Ехезкель 24 - Мукъаддес Китап

Къазан акъкъында икяе

¹ Докъузынджы йылы, онунджы айнынъ онунджы куню РАББИ манъа шойле деди:

² – Инсан огълу! Бу кунни, бугуньки куннинъ адыны яз. Бу куню Вавилон падишасы Ерусалимни алкъагъа алды.

³ Бу инат халкъкъа шу икяени айтып бер. Оларгъа айт: РАББИ-ТААЛЯ шойле дей: Къазанны алып къой, ичине сув толдур.

^4-5 Энъ яхшы къойларны алып сой, къазаннынъ ичине эт къой, энъ яхшы этни – арт аякъ ве курегини къой, энъ яхшы кемиклернен оны толдур. Къазаннынъ тюбюне одун къой. Къазан яхшы къайнасын, кемиклер анда пишсин.

⁶ РАББИ-ТААЛЯ шойле дей: Къан тёккен шеэрге беля олсун! Бу къазан тотлангъан, тоттан темизленмеген къазан! Оны бошатынъыз, этни кесек-кесек ичинден чыкъарынъыз, джереп чекменъиз.

⁷ Онынъ ичинде къан тёкюльди. Бош къаяда къан тёкюльди. Оны топракъ олмагъан ерде тёктилер, шунынъ ичюн топракъ оны къапаталмады.

⁸ Ачувымны алевлендирмек ичюн, акътыманымны алмакъ ичюн, Мен къанны бош къаяда къалдырдым, оны гизлемеге мумкюн олмасын деп.

⁹ Шунынъ ичюн РАББИ-ТААЛЯ шойле дей: Къан тёккен шеэрге беля олсун! Мен атеш якъмакъ ичюн, чокъ одун къояджагъым.

¹⁰ Чокъча одунларны топла, атешни якъ, этни яхшы пишир. Ягъы къайнап битсин, кемиклер къавурылып, янсынлар.

¹¹ Сонъра бош къазанны комюрлер устюне къой, къазан къызсын, онынъ бакъыры къызарсын, ичиндеки кири ирисин, тоту исе янып битсин.

¹² Амма эписи эмегим бошуна кетти: къазаннынъ къалын тоту кетмеди, атеш биле оны темизлеп оламады.

¹³ Арамлыгъынъ пек буюк. Мен сени чокъ темизлей эдим, амма сен темизленмединъ. Энди Меним гъазабым санъа тюшип, ятышмагъандже, сен арамлыгъынъдан темизленип оламазсынъ.

¹⁴ Мен, РАББИ, буны айтам. Вакъыт якъынлаша, ве Мен буны япаджагъым. Энди Мен арткъа къайтмам, аджымам, пешман да этмем. Сен юрген ёлларынъа коре ве ишлеринъе коре джезаланаджакъсынъ, – дей РАББИ-ТААЛЯ.

Ехезкельнинъ апайынынъ олюми

¹⁵ РАББИ манъа шойле деди:

¹⁶ – Инсан огълу! Бакъ, сенинъ севимли кишинъни сенден хасталыкънен аладжагъым. Амма сен аджынма ве агълама, козьяш да тёкме.

¹⁷ Сесинъни чыкъармайып, яс тут, лякин дженазе адетлерини япма. Башынъа сарыкъ багъла, аякъкъапларынъны кий, мыйыгъынъны къапатма, ве адамлар санъа кетирген ашыны ашама.

¹⁸ Саба мен халкънен лаф эттим, акъшам исе апайым кечинди. Эртеси куню манъа буюрылгъаныны яптым.

¹⁹ Адамлар менден сорадылар: – Шу япкъанларынънынъ биз ичюн не манасы бар?

²⁰ Мен оларгъа бойле джевап бердим: – РАББИнинъ хабери манъа кельди.

²¹ РАББИ-ТААЛЯ Исраиль халкъына шойле дей: «Бакъ, Мен бойле япаджагъым ки, Меним Азиз Еримни, кучюнъизнинъ къуванчыны, козь бебегинъизни, джанларынъызнынъ севинчини арамлайджакълар. Сизлерде къалгъан огъулларынъыз ве къызларынъыз исе къылычтан оледжеклер».

²² О вакъыт сизлер мен япкъаным киби япаджакъсынъыз. Агъызларынъызны къапатмайджакъсынъыз, биревлернинъ ашларыны ашамайджакъсынъыз.

²³ Башларынъызда сарыкълар, аякъларынъызда аякъкъаплар оладжакъ. Сиз аджынмайджакъсынъыз ве агъламайджакъсынъыз, амма озь гуналарынъыз ичюн азып-тозаджакъсынъыз, бир-биринъизнинъ огюнде ынъранаджакъсынъыз.

²⁴ «Ехезкель сизге бельги олсун: сиз онынъ япкъаны киби япаджакъсынъыз. Буларнынъ эписи олып кечкен сонъ, Мен – РАББИ-ТААЛЯ олгъанымны биледжексинъиз».

²⁵ Сен исе, инсан огълу, бекле. Мен оларнынъ къалесини, къуванчыны ве шуретини, козь бебеклерини ве джанларынынъ севинчи олгъан огъулларыны ве къызларыны тартып алгъан куню

²⁶ сагъ къалгъан санъа келип, хабер кетиреджек.

²⁷ О куню, сагъ къалгъан санъа кельген вакъытта, сен лаф этип башлайджакъсынъ, бир даа индемейип отурмайджакъсынъ, ве сен оларгъа бир бельги оладжакъсынъ. О заман Мен – РАББИ олгъанымны биледжеклер.