Ешая 10 - Мукъаддес Китап

¹ Адалетсиз къанунларны япкъанларгъа, акъсыз къарарларны чыкъаргъанларгъа беля!

² Сиз фукъарелерге адалет къыдырмагъа ёл бермейсинъиз, зулум тюбюнде къалгъан халкъымдан адалет къыдырмакъ акъкъыны тартып аласынъыз, тул къадынларнынъ мулькюни чекип аласынъыз ве оксюзлерни союндырасынъыз.

³ Рабби джезанен кельгенде, узакътан башынъызгъа беля тюшкенде, не япаджакъсынъыз? Ярдым сорап, кимге ялвараджакъсынъыз? Байлыгъынъызны къайда сакълайджакъсынъыз?

⁴ Бель букип, сюргюнликке кетеджексинъиз, ольдюрилип, ерге тюшеджексинъиз. Бундан сонъ да РАББИнинъ гъазабы тынмайджакъ, къолу эп бир узатылгъандыр.

Рабби Ашшурны суд эте

⁵ Ашшургъа беля! Оны, таякъны киби, къолумда тутам, ачувымда ве гъазабымда халкъларны джезалайым!

⁶ Оны имансыз миллетке, Мени ачувландыргъан халкъкъа къаршы ёллайджагъым; оны бутюнлей чайпамагъа, эр шейини тартып алмагъа, оны, сокъакътаки чамурны киби, таптамагъа буюраджагъым.

⁷ Амма Ашшур башкъа ишлерни япмагъа да тюшюнир, башкъа ниетлерининъ артындан кетер, чокъ миллетлерни де гъайып этип, ёкъ этмеге юрегинде истер.

⁸ – Башлыкъларымнынъ эписи падишалар киби дегиллерми? – дей.

⁹ – Къално ве Къаркемиш, Хамат ве Арпад, Самарие ве Дамаск – манъа эп бир!

¹⁰ Мен чокъ падишалыкъларны енъдим, оларнынъ путлары ве аллалары исе Ерусалимдеки ве Самариедекилерден буюк эдилер.

¹¹ Ерусалимни де айны ойле енъеджегим, Самариеге ве путларына япкъан шейлеримни онъа да япаджагъым.

¹² Рабби Сион дагъында ве Ерусалимде озь ишини битирген сонъ, Ашшурнынъ падишасыны къопай юреги ве юкъарыдан бакъкъан козьлери ичюн джезалайджакъ.

¹³ «Эр шейни къолумнынъ кучюнен яптым, акъыл-идрагъымнен къазандым, – деди падиша. – Мен акъыллым! Халкъларнынъ сынъырларыны ёкъ эттим, хазинелерини тартып алдым, кучьлю бугъа киби, тахтларында отургъанларны йыкътым.

¹⁴ Теректеки къуш ювасыны дайын, халкъларнынъ зенгинликлерини къолай таптым, ювадан йымырта алгъан киби, озюме бутюн топракъларны алдым. Къанат къыбырдаткъан, агъыз ачкъан, “ин” деген кимсе олмады».

¹⁵ Балтанен ишлеген адамгъа къаршы балта котерилип олурмы? Пычкъынен чалышкъан адамнынъ огюнде пычкъы макътанырмы? Таякъ оны котергенни саллармы? Сопа терек олмагъан адамны котерирми?

¹⁶ Шунынъ ичюн Рабби, Ордуларнынъ РАББИси, Ашшурнынъ кучьлю аскерлерини такъаттан тюшюрген хасталыкъкъа огъратаджакъ, онынъ шурети, атештен киби, янып битеджек.

¹⁷ Исраильнинъ Ярыгъы – атеш, онынъ Азизи – алев оладжакъ. Бир кунь ичинде Ашшурнынъ тикенли чалыларыны ве кийик отларыны якъып битиреджек,

¹⁸ шуретли орманыны ве багъчасыны бутюнлей ёкъ этеджек; падиша озю олюм алдындаки хаста киби оладжакъ.

¹⁹ Орманда къалгъан тереклери о къадар аз оладжакъ ки, уфакъ бала биле оларны сайып оладжакъ.

Къалгъан исраиллилер

²⁰ О куню сагъ къалгъан исраиллилер, Якъупнынъ къуртулгъан эвлятлары, оларны ургъангъа таянмайджакъ, амма РАББИге, Исраильнинъ Азизине, джан-юректен ишанаджакълар.

²¹ Сагъ къалгъанлар къайтаджакъ, Якъупнынъ къуртулгъан эвлятлары Кучьлю Аллагъа ялвараджакълар.

²² Эй, Исраиль! Халкъынъ денъиз къуму къадар чокъ олса да, Аллагъа тек бир къач адам къайтаджакъ! Къырылувынъ эвельден язылгъан, адалет эр тарафлама даркъалгъан.

²³ Ордуларнынъ РАББИ-ТААЛЯсы бутюн ер юзюнде эвельден тайинленген къырылувны толусынен этеджек.

Ашшурнынъ джезасы акъкъында

²⁴ Шунынъ ичюн Ордуларнынъ РАББИ-ТААЛЯсы бойле дей: – Эй, Сионда яшагъан халкъым! Ашшурдан къоркъманъыз! О, эвельден Мысыр киби, сени таякънен урар, сопасыны санъа къаршы котерир.

²⁵ Якъынларда гъазабым ятышаджакъ, ачувнен Ашшурны ёкъ этеджегим.

²⁶ Цур-Оревде мидьянлыларны ургъаны киби, Ордуларнынъ РАББИси Ашшурны да къамчынен ураджакъ. Мысырда япкъаны киби, О, буюк сувлар устюнден таягъыны котереджек.

²⁷ О куню омузларынъыздаки юк, бойнунъыздаки боюндырыкъ тюшеджек. Семиргенинъиз ичюн боюндырыгъынъыз къырыладжакъ.

²⁸ Олар Айят шеэрине кельдилер, Мигрондан кечтилер, Микмаста аш-сув запасларыны къалдырдылар.

²⁹ Озенни кечтилер, Гевада геджеледилер. Рама шеэри къоркъудан къалтырады, Шаулнынъ Гива шеэринде яшагъанлар къачты.

³⁰ Эй, Гъаллим халкъы, сесинъни котерип увулда! Эй, Лайша халкъы, динъле! Бичаре Анатот халкъы!

³¹ Мадмена халкъы чапып кетти, Гевим халкъы къачмагъа ашыкъты.

³² Бир кунь Нов шеэринде къалып, Сион дагъына, Ерусалим тёпелигине юмрукъ саллайджакъ.

³³ Мына, Рабби, Ордуларнынъ РАББИси дешетли кучюнен терек пытакъларыны къопараджакъ, узун бойлу тереклерни балталайджакъ, юкъары котерильгенлерни ерге йыкътыраджакъ,

³⁴ сыкъ орманларны демирнен кеседжек. Къудретли Алланынъ огюнде Ливан йыкъыладжакъ.