Ешая 34 - Мукъаддес Китап

Алла Озь душманларыны джезалай

¹ Эй, миллетлер, динълемек ичюн, якъынлашынъыз! Эй, халкълар, къулакъ асынъыз! Ер юзю ве ер устюнде яшагъан эр шей, дюнья ве анда эписи догъгъанлар, динъленъиз!

² РАББИ эписи миллетлерге ачувланды, оларнынъ бутюн ордуларына гъазапланды. Оларны ёкъ этеджек, чокъларыны ольдюреджек.

³ Олюлери анда-мында атыладжакъ, джесетлеринден сасыкъ даркъаладжакъ, дагълары къандан сылакъ оладжакъ.

⁴ Бутюн кок ордусы ирип кетеджек, коклер, бурулгъан кягъыт киби, сарыладжакъ. Юзюм пытагъындан, я да инджир терегинден солгъан япракъ тюшкени дайын, бутюн ордулары йыкъыладжакъ.

⁵ – Къылычым кокте тойгъандже ичти, энди де Эдомгъа тюшеджек, ёкъ этиледжек халкъны джезалайджакъ, – дей РАББИ.

⁶ РАББИнинъ къылычы чокъ къан тёкеджек, къочкъарларнынъ ве текелернинъ ягъларына ве къанына, къочкъарларнынъ ич ягъына тояджакъ. Боцра шеэринде РАББИ къурбан чаладжакъ, Эдом топрагъында чокъ сояджакъ.

⁷ Оларнен берабер кийик бугъалар, эм бузавлар, эм кучьлю огюзлер союладжакъ. Топракъ къанларына тояджакъ, ягъларындан семиреджек.

⁸ О куню РАББИ джезалай, о йылы Сион давасы ичюн халкъларнынъ акъларыны бере.

⁹ Эдом озенлери зифтке, топрагъы кукюртке чевиреледжек; бутюн мемлекети янгъан зифт оладжакъ.

¹⁰ Гедже-куньдюз сёнмейджек, омюрбилля тютейджек. Несильден несильгедже мемлекет бом-бош къаладжакъ, адамлар анда эбедиен юрмейджек.

¹¹ О топракънынъ сабылары миявкъушнен кирпилер оладжакъ, анда пугъу ве къузгъун яшайджакъ. РАББИ Эдомнынъ бойдан-боюна харап этювини тайинлейджек, ёкъ этювини чекеджек.

¹² Мырзалар: «Энди падишалыкъ ёкъ», – дейджек, башлыкъларынынъ эписи гъайып оладжакъ.

¹³ Сарайларында тикенли осюмликлер, къавийлештирильген шеэрлерде къыджыткъан ве кийик отлар оседжек. О ер шакъалларнынъ яшагъан ери, девекъушуларнынъ юрту оладжакъ.

¹⁴ Кийик айванлар сыртланларнен корюшеджек, анда теке шейтанлары къычырышаджакълар, Лилит анда ерлешип, раатланаджакъ.

¹⁵ Кийик къушлар анда юва япып, йымырта къозлап, балаларыны чыкъараджакълар да, талдалары тюбюнде оларны топлайджакълар. Чайлакълар анда ерлешип топланаджакълар.

¹⁶ Оларнынъ эписи, бири четте къалмай, анда чифт-чифт пейда оладжакъ. РАББИнинъ Китабында тапып окъунъыз, айтылгъан эр шей мытлакъа оладжакъ. Бу эмир РАББИнинъ агъзындан чыкъты, Руху да оларны топлайджакъ.

¹⁷ Олар ичюн РАББИ джереп чекти, къолунен мемлекетни ольчеп, оларгъа пай этти. Олар омюрбилля о топракъкъа саиплик этип, несильден несильгедже анда яшайджакълар.