Ешая 36 - Мукъаддес Китап

Санхерив Ерусалимни къоркъуза

¹ Хизкия 14-юнджи йылы падишалыкъ эткенде, Ашшур падишасы Санхерив, Ехуданынъ бутюн къавийлештирильген шеэрлерине къаршы чыкъып, оларны запт этти.

² Ашшур падишасы Лакиш шеэринден Ерусалимге Хизкия падишасына орду башыны буюк ордусынен берабер ёллады. О келип, юкъары хавуздан акъкъан арыкъ янында токътады. О ер токъумаларны ювып къуруткъан тарлагъа баргъан ёлунда эди.

³ Оны къаршыламакъ ичюн, Хилкиянынъ огълу сарай башлыгъы Эльяким, языджы Шевна ве Асафнынъ огълу тарихчы Ёах чыкътылар.

⁴ Орду башы оларгъа бойле деди: – Хизкиягъа айтынъыз: Ашшурнынъ улу падишасы бойле дей: Сен кимге ишанасынъ?

⁵ Сенинъ айткъан шейлеринъ – бош лаф. Дженк этмек ичюн акъыл танышув ве къувет керек. Сен исе манъа къаршы котерилип, кимге ишанасынъ?

⁶ Сен Мысыргъа, бу сынгъан таякъкъа ишанасынъ, гъалиба? Мысыргъа ким таянса, о къолуны санчып яралай. Мысыр падишасы олгъан фыравун онъа ишангъанларнынъ эписине ойле япа.

⁷ Сен, гъалиба, манъа: «Биз РАББИге, Алламызгъа ишанамыз», – дерсинъ. Лякин Хизкия шу Алланынъ ибадет тёпелерини ве къурбан ерлерини ёкъ этип, бутюн Ехуда ве Ерусалим халкъына: «Тек бу къурбан еринде ибадет этинъиз», – демедими?

⁸ Шимди эфендимнен Ашшур падишасынен анълашсанъ ве мен санъа эки бинъ ат берсем, оларнынъ устюне атлылар тапып олурсынъмы?

⁹ Сен эфендимнинъ энъ кичик башлыгъындан юзь чевирме, Мысыргъа ве онынъ дженк арабалары ве атлыларына ишанма.

¹⁰ Бундан да гъайры, мен бу мемлекетни йыкъмагъа Алланынъ эмиринен кельдим. РАББИ манъа: «Шу мемлекетке бар да, оны ёкъ эт», – деди.

¹¹ Эльяким, Шевна ве Ёах орду башына: – Бизге, къулларынъа арамий тилинде айт, биз арамийдже анълаймыз. Еудийдже лаф этме, дивардаки адамлар бизни эшителер де, – дедилер.

¹² Орду башы оларгъа джевап къайтарып: – Эфендим бу сёзлерни тек сизге ве эфендинъизге айт деп, мени йибердими? Ёкъ! Диварларнынъ устюнде отургъан бу халкъкъа да йиберди. Олар сизлернен берабер ачлыкътан озь бокъларыны ашайджакълар, озь сийдиклерини ичмеге меджбур оладжакълар, – деди.

¹³ Сонъ орду башы турып, бар сесинен еудийдже къычырды: – Ашшурнынъ улу падишасынынъ сёзлерини динъленъиз!

¹⁴ Падиша бойле дей: Хизкия сизни алдатмасын, о сизни къуртарып оламаз!

¹⁵ Хизкия Алла акъкъында: «РАББИ бизни мытлакъ къуртарыр, бу шеэр Ашшур падишасынынъ къолуна тюшмез», – деп сизни ишандырмасын.

¹⁶ Хизкияны динълеменъиз! Ашшур падишасы бойле дей: Меннен барышынъыз ве огюме чыкъынъыз. Сонъра эр кес озь юзюми ве озь инджирлерини ашасын, озь къуюсындан сув ичсин.

¹⁷ Сонъ мен келип, сизни тыпкъы сизинъ топрагъынъыз дайын топракъкъа алып кетеджегим. О топракъ – ашлыкъ ве яш шарап, отьмек ве юзюмликлер топрагъыдыр.

¹⁸ Хизкия: «РАББИ бизни къуртарыр», – деп, сизлерни алдатмасын. Миллетлернинъ аллалары озь топракъларыны Ашшур падишасы къолундан къуртардымы?

¹⁹ Хамат ве Арпад шеэрлерининъ аллалары къайда? Сефарваим шеэрининъ аллалары къайда? Аллалар Самарие шеэрини менден къуртардылармы?

²⁰ Бутюн ерлернинъ аллаларындан къайсы алла озь мемлекетини менден къуртарды? РАББИ Ерусалимни менден къуртара билирми?

²¹ Эр кес индемеди, кимсе онъа бир сёз биле джевап бермеди, чюнки падиша джевап бермемеге буюргъан эди.

²² Сонъ Хилкиянынъ огълу сарай башлыгъы Эльяким, языджы Шевна ве Асафнынъ огълу Ёах тарихчы урбаларыны йыртып, Хизкиягъа кельдилер, онъа орду башынынъ сёзлерини айтып бердилер.