Ешая 14 - Мукъаддес Китап

Сюргюнликтен къайтув

¹ РАББИ Якъупны аджыйджакъ, кене Исраильни сайлайджакъ, оларны топракъларында ерлештиреджек. Башкъа халкълар оларгъа къошуладжакъ, Якъупнынъ эвине япышаджакълар.

² Халкълар оларны алып, ерлерине кетиреджек, ве анда, РАББИнинъ топрагъында, халкълар исраиллилернинъ къуллары оладжакъ. Озьлерини эсирликке алгъанларны эсирликке аладжакъ, залымларынынъ устюне эфендилик этеджек.

Вавилон падишасы енъильгени себебинден гъалебе тюркюси

³ О куню РАББИ сени дертлерден, къаарь-къасеветтен ве агъыр къуллукътан къуртаргъанда,

⁴ сен Вавилоннынъ падишасыны мыскъыллап, онынъ акъкъында бойле йырлайджакъсынъ: – Залым ёкъ олды, гъазабы да битти.

⁵ РАББИ яман адамларнынъ таягъыны къырды, кучьлюлернинъ акимиетини йыкъты.

⁶ Падиша ачувында халкъларны токътамаздан ура, гъазабында миллетлерни даима чекиштире эди.

⁷ Шимди исе бутюн ер юзюне раатлыкъ ве тынчлыкъ кельди, эр шей къуванчнен къычыра.

⁸ Кипарислер ве Ливан кедрлери шенъленип: «Сен енъилип ятасынъ, бизлерни кесмек ичюн ич кимсе кельмей», – дейлер.

⁹ Ашагъыдаки олюлернинъ дюньясы, сени киришинде къаршыламакъ ичюн, арекет этти; сенинъ ичюн олюлернинъ рухларыны, дюньянынъ башлыкъларыны уятты; миллетлернинъ эписи падишаларны тахтларындан котерди!

¹⁰ Олар эписи санъа: «Сен де, бизлер киби, кучюнъни джойдынъ! Сен де бизге ошадынъ!» – айтаджакълар.

¹¹ Арфаларынъ чалгъан авасынен буюклигинъ олюлернинъ дюньясына авдарылды. Къуртлар устюнде ятасынъ, орьтю киби, устюнъни къуртчыкълар къаплайлар.

¹² Эй, танъ йылдызы, саарь огълу! Бутюн халкъларны енъдинъ! Шимди исе, кесильген терек киби, ерге йыкъылдынъ!

¹³ Сен: «Кокке чыкъарым, Алланынъ йылдызларындан юкъары тахтымны къоярым, Цафон дагъында, аллалар топлангъан дагъында отураджагъым.

¹⁴ Булутларнынъ тёпесине котериледжегим, Юдже Алла киби оладжагъым», – деп тюшюндинъ.

¹⁵ Амма сени олюлернинъ дюньясына, олюм чукъурынынъ теренлигине алып кеттилер!

¹⁶ Сени корьгенлер дикъкъат этип, тюшюнджеге даладжакълар: «Ер юзюни тепреткен, падишалыкъларны сарсыткъан,

¹⁷ дюньяны сахрагъа чевирген, шеэрлерини йыкъкъан, эсирлерини запт этип, эвлерине йибермеген адам бумы?»

¹⁸ Эписи миллетлернинъ падишалары шереф иле эр бири озь мезарында яталар.

¹⁹ Сени исе дефн этмейип, ташладылар, бир шейге кечмеген пытакъны киби, ерге аттылар. Таш чукъурларына тюшюрильгенлернинъ, къылычнен ольдюрильгенлернинъ урбасы киби ятасынъ, сени, леш киби, таптайлар.

²⁰ Башкъаларны дефн этеджеклер, сен исе къабирде ятмайджакъсынъ, чюнки сен озь топрагъынъны боздынъ, халкъынъны ольдюрдинъ. Яманларнынъ эвлятлары омюрбилля анъылмайджакъ.

²¹ Бабанынъ къабаатлары ичюн, огъулларыны, къурбанларны киби, соймагъа ер азырланъыз. Олар кучьлю олып, топракъкъа сабы олмасынлар, ер юзюни шеэрлерине толдурмасынлар.

²² – Оларгъа къаршы чыкъаджагъым, – дей Ордуларнынъ РАББИси. – Вавилоннынъ намыны ёкъ этеджегим, сагъ къалгъанларны, эвлятларыны ве несиллерини ольдюреджегим, – дей РАББИ.

²³ – Онынъ топрагъыны кирпилерге береджегим, батакълыкъкъа чевиреджегим, орталыкъны йыкъаджагъым, сипиркинен киби сипиреджегим, – дей Ордуларнынъ РАББИси.

Ашшур акъкъында пейгъамберлик

²⁴ Ордуларнынъ РАББИси ант этти: – Не япмагъа ниетленсем – о оладжакъ, не этмеге тюшюнсем – о беджериледжек.

²⁵ Ашшурны Меним топрагъымда ёкъ этеджегим, дагъларымда таптайджагъым. Халкъым Ашшурнынъ боюндырыгъындан, омузларындаки юктен къуртуладжакъ.

²⁶ Бутюн ер юзю акъкъында чыкъарылгъан къарар будыр. Алланынъ къолу бутюн халкъларгъа къаршы котерильгендир.

²⁷ Ордулар РАББИсининъ къарарыны ким ёкъ этип олур? Котерильген къолуны ким токътатып олур?

Фелестинлилер акъкъында пейгъамберлик

²⁸ Ахаз падиша ольген йылында ойле пейгъамберлик олды:

²⁹ – Эй, фелестинлилернинъ топрагъы! Сени ургъан таякъ харап олгъанына къуванма! Йыланнынъ союндан кобра чыкъаджакъ, онынъ баласы – учкъан аждерха оладжакъ.

³⁰ О заман энъ ёкъсуллар, яйладаки къойлар киби, тойып ашайджакълар, фукъарелер къоркъмайып юкълайджакълар. Сенинъ союнъны исе ачлыкътан ольдюреджегим, сагъ къалгъанларынъыз биле оледжек.

³¹ Агъланъыз, эй, шеэр къапулары! Эй, шеэр, сес чыкъарып улу! Эй, бутюн Фелестин топрагъы, сен гъайып оладжакъсынъ! Шималь тарафтан тютюн котериле, душман ордулары сыра-сыра келе, аскерлерден бири артта къалмай.

³² Халкъларнынъ хаберджилерине не айтмакъ керек? – Сионнынъ темелини РАББИ къойды, чекиштирильген халкъ анда сакъланаджакъ!