Ехезкель 35 - Мукъаддес Китап

Эдом акъкъында пейгъамберлик

¹ РАББИ манъа шойле деди:

² – Инсан огълу! Юзюнъни Сеир дагъына чевир ве онъа къаршы пейгъамберлик эт.

³ Онъа бойле айт: РАББИ-ТААЛЯ шойле дей: Сеир дагъы, Мен санъа къаршым! Къолумны санъа къаршы узатаджагъым, сени бакъымсыз йыкътырылгъан ерлерге чевиреджегим.

⁴ Шеэрлеринъни харап этеджегим, ве сен бакъымсыз къаладжакъсынъ. О заман Мен – РАББИ олгъанымны билирсинъ.

⁵ Сен исраиллилерге даима душманлыкъ яптынъ, олар белягъа огърагъан вакъытта, джезалангъан вакъытта оларны къылычкъа бердинъ.

⁶ Шунынъ ичюн Мен Озюмнен ант этем, – дей РАББИ-ТААЛЯ. – Мен сенинъ къанынъны акъызаджагъым, къан тёкюв сенинъ артынъдан къуваджакъ. Сен къан тёкювден нефретленмегенинъ ичюн, къан тёкюв сенинъ артынъдан къуваджакъ.

⁷ Мен Сеир дагъыны бакъымсыз харабеге чевиреджегим, анда келип-кеткенни ёкъ этеджегим.

⁸ Сеир дагълыгъыны олюлерге толдураджагъым, байырларынъ ве вадийлеринъде, эр бир деренъде къылычтан ольгенлер йыкъылып ятаджакъ.

⁹ Сени эбедий сахрагъа чевиреджегим, шеэрлеринъде бир кимсе яшамайджакъ. О заман Мен – РАББИ олгъанымны билирсинъиз.

¹⁰ Сен: «Шу эки халкъ ве шу эки мемлекет менимки оладжакъ. РАББИ анда олса да, мен оларнынъ сабысы оладжагъым», – дегенинъ ичюн,

¹¹ Озюмнен ант этем, – дей РАББИ-ТААЛЯ, – халкъымны кореджек козюнъ олмагъаны ичюн, ачувынъа ве хиянетлигинъе коре сени джезалайджагъым. Мен сени суд эткенде, исраиллилерге Озюмни косьтереджегим.

¹² О заман сен билирсинъ ки, Мен, РАББИ, сенинъ Исраиль дагъларыны насыл мыскъыллагъанынъны, сенинъ: «Олар бакъымсыз олды, бизге ашамагъа берильдилер!» – айткъанынъны эшиттим.

¹³ Сизлер Меним огюмде макътандынъыз, Манъа къаршы чокъ лаф эттинъиз. Мен буны эшиттим.

¹⁴ Шунынъ ичюн РАББИ-ТААЛЯ шойле дей: Бутюн ер юзю къувангъанда, Мен сени бакъымсыз этеджегим.

¹⁵ Исраиль халкъынынъ топракъ пайы бакъымсыз ерлерге чевирильгенде, сен пек къувандынъ. Шунынъ ичюн Мен санъа ойле де япаджагъым. Эй, Сеир дагъы ве бутюн Эдом! Сен бакъымсыз оладжакъсынъ. О заман адамлар Мен – РАББИ олгъанымны билирлер.