Ешая 16 - Мукъаддес Китап

Моавнынъ умютсиз алы акъкъында

¹ Топракънынъ падишасына Села шеэринден, сахра ёлундан, Сион къызынынъ дагъына къочкъарларны ёлланъыз.

² Арнон дерьясынынъ сай ерлеринде Моав къызлары – ювасындан атылгъан, эвсиз къушлар киби оладжакълар.

³ «Огют беринъиз, къарар чыкъарынъыз, уйле сыджагъында терек талдасы къорчалагъан дайын, бизни белядан къорчала, къувалангъанларны сакъла, къачакъларны сатма.

⁴ Къувалангъан моавлыларым сеннен берабер яшасын, оларны залымлардан сакъла». Залымнынъ сонъу келеджек, зулум битеджек, чекиштиргенлер ер юзюнден гъайып оладжакъ.

⁵ Падишанынъ укюмети севги ве яхшылыкънен къавий оладжакъ; тахтнынъ устюнде, Давутнынъ чадырында ишанчлы Суд Этиджи отураджакъ, адалетни къыдыраджакъ, усталыкънен суд этеджек.

⁶ – Моавнынъ макътангъаныны, пек къопай, гъурурлы, кибирли ве магърур айткъанларыны эшиттик. Айткъанлары исе бошуна!

⁷ Шунынъ ичюн моавлылар Моав акъкъында агълайджакъ, эр кес агълайджакъ. Рухтан тюшкенлер! Кир-Харесетнинъ юзюм къурусы артындан аджджы агъланъыз!

⁸ Хешбон тарлаларынынъ берекети къыт олды, Сивманынъ юзюмликлери къуруды. Халкъларнынъ башлыкълары энъ яхшы юзюм пытакъларыны къырдылар. Юзюм исе Язер шеэрине къадар етип, сахра бою джайыла эди, денъизнинъ обир ялысына кече эди.

⁹ Онынъ ичюн Язер акъкъында, Сивмадаки юзюмлик артындан агълайджагъым. Хешбон ве Элале шеэрлери, сизинъ акъкъынъызда козьяш тёкеджегим! Юзюм джыйылгъан вакътында, оракъ мевсиминъде шенъли къуванч ёкъ да!

¹⁰ Багъчалардан шенълик ве къуванч гъайып олды, юзюм багъларында къуванчнен къычырмай ве йырламайлар, юзюм сыкъылгъан чукъурларында юзюм таптамайлар. Мен къуванчны токътаттым.

¹¹ Моав ичюн ичим-багърым, сантыр киби, инълей, Кир-Херес ичюн юрегим сызлай.

¹² Моавлылар келип, ибадет тёпелеринде йыкъылгъандже табынса да, азиз еринде дува этсе де, бир шей ярдым этмейджек.

¹³ РАББИ Моав акъкъында бойле хабер этти.

¹⁴ Энди РАББИ айта ки: – Моавнынъ шурети ве онынъ чокъ сайылы адамлары учь ыргъатлыкъ йылларындан сонъра ашаланаджакъ. Сагъ къалгъанлары да пек аз сайылы ве кучьсюз оладжакъ.