Ешая 12 - Мукъаддес Китап

Раббини макътагъан йырлар

¹ О куню бойле дейджексинъ: – Я РАББИ! Санъа шукюрлер олсун! Сен манъа ачувлана эдинъ, амма ачувынъ ятышып, юрегимни алдынъ.

² Мени Алла къуртара! Онъа ишанып, къоркъмайджагъым! РАББИ-Тааля – кучюм, Онъа йырларым! О мени къуртарды!

³ Къуртулыш чокъракъларындан къуванчнен сув аладжакъсынъыз.

⁴ О куню бойле дейджексинъиз: – РАББИни макътанъыз! Адыны чагъырынъыз! Япкъан ишлери акъкъында халкъларгъа хабер этинъиз! Ады юдже олгъаныны акъылларына кетиринъиз!

⁵ РАББИге йырланъыз, О, аджайип ишлер япты! Бутюн дюнья бильсин буны!

⁶ Эй, Сион халкъы, къуванчнен къычырынъыз! Аранъыздаки булунгъан Исраильнинъ Азизи буюктир!