Ехезкель 18 - Мукъаддес Китап

Догъру киши яшайджакъ

¹ РАББИ манъа шойле деди:

² – Исраиль мемлекетинде не ичюн бойле сёзлерни айтасынъыз: «Бабалар экши юзюм ашады, балаларынынъ исе тишлери къамашты»?

³ Озюмнен ант этем, – дей РАББИ-ТААЛЯ, – эндиден сонъ бу сёзлерни Исраиль топрагъында айтмайджакъсыз.

⁴ Мына, эр бир джан Менимкидир: бабанынъ джаны да, огъулнынъ джаны да – Менимкидир. Гуна япкъан джан оледжектир.

⁵ Эгер бирде-бир инсан инсафлы яшаса, адалетли ве акълы ишлер япса,

⁶ дагъларда путларгъа кетирильген къурбанларны ашамаса, Исраиль халкъынынъ путларына ибадет этмесе, башкъасынынъ апайына токъунмаса, озь апайына устю кирленген вакъытта якъынлашмаса,

⁷ кимсени хорламаса, онъа борджлу олгъангъа залогыны къайтарып берсе, кимсени чайпамаса, отьмегини ачларгъа берсе ве чыплакъларны кийиндирсе,

⁸ файдасы ичюн параны бермесе, параны бергенде исе, фаиз истемесе, акъсыз ишлерни япмаса ве давалашкъан адамларны адалетли суд этсе,

⁹ Меним низамнамелеримни тутса ве къарарларымны гъайретнен беджерсе, бойле киши догърудыр, шубесиз, о киши яшайджакъ, – дей РАББИ-ТААЛЯ.

¹⁰ Амма эгер шу адамнынъ огълу ёлбасар олса, башкъасынынъ къаныны тёксе ве башкъа бойле ярамазлыкъ япса

¹¹ (бабасы исе ойле ишлер япмагъан олса да): дагъларда путларгъа кетирильген къурбанларны ашаса, башкъасынынъ апайына токъунса,

¹² фукъаре ве ёкъсулларны хорласа, бирини таласа, онъа борджлу олгъангъа залогыны къайтарып бермесе, путларгъа ибадет этсе, пис шейлер япса,

¹³ файдасы ичюн параны берсе, параны бергенде де, фаиз истесе, – бойле инсан яшармы? Ёкъ! Бойле пис шейлерни япкъан эр бир инсан мытлакъа оледжек. Олюминде о, озю къабаатлы оладжакъ.

¹⁴ Амма адамнынъ огълу бабасынынъ эписи япкъан гуналарыны корьсе, лякин бу гуналарнынъ ич бирисини япмаса:

¹⁵ дагъларда путларгъа кетирильген къурбанларны ашамаса, Исраиль халкъынынъ путларына ибадет этмесе, башкъасынынъ апайына токъунмаса,

¹⁶ кимсени хорламаса, онъа борджлу олгъандан залог алмаса, кимсени таламаса, отьмегини ачларгъа берсе ве чыплакъларны кийиндирсе,

¹⁷ фукъаренинъ джаныны агъыртмаса, файдасы ичюн параны бермесе, параны бергенде исе, фаиз истемесе, Меним къарарларымны беджерсе ве низамнамелеримни тутса, – ойле инсан бабасынынъ гуналары ичюн ольмейджек. Шубесиз, о киши яшайджакъ.

¹⁸ Онынъ бабасы исе, башкъаларны хорлагъаны, къардашларыны чайпагъаны ве халкъынынъ арасында ярамайлыкъ япкъаны ичюн, озюнинъ гуналары ичюн оледжек.

¹⁹ Сиз: «Нечюн огъул бабасынынъ гунасы ичюн джевапкяр дегиль?» – деп сорарсынъыз. Чюнки бу огъул адалетли ве догъру ишлер япа ве Меним эписи низамнамелеримни беджерип тута. Бойле адам мытлакъа яшайджакъ.

²⁰ Гуна япкъан адам исе оледжек. Огъул бабасынынъ къабааты ичюн джевапкяр олмаз, ве баба да огълунынъ къабааты ичюн джевапкяр олмаз. Догъру кишининъ догърулыгъы онен къаладжакъ, яман кишининъ яманлыгъы исе ондан кечмейджек.

²¹ Лякин яманлыкъ япкъан киши эписи гуналарындан чевирильсе ве Меним эписи низамнамелеримни тутса, адалетли ве догъру шейлерни япып башласа, о, мытлакъа яшайджакътыр. Бу киши ольмейджек.

²² Онынъ эр бир япкъан акъсызлыгъы унутыладжакъ. Онынъ япкъан догърулыгъы ичюн о, яшайджакъ.

²³ Мен яман бир кишининъ олюмини истейимми, аджеба? – дей РАББИ-ТААЛЯ. – Ёкъ, Мен онынъ ярамай ёлундан чевириледжегини ве яшайджагъыны истейим.

²⁴ Амма догъру киши догърулыгъыны ташлап, акъсыз ишлерни япса, яман адамнынъ япкъан эписи пис ишлерини япып башласа, ойле киши яшармы? Онынъ япкъан эр бир догъру иши унутыладжакъ. Япкъан акъсыз ишлери ве гуналары ичюн о, оледжек.

²⁵ Сизлер: «Раббининъ ёлу догъру дегиль», – дерсинъиз. Эй, Исраиль халкъы, динъле! Меним ёлум догъру дегильми? Сизлернинъ ёлларынъыз догъру дегиль!

²⁶ Эгер догъру киши догърулыгъыны ташласа ве адалетсиз ишлер япып, ольсе, озюнинъ адалетсиз ишлери ичюн оледжектир.

²⁷ Лякин яман бир киши яманлыгъындан чевирильсе ве адалетли ве догъру ишлерни япып башласа, бу киши джаныны къуртараджакъ.

²⁸ Озюнинъ япкъан эписи акъсызлыкъларыны корип, олардан вазгечсе, о, шубесиз, яшайджакъ. О киши ольмейджек.

²⁹ Исраиль халкъы исе: «Раббининъ ёлу догъру дегиль!» – дей. Эй, Исраиль халкъы, Меним ёлларым догъру дегильми? Сизлернинъ ёлларынъыз догъру дегиль!

³⁰ Шунынъ ичюн, эй, Исраиль халкъы, Мен сизлерни суд этеджегим, эр биринъизни япкъан ишинъизге коре суд этеджегим, – дей РАББИ-ТААЛЯ. – Тёвбе этинъиз! Къабаатларынъыз сизни ёлдан урмасынлар деп, эписи акъсызлыкъларынъыздан вазгечинъиз.

³¹ Эписи япкъан акъсызлыкъларынъызны ташланъыз, озюнъизге янъы юрек ве янъы рух япынъыз. Исраиль халкъы! Нечюн сиз ольмек керексиз?

³² Мен кимсенинъ олюмини истемейим, – дей РАББИ-ТААЛЯ. – Тёвбе этинъиз де яшанъыз!