Ехезкель 32 - Мукъаддес Китап

Фыравун акъкъында агълав

¹ 12-нджи йылы, 12-нджи айнынъ биринджи кунюнде РАББИ манъа шойле деди:

² – Инсан огълу! Мысыр падишасы фыравун акъкъында агъла ве онъа бойле айт: – Сен халкъларнынъ арасында озюнъни арслан деп сайдынъ. Озюнъ исе денъиз джанаварына ошайсынъ. Сен озенлеринъде бир тарафтан экинджи тарафкъа атыласынъ, аякъларынънен сувларны булатасынъ, озенлерини буландырып таптайсынъ.

³ Шунынъ ичюн РАББИ-ТААЛЯ шойле дей: – Чокъ халкъларны топлап, Мен устюнъе агъ атаджагъым, ве олар сени Меним агъымнен чекип чыкъараджакълар.

⁴ Сени ерде къалдыраджагъым, ачыкъ чёль ортасына атаджагъым. Мен чешит къушларгъа устюнъе къонмагъа, тюрлю айванларгъа сени ашап тоймагъа ёл береджегим.

⁵ Этинъни дагъларда джайратаджагъым, къалгъан кесеклеринънен вадийлерни толдураджагъым.

⁶ Тап дагъларгъа къадар къанынънынъ акъымларыны ичмеге ерге береджегим, дерелер сенинъ къанынънен толаджакъ.

⁷ Мен сени сёндюрген вакъытта коклерни къара япаджагъым, къаранлыкъ йылдызларны къапатаджакъ. Кунешни булутларнен орьтеджегим, ай да ярыкъ бермейджек.

⁸ Кокте нур сачкъан бутюн ай-йылдызларны устюнъде Мен къарартаджагъым, мемлекетинъе къаранлыкъ ёллайджагъым, – дей РАББИ-ТААЛЯ.

⁹ Мен сенинъ къалгъанынъны халкъларнынъ арасына, олар танымагъан мемлекетлерге сюргюн эткенимде, чокъ халкъларнынъ юреги къасеветке толаджакъ.

¹⁰ Падишаларнынъ огюнде къылычымны саллагъанымда, чокъ халкълар сенинъ ичюн къоркъаджакъ, падишаларынынъ отьлери сенинъ ичюн патлайджакъ. Сен йыкъылгъан куню оларнынъ эр бири джаны ичюн эр дакъкъасы титреп къалтырайджакъ.

¹¹ РАББИ-ТААЛЯ шойле дей: – Вавилон падишасынынъ къылычы сени ураджакъ.

¹² Кучьлю аскерлернинъ къылычларындан сенинъ ордуларынъ ерге йыкъыладжакъ. Халкъларнынъ арасында олар – энъ къоркъунчлыдыр. Олар Мысырнынъ гъурурыны таптайджакъ, ордуларыны ёкъ этеджеклер.

¹³ Бол сувларнынъ янында отлагъан Мысырнынъ айванларыны ёкъ этеджегим. Бир даа инсан аягъы я айван туягъы сувларны буландырмайджакъ.

¹⁴ Сонъра сувларны тындырып, озенлер зейтюн ягъы киби акъаджакъ, – дей РАББИ-ТААЛЯ.

¹⁵ – Мен Мысыр топрагъыны бакъымсыз сахрагъа чевиргенде, мемлекетни эр шейден бошаткъанда, анда яшагъанларнынъ эписини ёкъ эткенде, олар Мен – РАББИ олгъанымны анъларлар.

¹⁶ – Мына олар йырлайджакъ агълав тюркюси. Оны йырлап, халкъларнынъ къызлары Мысыр ве онынъ бутюн ордулары акъкъында агълайджакълар, – дей РАББИ-ТААЛЯ.

¹⁷ 12-нджи йылы, айнынъ 15-инджи кунюнде РАББИ манъа шойле деди:

¹⁸ – Инсан огълу! Мысыр халкъы ичюн агъла, оларны ве намлы халкъларнынъ къызларыны ашагъы дюньягъа, мезаргъа кеткенлернен берабер ат.

¹⁹ Оларгъа айт: «Сен кимден гузельсинъ? Ашагъы тюш де, сюннетсизлерге къошул».

²⁰ Мысыр халкъы къылычнен ольдюрильгенлернинъ арасына тюшеджек. Къылыч азыр – Мысырны бутюн ордуларынен берабер алып кетелер.

²¹ Энъ кучьлю аскерлер Мысыр акъкъында ве онъа къол туткъанлар акъкъында олюлер дюньясындан айтаджакъ: «Олар ашагъы тюштилер, энди шу сюннетсизлер къылычтан ольгенлернинъ янында яталар».

²² Ашшур да озюнинъ ордусынен анда. Онынъ чевре-четинде мезарлар. Оларнынъ эписи къылычнен ольдюрильди.

²³ Мезарлары олюм чукъурынынъ энъ терен еринде ерлеше. Ордусы мезарынынъ чевресинде ята. Оларнынъ эписи ольди, къылычнен ольдюрильди. Бир заманда олар тирилернинъ дюньясында олюм къоркъусыны сачкъан эди.

²⁴ Элам озь ордуларынен берабер онынъ мезары этрафында ята. Оларнынъ эписи ольген, къылычнен ольдюрильгендир. Сюннетсиз олып, олар ашагъы дюньягъа тюштилер. Бир заманда олар тирилернинъ дюньясында олюм къоркъусыны сачкъан эди. Энди олар масхара олып, олюм чукъурына тюшкенлерге къошулдылар.

²⁵ Эламгъа ольдюрильгенлер арасында ятакъ азырланды, онынъ ордулары да мезарынынъ чевресинде. Оларнынъ эписи сюннетсиз, къылычтан ольгенлер. Бир заманда олар тирилернинъ дюньясында олюм къоркъусыны сачкъан эди. Энди олар масхара олып, олюм чукъурына тюшкенлерге къошулды, ольдюрильгенлернинъ арасына къоюлдылар.

²⁶ Мешек, Тувал да анда, бутюн ордулары – оларнынъ мезарлары чевресиндедир. Оларнынъ эписи сюннетсиз, къылычнен ольдюрильген. Бир заманда олар тирилернинъ дюньясында олюм къоркъусыны сачкъан эди.

²⁷ Амма ольдюрильген сюннетсиз къараманларнынъ арасында олар ятмайлар. Къараманлар олюлер дюньясына дженк силяларынен тюшкен, къылычлары башлары тюбюне къоюлгъан, къалкъанлары да кемиклерининъ устюне къоюлгъандыр. Бир заманда олар къараманлар олып, тирилернинъ дюньясында олюм къоркъусыны сачкъан эдилер.

²⁸ Фыравун! Сен де къырыладжакъсынъ, сюннетсизлернинъ арасына къоюладжакъсынъ, къылычнен ольдюрильгенлернинъ арасында ятаджакъсынъ.

²⁹ Эдом да, падишалары ве ёлбашчылары да андалар. Не къадар джесюр олсалар да, къылычнен ольдюрильгенлернинъ арасындалар. Олар сюннетсизлернинъ ве мезаргъа тюшкенлернинъ янында яталар.

³⁰ Шималь ёлбашчыларынынъ эписи ве сидонлыларнынъ эписи де анда. Олар да ольдюрильгенлернен берабер мезаргъа тюштилер. Къоркъунчлы ве кучьлю олса да, масхара олдылар, сюннетсиз олып, ве къылычтан ольдюрильгенлернен яталар, олюм чукъурына тюшкенлернен берабер масхаралыгъыны ташыйлар.

³¹ Фыравун оларны корип, эм озю ичюн, эм къылычтан ольген ордусы ичюн теселли тападжакъ, – дей РАББИ-ТААЛЯ.

³² – Мен тирилернинъ дюньясында олюм къоркъусыны сачам. Фыравун ве онынъ ордулары сюннетсизлернинъ арасында, къылычнен ольдюрильгенлернинъ янында къоюладжакътыр, – дей РАББИ-ТААЛЯ.