Ешая 21 - Мукъаддес Китап

Вавилон акъкъында пейгъамберлик

¹ Денъиз ялысындаки сахра акъкъында пейгъамберлик. Негев ериндеки боран киби, о, сахра тарафындан, къоркъунчлы топракътан келе.

² Къоркъунчлы бир шейни корьдим: адамлар бири-бирине хаинлик этелер, душманлар орталыкъны урып йыкъалар. «Эй, Элам, кель мында! Эй, Мадай, шеэрни алкъагъа ал! Бутюн ич чеккенлерини токътатаджагъым».

³ Шунынъ ичюн белимни аджджы агъры тутты, дерди туткъан къадын киби, дерттен чекишем. Эшиткенимден мен пек кедерлендим, корьгенимден пек къасеветлендим.

⁴ Юрегим ойнай, къоркъудан къалтырайым, эвель сабырсызлыкънен беклеген гедже шимди мени дешет тюбюнде къалдыра.

⁵ Софраны донаттылар, килимлерни джайдылар, ашап-ичип башладылар. «Эй, башлыкълар! Турунъыз, къалкъанларынъызны ягъланъыз!»

⁶ Рабби манъа бойле деди: – Бар, къаравул къой, корьген шейлерини бильдирсин.

⁷ Чифт-чифт атлар устюнде, эшеклер ве девелер устюнде кельген атлыларны корьгенде, буюк дикъкъатнен динълесин.

⁸ Къаравуллыкъ эткен къычырды: – Раббим! Эр кунь къаравуллыкъ эттим, эр гедже еримден айырылмадым.

⁹ Мына, адамлар, чифт-чифт ат устюндеки атлылар келе! Сонъ сесини чыкъарып, бойле деди: – Йыкъылды, Вавилон йыкъылды! Бутюн аллаларынынъ путлары ерге урулып къырылдылар.

¹⁰ Эй, халкъым! Арман еринде урулып темизленген богъдай кибисинъ! Ордуларнынъ РАББИсинден, Исраильнинъ Алласындан не эшиткен олсам, сизге хабер эттим.

Эдом акъкъында пейгъамберлик

¹¹ Дума акъкъында пейгъамберлик. Сеир тарафтан манъа къычыралар: – Эй, къаравул! Гедже даа чокъ сюреджекми? Эй, къаравул! Гедже тез битеджекми?

¹² Мен къаравуллыкъ этип: – Саба якъын, амма гедже даа битмеди. Даа сорайджакъ олсанъыз, келип соранъыз, – деп джевап бердим.

Араплар акъкъында

¹³ Арабистан акъкъында пейгъамберлик. Эй, Дедан керванлары! Арабистан орманында геджеленъиз!

¹⁴ Эй, Тема топрагъында яшагъанлар! Сувсагъанларгъа сув беринъиз, къачкъанларны отьмекнен къаршыланъыз.

¹⁵ Олар къылычтан, ялын къылычтан, тартылгъан яйдан, дженкнинъ дешетинден къачалар.

¹⁶ Рабби манъа бойле деди: – Даа бир, ыргъатлыкъ йылына тенъ кельген, йылдан сонъра Кедарнынъ бутюн шурети гъайып оладжакъ.

¹⁷ Кедарнынъ сагъ къалгъан аскерлери, джесюр окъчулары пек аз оладжакъ. РАББИ, Исраильнинъ Алласы, бойле хабер этти.