Ешая 19 - Мукъаддес Китап

Мысыр акъкъында пейгъамберлик

¹ Мысыр акъкъында пейгъамберлик. Иште, РАББИ енгиль булуткъа отурып, Мысыргъа келе! Мысырнынъ путлары Онынъ юзюнден къалтырай, мысырлыларнынъ юреги къопып кете.

² – Мысырлыларгъа къаршы мысырлыларны ёллайджагъым, къардаш къардашына, дост достуна, шеэр шеэрге, падишалыкъ падишалыкъкъа къаршы дженк этеджеклер.

³ Мысырлылар рухтан тюшеджек, оларнынъ ниетлерини ёкъ этеджегим. Ярдым ичюн бош путларгъа, олюлернинъ рухларына, рухларнен лаф эткенлерге, джинлерни чагъыргъанларгъа бараджакълар.

⁴ Мысырлыларны мераметсиз укюмдарнынъ къолуна береджегим, кучьлю бир падиша оларгъа падишалыкъ этеджек, – дей Рабби, Ордуларнынъ РАББИси.

⁵ Денъиздеки сувлар чекиледжек, буюк дерья битип къуруйджакъ.

⁶ Озенлер сасып башлайджакъ, Мысыр каналлары сай олып къуруйджакъ, къамыш ве саз солып къаладжакъ.

⁷ Дерья янындаки ве озен агъзындаки осюмликлер, дерья янында бутюн сачылгъан тарлалар къуруйджакъ, савурыладжакъ, ёкъ оладжакъ.

⁸ Балыкъчылар агълайджакъ, дерьягъа къармакъ ташлагъанлар эписи окюр-окюр агълайджакъ, сувда агъ къойгъанлар рухтан тюшеджеклер.

⁹ Кетен ишлегенлер, беяз басма токъугъанлар рухтан тюшеджеклер.

¹⁰ Мемлекет таянгъан адамлар харап оладжакъ, эписи ыргъатлар рухтан тюшеджек.

¹¹ Цоан башлыкълары не къадар акъылсыз! Фыравуннынъ акъыллы насиатчылары акъылсыз меслеат берелер. Сизлер фыравунгъа: «Мен икметли адамларнынъ огълу, къадим падишаларынынъ огълудырым», – насыл этип, дейджексинъизми?

¹² Къайдалар сенинъ акъыллы адамларынъ? Ордуларнынъ РАББИси Мысыр акъкъында насыл къарар чыкъаргъаныны энди санъа айтсынлар, оны эр адам бильсин.

¹³ Цоан башлыкълары акъылдан тайды, Ноф башлыкълары алданды, къабилелерининъ ёлбашчылары Мысырны ёлдан урдылар.

¹⁴ РАББИ оларнынъ акъылларыны ойнатты, олар, сархош озь къускъагъында насыл тапталса, айны Мысырны да бутюн ишлеринде ёлдан урдылар.

¹⁵ Мысыргъа энди кимсе ярдым этип оламайджакъ, не башлыкълар, не адий ишчилер, не белли адамлар, не де белли олмагъанлар.

Мысыр Раббиге шукюр этеджек

¹⁶ О куню мысырлылар къадынларгъа ошап, оларгъа къаршы котерильген Ордулар РАББИсининъ къол арекетинден къалтырап, къоркъаджакълар.

¹⁷ Ехуданынъ топрагъы Мысырны дешетке кетиреджек. Ордуларнынъ РАББИси Мысырнен не япкъаныны хатырлагъан эр кес къоркъудан къалтырайджакъ.

¹⁸ О куню Мысыр топрагъында беш шеэр ханаанлыларнынъ тилинде лаф этеджек ве Ордуларнынъ РАББИсине садыкъ олмагъа ант этеджеклер. Олардан бириси «Херес шеэри» деп адланаджакъ.

¹⁹ О куню Мысыр топрагъынынъ ортасында РАББИнинъ къурбан ери ерлешеджек, сынъырында исе – РАББИге багъышлангъан таш диреги тураджакъ.

²⁰ О таш Мысыр топрагъында Ордуларнынъ РАББИси акъкъында алямет ве шеадетнаме оладжакъ. Залымлар оларны къыйнагъанда, олар РАББИден ярдым сорайджакъ, ве РАББИ оларгъа къуртарыджы ве къорчалайыджыны ёллайджакъ ве оларны къуртараджакъ.

²¹ РАББИ Мысырда пейда оладжакъ, ве о куню мысырлылар РАББИни биледжеклер, къурбанларны ве бахшышларны кетиреджеклер, РАББИге адакълар береджеклер ве оларны беджереджеклер.

²² РАББИ Мысырны ураджакъ, амма ургъан сонъ яхшы этеджек. Олар РАББИге къайтаджакълар, О оларнынъ ялваргъаныны эшитеджек ве оларны тедавийлейджек.

²³ О куню Мысырдан Ашшургъа кенъ бир ёл оладжакъ. Ашшурлылар Мысыргъа, мысырлылар да Ашшургъа къатнайджакълар. Ашшурлылар мысырлыларнен берабер Раббиге хызмет этеджеклер.

²⁴ О куню Мысыр ве Ашшурнынъ янында Исраиль учюнджи мемлекет оладжакъ. Мемлекетнинъ ортасында багъышлав оладжакъ,

²⁵ ве Ордуларнынъ РАББИси: «Мысырлылар – халкъым, ашшурлылар – къолларымнынъ ишидир, Исраиль – Меним мулькюмдир», – деп, мемлекетни багъышлайджакъ.