Энъ яхшы йыр 1 - Мукъаддес Китап

Севги шараптан яхшы

¹ Сулейманнынъ энъ яхшы йыры. – Опь мени, дудакъларынънен опь мени, чюнки севгинъ шараптан яхшы!

Къыз:

² Не де аджайип къокъуй мискълеринъ! Сенинъ адынъ – мискъ къокъусы киби! Къызлар бунынъ ичюн сени севелер.

³ Мени янынъа ал, кель ашыкъайыкъ! Эфендим мени озь одасына кирсетти! – Сеннен тааджипленип къуванайыкъ, севгинъни шараптан зияде юксельтейик. – Севги ичюн не къадар ляйыкъсынъ!

Къызлар: Къыз:

⁴ Эй, Ерусалимнинъ къызлары! Теним къара, лякин мен гузелим. Кедар огъулларынынъ чадырлары киби къарам, Сулейманнынъ перделери киби гузелим!

⁵ Эсмери олгъаныма бакъманъыз – кунеш мени къарартты. Агъаларым манъа ачувландылар, юзюм багъларыны къаравулламагъа мени къойдылар, амма озь юзюм багъымны сакълап оламадым.

⁶ Эй, джанымнынъ севгиси, айт манъа, къой-эчкилеринъни къайда отлатасынъ, уйледе къаерде раатланасынъ? Не себептен аркъадашларынънынъ айванлары янында кезинип, сени къыдырайым?

Къызлар:

⁷ – Эй, гузеллернинъ гузели, бильмесенъ, къойларнынъ изинден кет, чобанларнынъ чадырлары янында улакъларынъны отлат.

Огълан:

⁸ – Эй, ярем! Фыравуннынъ дженк арабасына екильген аткъа ошатам сени!

⁹ Янакъларынъ ильваннен, бойнунъ герданлыкъларнен не гузель!

¹⁰ Санъа кумюш пулларнен алтын ильван япаджакъмыз.

Къыз:

¹¹ – Падиша софра башына отургъанда, къыйметли нард ягъларымнынъ гузель къокъусы джайылды.

¹² Севгилим – кокюслерим арасында яткъан мюр толу бир кисе кибидир!

¹³ Севгилим – Эн-Геди юзюм багъларында бир топ къына чечеги кибидир!

Огълан:

¹⁴ – Ах, не гузельсинъ, ярем, не гузель! Козьлеринъ тамам гогерджин козьлери кибидир!

Къыз:

¹⁵ – Ах, не аджайипсинъ, севгилим, не татлысынъ! Ятагъымыз – ешилликтир.

Огълан:

¹⁶ – Эвимизнинъ дамы – кедр тереклеридир, таван агъачларымыз – кипарислердир.