Ехезкель 27 - Мукъаддес Китап

Тир шеэри акъкъында агълав

¹ РАББИ манъа шойле деди:

² – Инсан огълу! Тир акъкъында агълав тюркюси йырла,

³ денъиз киришинде ерлешкен, чокъ ялы халкъларнен алыш-вериш япкъан Тир шеэрине айт: РАББИ-ТААЛЯ шойле дей: – Эй, Тир, сен: «Меним гузеллигим къусурсыз», – дейсинъ.

⁴ Сенинъ кенарларынъ узакъкъа денъизнинъ ичине узаналар; къуруджыларынъ сенинъ гузеллигинъни даа гузель яптылар:

⁵ эписи тахталарынъны Сенир ардычларындан ясадылар, мачта япмакъ ичюн, Ливан кедрини алдылар,

⁶ Башан эменлеринден къайыкъ куреклерини яптылар, Киттим ялыларынынъ кипарислеринден геми когертесини ясадылар, фильтишнен донаттылар.

⁷ Елькенинъ ренкли Мысыр кетенинден тикильди, сени елькенлеринъден таный эдилер. Элиша ялыларындан мор ве мавылы къырмызы безлернен сенинъ устюнъни япа эдилер.

⁸ Сидонлылар ве арвадлылар сенинъ курекчилеринъ олды, сенинъ акъыллы усталарынъ, эй, Тир, гемиджилер эди.

⁹ Гивал шеэринден теджрибели усталар сенинъ тешиклеринъни къапата эдилер. Денъиздеки бутюн гемилер ве денъизджилер санъа мал алмакъ ичюн келе эдилер.

¹⁰ Фарс, Луд ве Пут мемлекетлеринден аскерлер сенинъ ордунъда хызмет эттилер, диварларынъа къалкъанларыны ве демир башлыкъларыны астылар, санъа шурет кетирдилер.

¹¹ Арвад ве Хелектен кельген адамлар эр ерде диварларынънынъ устюнде турдылар. Гъаммад адамлары къуллелеринъни къорудылар. Олар озь къалкъанларыны эр ерде диварларынъа астылар, гузеллигинъни къусурсыз яптылар.

¹² Сенинъ чешит тюрлю малынъ олгъаны ичюн, Таршиш шеэри сеннен алыш-вериш япты, сенинъ малларынъ ичюн кумюш, демир, къалай ве къуршун бере эди.

¹³ Яван, Тувал ве Мешек сеннен тиджарет япа эди. Олар сенинъ малларынъ ичюн санъа адамларнынъ джанларыны ве тунч шейлерини бере эдилер.

¹⁴ Бет-Тогъарма сакинлери сенинъ малларынъ ичюн атларны ве дженк атларыны, эм де къатырларны бере эди.

¹⁵ Дедан адамлары сеннен тиджарет яптылар, бир чокъ ялы халкълары сенинъ малларынъны сатын алдылар, малларынъ ичюн санъа фильтиш ве къара терек бере эдилер.

¹⁶ Сенинъ пек чокъ ве чешит малларынъ олгъаны ичюн, Арам сеннен тиджарет япты. О, сенинъ малларынъ ичюн карбункул ташларыны, мавылы къырмызы безлерни, ренкли кийимлер, индже кетен, мерджан ве къыйметли ташларны бере эди.

¹⁷ Ехуда ве Исраиль сеннен тиджарет эттилер. Олар сенинъ малларынъ ичюн Миннит богъдайыны, татлыларны, бал, зейтюн ягъы ве мелемлер бере эдилер.

¹⁸ Сенинъ чокътан-чокъ малларынъ ве буюк зенгинлигинъ бар олгъаны ичюн, Дамаск санъа Хелбон шарабы ве Цахар юнюни бере эди.

¹⁹ Ведан ве Узалдан Яван сенинъ малларынъ ичюн дёгюльген демир, кидда ве къокъулы къамышны бере эди.

²⁰ Дедан сенинъ малларынъ ичюн ат аркъасына япылгъан безлер бере эди.

²¹ Арабистан ве Кедар башлыкълары сеннен алыш-вериш яптылар, санъа къозуларны, къочкъарларны ве текелерни сата эди.

²² Шева ве Раама сатыджылары сеннен алыш-вериш япа эдилер. Олар сенинъ малларынъ ичюн чешит тюрлю къокъулы отларнынъ энъ яхшысыны, чешит тюрлю къыйметли ташларны ве алтын бере эдилер.

²³ Харан ве Къанне шеэрлери ве Эден ери, эм де Шевадан, Ашшурдан ве Килмаддан алыш-веришчилери сеннен тиджарет яптылар.

²⁴ Олар сенинъ базарларынъда паалы кийимлерни, мор ве орьнекли безлерни, ренкли килимлерни ве къатты орюльген йиплерни сата эдилер.

²⁵ Таршиш гемилери сенинъ малларынъны ташыдылар. Денъизлер арасында сен чокъ байлыкъкъа толдынъ, буюк намнен агъыр олдынъ.

²⁶ Курекчилеринъ сени ачыкъ денъизге чыкъарды. Амма куньдогъуш ели денъизнинъ арасында сени парчалады.

²⁷ Сен къазагъа огърайджакъ куню зенгинлигинъ, малларынъ ве барлыгъынъ, денъизджилеринъ ве геми айдавджыларынъ, тешик къапаткъанларынъ, туджджарларынъ ве эписи кучьлю аскерлеринъ, – сенинъ эписи олгъанларынъ денъизнинъ теренлигине батаджакъ.

²⁸ Геми айдавджыларнынъ къычыргъанындан ялылар титрейджек.

²⁹ Курекчилер гемилерден тюшеджек, денъизджилер ве геми айдавджылары ялыда тураджакъ,

³⁰ сенинъ акъкъынъда юксек сеснен агълайджакълар, аджынып ынъранаджакълар. Башларына куль сепип, топракъта юварланаджакълар.

³¹ Олар сенинъ ичюн башларыны тыраш этеджеклер, чувалдан япылгъан урбаларны киеджеклер, аджджы козьяшлар тёкип, юреклери сызлап, сенинъ акъкъынъда агълайджакълар.

³² Къаарь-къасевет ичинде, агълав йырыны сёйлейджеклер ве: «Ким, Тир киби, денъиз арасында гъайып олды? – деп, сенинъ акъкъынъда агълайджакълар.

³³ – Малларынъ денъизден кельгенде, сен бир чокъ халкъларны тойдура эдинъ. Байлыгъынънынъ ве малларынънынъ чокълугъынен сен дюнья падишаларыны зенгинлештирдинъ.

³⁴ Энди исе денъизнинъ теренлигинде дарма-дагъын олдынъ, малларынъ ве сенинъ аранъдаки эписи адамлар денъизнинъ тюбюне батты.

³⁵ Ялыларда яшагъанларнынъ эписи сенинъ такъдиринъе шашты-къоркътылар. Падишаларынынъ отьлери патлады, юзьлери акъ кесильди.

³⁶ Халкъларнынъ сатыджылары шашкъанларындан сызгъырырлар. Сенинъ сонъунъ къоркъунчлы олды, бир даа сен олмайджакъсынъ».