Ехезкель 31 - Мукъаддес Китап

Ливан кедри

¹ 11-инджи йылы, учюнджи айынынъ биринджи кунюнде РАББИ манъа шойле деди:

² – Инсан огълу! Мысыр падишасы фыравунгъа ве онынъ ордуларына бойле айт: – Сен киби буюк ким бар?

³ Ашшургъа бакъ! О, Ливанда бир кедр тереги киби эди. Гузель даллы, япракълары кольгели ве юксек бойлу. Озь даллы тёпесинен булутларгъа узанды.

⁴ Оны сувлар беслеген, ерасты акъымы оны осьтюрген. Озенлер онынъ оськен ерининъ чевресинден акъа эди, башкъа дагъ тереклерини исе тек ирмакълар сувара эди.

⁵ Шунынъ ичюн о, дагъ тереклерининъ эписинден юксек олды. Сувнынъ боллугъындан даллары чокълашты, пытакълары узанды.

⁶ Кок къушларынынъ эписи онынъ пытакъларында ювалар яптылар. Тюрлю кийик айванлар даллары тюбюнде балаларыны догъдылар. Чешит чокъ сайылы халкълар онынъ кольгесинде яшадылар.

⁷ Юксек бойлу, узун даллы, о пек гузель эди. Тамырлары бол-бол сув ала эди.

⁸ РАББИнинъ багъчасындаки кедр тереклери онъа тенъ кельмеди: кипарислернинъ даллары онынъкилерине ошамады, платанларнынъ пытакълары да онынъкилери киби олмады. РАББИнинъ багъчасындаки тереклернинъ арасында о киби гузель терек ёкъ эди.

⁹ Мен оны сыкъ-сыкъ далларнен гузеллештирдим, РАББИнинъ багъчасындаки эписи Эдем тереклери оны куньлей эдилер.

¹⁰ Шунынъ ичюн РАББИ-ТААЛЯ шойле дей: О, юксек бойлу олгъаны ичюн, даллы тёпесинен булутларгъа узангъаны ичюн, юксеклигинден гъурургъа толгъаны ичюн,

¹¹ Мен оны мемлекетлерге башлыкъ эткен укюмдарнынъ элине бердим. Япкъан акъсызлыгъына коре о, акъкъыны алды. Мен оны четке атып ташладым.

¹² Халкъларнынъ арасында энъ къоркъунчлы олгъан ябанджылар оны кесип, дагъларгъа аттылар. Онынъ даллары эписи вадийлерге йыкъылып тюшти, пытакълары сынып, эписи дерелерге авдарылды. Ер юзюндеки бутюн халкълар онынъ талдасы тюбюнден чыкъып, оны ташлап кеттилер.

¹³ Онынъ авдарылгъан кевдесине чешит кок къушлары ерлешти, пытакълары арасында кийик айванлар яшай эди.

¹⁴ Шунынъ ичюн сувларнынъ янында оськен тереклер озь юксеклигинен макътанмасын, даллы тёпесинен булутларгъа узанмасын, сувларнен сувлангъан ич бир терек юксек олмасын. Оларнынъ эписи олюмге бериледжек, мезаргъа тюшкен инсан огъулларынен бирликте олар ернинъ терен чукъурына тюшеджек.

¹⁵ РАББИ-ТААЛЯ шойле дей: Кедр тереги олюлер дюньясына кеткен кунюни Мен агълав куню яптым. Мен ерасты теренликни къапаттым, озенлерни токътаттым, буюк сувларгъа акъмагъа ёл бермедим. Мен Ливангъа къаранлыкъ ёлладым, ве бутюн дагъ тереклери сарарды-солдылар.

¹⁶ Оны ерге тюшюргенде, йыкъылувынынъ гудюрдисинен Мен халкъларны титреттим. Олюлер дюньясына, мезаргъа кеткенлернинъ арасына оны тюшюргенде, ашагъы дюньяда эписи Эдем тереклери, Ливаннынъ энъ гузель, сув ичкен эписи яхшы тереклери къувандылар.

¹⁷ Онынъ кучю олгъан, онынъ кольгесинде яшагъан халкълар да онен берабер олюлер дюньясына, къылычнен ольдюрильгенлернинъ янына тюштилер.

¹⁸ Эдем багъчасындаки къайсы бир терекнинъ шан-шурети ве буюклиги сенинъкиге тенъ олур? Амма сен де, Эдем тереклери киби, ашагъы дюньягъа кетеджексинъ, сюннетсизлернинъ арасында ятаджакъсынъ, къылычтан ольгенлернинъ янында оладжакъсынъ. Фыравуннынъ ве ордуларынынъ сонъу бойле оладжакътыр, – дей РАББИ-ТААЛЯ.