Ешая 15 - Мукъаддес Китап

Моав акъкъында пейгъамберлик

¹ Моав акъкъында пейгъамберлик: – Ар-Моав шеэри бир геджеде йыкъылды, харап этильди! Кир-Моав шеэри бир геджеде йыкъылды, харап этильди!

² Аллаларынынъ эвине, Дивон шеэрининъ ибадет тёпелерине агъламакъ ичюн кеттилер. Моав халкъы Нево ве Медева шеэрлери ичюн аджджы агълай; эр кеснинъ баш сачлары алынгъан, сакъаллары тыраш олунгъан.

³ Сокъакъларында чувал токъумаларына сарылалар, дамларда ве мейданларда эр кес агълай, эр кес козьяш ичинде богъула.

⁴ Хешбон ве Элале шеэрлери къычырып агълай, оларнынъ сеси тап Яхац шеэринде эшитиле. Шунынъ ичюн Моав аскерлери де агълайлар, олар рухтан тюштилер.

⁵ Моав ичюн юрегим агълай. Андан къачкъанлар Цоар шеэрине, Эглат-Шелишьягъа кельдилер. Агълай-агълай, Лухит ерине котерилелер, Хоронаим ёлунда багъырып, дешетли айкъыралар.

⁶ Нимрим озенининъ сувлары чекильди, чайырлар къуруды, отлар сарарып солды, ешиллик битти.

⁷ Шунынъ ичюн халкъ къазанып не топлагъан олса, Аравим дерьясынынъ башкъа ялысына алып кете.

⁸ Моавнынъ дёрт тарафында къычырувлар эшитиле, агълагъаны Эглаимге ве Беэр-Элимге къадар кете,

⁹ Димон озенининъ сувлары къангъа толды, амма Димонгъа къаршы даа бетерини тюшюреджегим, Моавдан къачып къуртулгъанларгъа ве мемлекетте сагъ къалгъанларгъа къаршы арсланларны ёллайджагъым.