Ешая 2 - Мукъаддес Китап

Ер юзюнде Алланынъ Падишалыгъы оладжакъ

¹ Ехуда ве Ерусалим акъкъында Амоцнынъ огълу Ешаягъа берильген хабер.

² Сонъки куньлерде РАББИнинъ Эви тургъан дагъ дагъларнынъ башы оладжакъ, байырлардан юксек котериледжек, ве онъа тараф бутюн миллетлер, озенлер киби, акъып кетеджеклер.

³ Чокъ халкълар келип, бойле дейджек: – Айдынъыз, РАББИнинъ дагъына котерилейик, Якъуп Алласынынъ Эвине кирейик. О бизге Озь ёлларыны корьсетеджек, ве бизлер Онынъ ёлларындан юреджекмиз. О заман РАББИ Сиондан Къанунны огретеджек, Ерусалимден Озь Сёзюни ёллайджакъ.

⁴ РАББИ миллетлерни суд этеджек ве чокъ халкъларны къабаатлайджакъ. Адамлар къылычларындан сабан тишлерини дёгеджек, мызракъларындан юзюм кесмек ичюн пычакълар япаджакъ. Бир даа халкъ халкъкъа къаршы къылыч котермейджек, энди дженк этмеге огренмейджек.

⁵ Эй, Якъупнынъ эви! Келинъиз, РАББИнинъ ярыгъында юрейик!

Багъышлав огюнден джеза келе

⁶ Сен, РАББИ, халкъынъны, Якъупнынъ эвини терк эттинъ, чюнки олар куньдогъуштакилерден пек чокъ шейни озьлерине адет эттилер. Фелестинлилерде олгъаны дайын, оларда аляметлерни бакъып келеджекни айткъанлар пейда олды, ябанджы огъланларнен аралары якъын.

⁷ Халкънынъ топрагъы алтын ве кумюшке толу олды, байлыгъынынъ сонъу ёкъ. Топрагъы атларгъа да толу олды, арабалары сайысыздыр.

⁸ Топрагъы бош путларгъа да толу олды, къолларынен япылгъан, пармакъларынен ясалгъан путларгъа табыналар.

⁹ Адамлар йыкъылды, акъайлар ашаланды. Багъышлама оларны!

¹⁰ РАББИнинъ гъазабындан ве шуретли буюклигинден къоркъып, къаяларгъа кет, ер тюбюнде сакълан.

¹¹ Къопай адамлар козьлерини ашагъы тюшюреджек, гъурурлы адамлар ашаланаджакъ. О куню тек РАББИ юксек оладжакъ!

¹² Бутюн къопай, гъурур ве юксельтильген адамларгъа къаршы Ордулар РАББИсининъ куню келеджек, ве олар эписи ашаланаджакълар!

¹³ Юксек ве юксельтильген бутюн Ливан кедрлери ве эписи Башан эменлери,

¹⁴ бутюн юксек дагълар ве эписи юксельтильген байырлар,

¹⁵ бутюн юксек къуллелер ве эписи кучьлю диварлар,

¹⁶ бутюн Таршиш гемилери ве эписи истенильген ильванларгъа къаршы РАББИнинъ гъазабы келеджек.

¹⁷ Адамларнынъ къопайлыгъы ерге тюшеджек, гъурурлы адамлар ашаланаджакъ. О куню тек РАББИ юксек оладжакъ,

¹⁸ путлар исе бутюнлей гъайып оладжакъ.

¹⁹ РАББИ ер юзюни титретмеге келеджек вакъытта адамлар Онынъ гъазабындан къоркъып, шуретли буюклигинден сакъланып, къая чатлакъларына киреджек, ер чукъурларына тюшеджеклер.

²⁰ О куню адамлар озь кумюш ве алтын путларыны, ибадет ичюн япылгъан бош шейлерини ерсычан ве яркъанатларгъа атаджакълар

²¹ ве РАББИнинъ гъазабындан къоркъып, шуретли буюклигинден сакъланып, къая чатлакъларына киреджеклер, ер дерелерине тюшеджеклер. РАББИ ер юзюни сарсытмагъа келеджек вакъытта ойле оладжакъ.

²² Тек нефеси олгъан адамларгъа ишанмакътан вазгечинъиз! Онынъ омюри ярым капик этмез!