ Падишанынъ истеги олса, падишанынъ къарары чыкъсын, ве о, фарслыларгъа ве мадайлыларгъа къанун олсун. О, ич бир вакъыт бозулмасын. Къанунгъа коре, Вашти бир даа Ахашверош падишанынъ огюне кельмесин ве онынъ къыраличе шаны ондан да яхшы къадынгъа кечсин.

²⁰ Падиша чыкъаргъан буюк къарарны бутюн падишалыкъта эшитеджеклер, ве эписи къадынлар озьлерининъ акъайларыны, буюк олсун, уфакъ олсун, урьмет этеджеклер.

²¹ Падиша ве башлыкълар бу сёзлерни бегенди. Падиша Мемукъаннынъ айткъаны киби япты.

²² О, озюнинъ эписи виляетлерине мектюплерни ёллады. Эр виляетке келишкен языларынен ве эр халкъкъа озь тилинен язылды: эр бир акъай озь эвининъ башы олсун. Шу къарар халкъларгъа озь тилинде бильдирильген эди.