Ешая 50 - Мукъаддес Китап

Исраильнинъ гунасы

¹ РАББИ бойле дей: – Ананъызгъа айырылув кягъытыны бермейип, оны къувдым. Кимсеге борджлу олмайып, сизни саттым. Не ичюн? Сизни гуналарынъыз ичюн саттым, ананъызны акъсыз япкъанларынъыз ичюн къувдым.

² Мен кельгенимде, не ичюн кимсе ёкъ эди? Чагъыргъанымда, не ичюн кимсе джевап бермеди? Сизлерни къуртармакъ ичюн, къолум къыскъардымы, аджеба? Сизлерни къорчаламакъ ичюн, кучюм биттими? Бакъынъыз! Сертнен къычыргъанымда, денъиз къуруй, озенлер сахрагъа чевириле, сув етмегенинден балыкълар оле ве сасый.

³ Коклерни къаранлыкънен къаплайым, чувал токъумаларынен киби оны япам.

Къулу Раббини динълей

⁴ Рухтан тюшкенни сёзнен юреклендирейим деп, РАББИ-ТААЛЯ манъа акъыллы лаф этмеге къабилиетини берди. Акъыллы адам киби динълейим деп, эр саба къулагъымны уята.

⁵ РАББИ-ТААЛЯ къулагъымны ачты, мен бунъа къаршы чыкъмадым, арткъа чекильмедим.

⁶ Мени ургъанларгъа аркъамны, сакъалымны алгъанларгъа янакъларымны ачтым. Ашаламакътан ве тюкюриктен бетимни къапатмадым.

⁷ РАББИ-Тааля манъа ярдым эте, шунынъ ичюн утанмайым, бетимни чакъмакъташы киби этем, масхара къалмайджагъымны билем.

⁸ Мени акълайджакъ Алла якъындыр, манъа къаршы ким чыкъмагъа азыр? Юзьме-юзь турайыкъ! Мени къабаатламагъа ким азыр? Яныма кельсин!

⁹ Мына, манъа РАББИ-ТААЛЯ ярдым эте, мени ким къабаатлайджакъ? Оларнынъ эписи, урба киби, ипранаджакъ, оларны сюме ашап битиреджек.

¹⁰ Аранъыздан РАББИден ким къоркъа? Къулунынъ сёзюни ким тута? Ярыкъ олмайып, къаранлыкъта юргенлер РАББИнинъ Адына ишансын, Алласына таянсын.

¹¹ Эй, атешни алевлендиргенлернинъ эписи! Эй, янгъан окъларны туткъанлар! Атешинъизнинъ ялынына, окъларынъызнен якъкъан атешке кетинъиз. Буны сизге къолум япаджакъ, чекишип оледжексинъиз.