Ешая 52 - Мукъаддес Китап

Рабби Ерусалимни къуртараджакъ

¹ Котериль, эй, Сион, котериль! Къудретли ол! Эй, азиз шеэр Ерусалим! Дюльбер урбаларынъны кий! Эндиден сонъ сюннет этильмеген, арам олгъан ич кимсе къапуларынъдан кирмейджек!

² Устюндеки тозунъны къакъ, тур, эй, эсир Ерусалим! Бойнунъдан зынджырынъны чыкъар, эй, эсир Сионнынъ къызы!

³ РАББИ бойле дей: – Бедава сатылдынъыз, парасыз да сатын алынаджакъсынъыз.

⁴ РАББИ-ТААЛЯ: – Башта халкъым Мысыргъа кетти, анда яшады, – дей, – сонъра Ашшур оларны токътамайып чекиштире эди.

⁵ Энди не япаджагъым? – дей РАББИ. – Халкъым бес-бедава алынды, онъа башлыкъ эткенлер агълай, – дей РАББИ, – Адымны эр кунь, токътамайып яманлайлар.

⁶ Онынъ ичюн халкъым Адымны биледжек, о куню: «Мына – Меним!» деген – Мен олгъанымны анълайджакъ.

⁷ Дагълар бою кельген, тынчлыкъ-аманлыкъны илян эткен, хайырлы хаберни кетиргеннинъ келюви не къадар хоштыр! О, къуртулыш акъкъында бильдире, Сионгъа: «Алланъ падишалыкъ этмеге башлады», – дей.

⁸ Къаравулларынънынъ сеслери эшитиле, эписи берабер къуванчнен къычыралар, РАББИнинъ Сионгъа къайткъаныны козьлеринен корьмектелер.

⁹ Тантана этинъиз, къуванчнен къычырынъыз, эй, йыкъылгъан Ерусалим! РАББИ Озь халкъынынъ гонълюни алды, Ерусалимни сатын алып, къуртарды.

¹⁰ Бутюн халкъларнынъ козю огюнде РАББИ Озь кучюни косьтерди. Дюньянынъ эписи кенарлары Алламызнынъ къуртарувыны кореджек.

¹¹ Кетинъиз, кетинъиз, андан чыкъынъыз! Арамгъа токъунманъыз, арасындан чыкъынъыз, озьлеринъизни элялланъыз, эй, РАББИнинъ савутларыны ташыгъанлар!

¹² Ашыкъмаздан чыкъаджакъсынъыз, къачмайып кетеджексинъиз, РАББИ огюнъизден кетеджек, Исраильнинъ Алласы артынъыздан сизни къорчалайджакъ.

Раббининъ къулу чекеджек азаплар

¹³ Мына, къулумнынъ ишлери онъ келеджек, котериледжек, юкселеджек, пек буюк оладжакъ.

¹⁴ Чокъусы санъа бакъып, шашып къалдылар; оны ойле котекледилер ки, оны танымагъа мумкюн дегиль эди, адам сыфаты къалмады.

¹⁵ Лякин чокъ миллетлерни шашыртаджакъ, онынъ огюнде падишаларнынъ агъызлары къапаладжакъ. Оларгъа айтылмагъан шейлерни кореджеклер, эшитмеген шейлерни биледжеклер.