Ехезкель 40 - Мукъаддес Китап

Янъы Сарай ичюн ер

¹ Сюргюн этильгенимизден сонъ 25-инджи йылында, йылнынъ башында, айнынъ онунджы куню, Ерусалим шеэри йыкъылгъандан сонъ 14-юнджи йылында, тамам шу куню РАББИнинъ къолу устюмде эди. О, мени анда кетирди.

² Меним руямда Алла мени Исраиль топрагъына кетирди ве пек юксек бир дагънынъ тёпесине къойды. Дагънынъ дженюбий этегинде шеэрге ошагъан биналар бар эди.

³ Алла мени анда кетирди. Шу ерде корюниши тунчкъа ошагъан бир адамны корьдим. Шу адам къапунынъ киришинде тура эди, къолунда кетен аркъан ве бир ольчю таягъы бар эди.

⁴ Адам манъа: – Инсан огълу! Козьлеринънен бакъ ве къулакъларынънен динъле, – деди. – Санъа косьтереджек шейлерге дикъкъат эт, сени мында, мен санъа эр шейни косьтерейим деп, кетирдилер. Бутюн корьгенлеринъни Исраиль халкъына айтып береджексинъ.

Тышкъы азбарнынъ шаркъ къапусы

⁵ Мен Сарайнынъ чевре-четиндеки диварны корьдим, дивар оны эр тарафтан сара эди. Адамнынъ къолунда учь бучукъ метр узунлыгъында ольчю таягъы бар эди. Адам диварны ольчеди. Диварнынъ къалынлыгъы бир ольчю таягъы, юксеклиги де бир ольчю таягъы эди.

⁶ Сонъ о, куньдогъуш тарафына чыкъкъан къапугъа кетти. Къапугъа басамакълардан котерилип, ольчю таягъынен къапу босагъасынынъ кенълигини ольчеди. Босагъанынъ кенълиги бир ольчю таягъынынъ узунлыгъында эди.

⁷ Къаравул одаларынынъ эр бирининъ узунлыгъы ве кенълиги бир ольчю таягъы эди. Одаларнынъ арасындаки диварларнынъ къалынлыгъы эки бучукъ метр эди. Аят янындаки къапунынъ босагъасы ички тарафтан бир ольчю таягъы кенълигинде эди.

⁸ Адам къапу янындаки аятны ичтен ольчеди. О, бир ольчю таягъынынъ узунлыгъында эди.

⁹ Сонъ о, къапу янындаки аятны ольчеди. О, дёрт метр эди, торецлернинъ кенълиги бирер метр эди. Къапу янындаки аят ичте эди.

¹⁰ Куньдогъуш тарафына чыкъкъан къапунынъ эр бир янында учер ода бар эди. Одаларнынъ эписи бир ольчюде эди. Одаларнынъ арасындаки торецлер де бир ольчюде эдилер.

¹¹ Адам къапунынъ кенълигини ольчеди. Къапунынъ кенълиги беш метр, ич аятнынъ кенълиги исе алты бучукъ метр эди.

¹² Аятнынъ эки тарафында ярым метр кенълигинде сынъыр бар эди. Аятнынъ эки тарафындаки одаларнынъ эр тарафы учь метр эди.

¹³ Сонъра о, киришлери къаршы-къаршы олгъан одаларнынъ арт диварларынынъ арасыны ольчеди. Бир дивардан экинджи диваргъадже 12,5 метр эди.

¹⁴ Сонъ о, аятнынъ узунлыгъыны ольчеди. 30 метр чыкъты. Азбар къапусынынъ эки колонналарыны да эки тарафтан ольчеди.

¹⁵ Къапу киришинден башлап, ич къапугъа, аятнынъ сонъуна къадар узунлыгъы 25 метр эди.

¹⁶ Къаравул одаларынынъ тышкъы диварларында, одаларнынъ арасындаки диварларда ве аятнынъ эр тарафында да пенджереге бенъзеген долафлар бар эди. Одаларны больген ве аяткъа бакъкъан торецлер пальма тереклерининъ ресимлеринен безетильген эди.

Тышкъы азбар

¹⁷ Адам мени тышкъы азбаргъа алып кирди. Анда одалар бар эди. Ерден юкъары япылгъан таш темелинде азбарнынъ этрафында 30 ода ерлеше эди.

¹⁸ Таш темели къапунынъ эки тышкъы тарафына къошула эди. Онынъ кенълиги къапуларнынъ узунлыгъынен бир эди. Бу – ашагъы темельдир.

¹⁹ Сонъра адам ашагъы къапусындан ички азбарнынъ тышкъы киришине къадар олгъан араны ольчеди. Бу ара эм шаркъта, эм шимальде 50 метр эди.

Шималь къапусы

²⁰ Сонъра о, тышкъы азбарнынъ шимальге бакъкъан къапусынынъ узунлыгъыны ве кенълигини ольчеди.

²¹ Эки янында къурулгъан учер къаравул одаларыны, эм де оларнынъ торецлерини ве аятны ольчеди. Олар биринджи къапунынъ ольчюсинен бир эди. Узунлыгъы 25 метр, кенълиги 12,5 метр эди.

²² Эм оларнынъ пенджереге бенъзеген долафлар, эм аят, эм пальмаларнынъ ресимлери куньдогъушкъа бакъкъан къапунен айны эди. Къапугъа еди басамакъ котериле эди, ве аят оларнынъ огюнде эди.

²³ Куньдогъушкъа бакъкъан къапунынъ къаршысында олгъаны киби, шимальге бакъкъан къапунынъ къаршысында да бир ички азбаргъа кирсеткен къапу бар эди. Тышкъы азбарнынъ къапусындан ички азбарнынъ къапусынадже 50 метр эди.

Дженюп къапусы

²⁴ Сонъра адам мени дженюп тарафкъа, дженюп къапусына алып барды. О, торецлерни ве аятны ольчеди. Оларнынъ ольчюси башкъаларынен айны эди.

²⁵ Аятнынъ эр янында чевре-четинде, башкъа къапуларнынъ янында олгъаны киби пенджереге бенъзеген долафлар бар эди. Аятнынъ узунлыгъы 25 метр, кенълиги 12,5 метр эди.

²⁶ Къапугъа еди басамакъ котериле эди, ве аят оларнынъ огюнде эди. Торецлерде бирер пальма тереклерининъ ресими бар эди.

²⁷ Ички азбарнынъ дженюп тарафындан да къапу бар эди. Тышкъы азбарнынъ дженюп къапусындан ички азбарнынъ дженюп къапусынадже 50 метр эди.

Ички азбарнынъ къапусы

²⁸ Сонъра адам мени дженюп къапудан ички азбаргъа кетирди ве къапуны ольчеди. Онынъ ольчюси де башкъаларынен айны эди.

²⁹ Къаравул одалары, торецлер ве аят айны ольчюде эди. Аятнынъ эр янында чевре-четинде пенджереге бенъзеген долафлар бар эди. Аятнынъ узунлыгъы 25 метр, кенълиги 12,5 метр эди.

^30-31 Аяты тышкъы азбаргъа бакъа эди. Торецлерде пальма ресимлери бар эди. Онъа секиз басамакъ котериле эди.

³² Сонъра бу адам мени куньдогъуш къапусындан ички азбаргъа алып барды. Бу къапунынъ ольчюси башкъаларынен айны эди.

³³ Къаравул одалары, одалар арасындаки диварлар ве аят айны ольчюде эди. Аятнынъ эр янында чевре-четинде пенджереге бенъзеген долафлар бар эди. Аятнынъ узунлыгъы 25 метр, кенълиги 12,5 метр эди.

³⁴ Аят тышкъы азбаргъа бакъа эди. Торецлерде эки тарафында да пальма ресимлери бар эди. Онъа секиз басамакъ котериле эди.

³⁵ Сонъра мени шималь къапусына алып барды. Оны ольчеди. Къапунынъ ольчюси башкъаларынен айны эди.

³⁶ Эм къаравул одалары, эм торецлер, эм аят, эм чевре-четлериндеки пенджереге бенъзеген долафлар айны эди. Узунлыгъы 25 метр, кенълиги 12,5 метр эди.

³⁷ Аят тышкъы азбаргъа бакъа эди. Торецлерде эки тарафында да пальма ресимлери бар эди. Къапугъа секиз басамакъ котериле эди.

Къурбанларны соймакъ ичюн одалар

³⁸ Къапунынъ аяты янында, аяткъа ачылгъан бир ода бар эди. Анда бутюнлей якъыладжакъ къурбанлар ювула эди.

³⁹ Къапу янындаки аятнынъ эки тарафында экишер маса бар эди. Масаларда бутюнлей якъыладжакъ къурбанларны, гуналар ичюн къурбанларны ве къабаатлар ичюн кетирильген къурбанларны соя эдилер.

⁴⁰ Аятнынъ тышы янында, шималь къапусы киришининъ янында, эки тарафында экишер маса бар эди.

⁴¹ Бойлеликнен, къапунынъ бир янында дёрт маса бар эди, ве къапунынъ башкъа янында дёрт маса бар эди. Эписи оларакъ, къурбанларны соймакъ ичюн секиз маса бар эди.

⁴² Бутюнлей якъыладжакъ къурбанлар ичюн дёрт маса ёнулгъан ташлардан ясалгъан эди. Эр бири метрнинъ дёртте учю узунлыкъта, метрнинъ дёртте учю кенъликте ве ярым метр юксекликте эди. Шу масаларгъа бутюнлей якъыладжакъ къурбанларны ве башкъа къурбанларны соймакъ ичюн керек алетлер къоюла эди.

⁴³ Этрафтаки диварларгъа ченгеллер асылгъан эди, эр бири авуч кенълигинде эди. Масаларгъа исе къурбан эти къоюла эди.

Руханийлернинъ одалары

⁴⁴ Ички къапуларнынъ тыш тарафында, ички азбарда эки ода бар эди. Бир ода шималь къапусынынъ янында олып, дженюпке бакъа; башкъа ода дженюп къапусынынъ янында олып, шимальге бакъа эди.

⁴⁵ Адам манъа шойле деди: – Дженюпке бакъкъан ода Сарайнынъ хызметинде булунгъан руханийлер ичюндир.

⁴⁶ Шимальге бакъкъан ода исе къурбан еринде хызмет эткен руханийлер ичюндир. Бу руханийлер – Цадокънынъ эвлятларыдыр. Левий союндан тек олар РАББИге хызмет этмек ичюн, Онъа якъынлашмакъ мумкюн эди.

⁴⁷ Сонъ адам азбарны ольчеди. Азбар дёрт кошели, 50 метр узунлыкъта ве 50 метр кенъликте эди. Къурбан ери Сарайнынъ алдында тура эди.

Алланынъ Сарайы

⁴⁸ Адам мени Сарай аятына кетирди ве аятнынъ торецлерини ольчеди. Эр эки тарафтан торецлернинъ кенълиги эки бучукъ метр эди. Киришнинъ кенълиги еди метр эди, эки тарафтаки диварларнынъ кенълиги бир бучукъ метр эди.

⁴⁹ Аятнынъ узунлыгъы он метр, кенълиги алты метр эди. Онъа он басамакъ котериле эди. Торецлернинъ янында колонналар бар эди, бириси киришнинъ бир янында, экинджиси исе экинджи янында эди.