Эфеслилерге 5 - Мукъаддес Китап

Ярыкъта омюр

¹ Шунынъ ичюн, севимли балалар олып, Алладан орьнек алынъыз,

² ве, Месих бизлерни севгени киби, сизлер де бойле севгинен яшанъыз. О бизлер ичюн Озюни бахшыш ве къурбан оларакъ, гузель къокъулы шей киби, Аллагъа берди.

³ Сизинъ аранъызда ороспулыкъ, ич бир пислик я да ачкозьлик тильге биле алынмасын, чюнки сиз азиз адамларсыз.

⁴ Булашыкъ, акъылсыз ве ахлякъсыз лаф сизге ярашмаз. Аксине, Аллагъа шукюр этинъиз.

⁵ Шуны билинъиз: ич бир ороспу, пис я да ачкозь адам (бойле адам – путпересттир) Месихнинъ ве Алланынъ падишалыгъында мирас алмайджакъ.

⁶ Ич кимсе сизлерни бош сёзлернен алдатмасын; бу шейлер ичюн сёз динълемегенлернинъ башына Алланынъ гъазабы келеджек.

⁷ Шу себептен оларгъа къошулманъыз.

⁸ Сиз бир вакъытлары къаранлыкъ эдинъиз, энди исе Раббиде ярыкъ олдынъыз. Ярыкъ балалары киби яшанъыз.

⁹ Ярыкънынъ мейвасы – эр бир яхшылыкъ, догърулыкъ ве акъикъаттыр.

¹⁰ Раббининъ разылыгъыны насыл тапмагъа бакъып огренинъиз.

¹¹ Къаранлыкънынъ мейвасыз ишлерине къошулманъыз, аксине, оларны ачыкъкъа чыкъарынъыз,

¹² чюнки оларнынъ гизли япылгъан шу ишлери акъкъында айтмагъа биле айыптыр.

¹³ Ачыкъкъа чыкъарылгъан эр шей ярыкънен ачыла,

¹⁴ чюнки эр ачылгъан шей – ярыкътыр. Шунынъ ичюн бойле айтылгъан: «Эй, юкълагъан, тур ве олюлерден котериль, ве Месих сени ярыкълатыр».

¹⁵ Шунынъ ичюн, насыл яшагъанынъызгъа дикъкъат этип бакъынъыз; акъылсызлар киби дегиль, акъыллы адамлар киби арекет этинъиз,

¹⁶ озь вакътынъызны бошуна кечирменъиз, чюнки биз яшаяткъан куньлер – яман куньлер.

¹⁷ Шунынъ ичюн, акъылсыз олманъыз, лякин Раббининъ истегени насыл олгъаныны анъланъыз.

¹⁸ Сархош олгъандже шарап ичменъиз; шу, бозукълыкъкъа алып бара. Аксине, Мукъаддес Рухкъа толунъыз,

¹⁹ зебурлар, макътав йырлары ве рухий тюркюлерни айтып, бири-биринъизнен лаф этинъиз, юреклеринъизде Раббиге йырланъыз ве макътавлар айтынъыз

²⁰ ве эр вакъыт, эр бир шей ичюн Раббимиз Иса Месихнинъ Адынен Алла Бабагъа шукюр этинъиз.

Акъайлар ве апайлар

²¹ Месихтен къоркъып, бири-биринъизге бойсунынъыз.

²² Апайлар, Раббиге киби, акъайларынъызгъа бойсунынъыз.

²³ Месих иманлылар джемиетининъ башы ве Озь беденининъ къуртарыджысы олгъаны киби, акъай да озь апайынынъ башыдыр.

²⁴ Иманлылар джемиети Месихке насыл бойсунса, апайлар да эр шейде озь акъайларына бойле бойсунсынлар.

²⁵ Акъайлар, Месих иманлылар джемиетини севгени киби, озь апайларынъызны бойле де севинъиз. О, Озюни джемиети ичюн берди.

²⁶ Оны сувнен ювып, Озь сёзюнен оны элялламагъа ве азиз этмеге,

²⁷ ве оны Озюне, иманлыларнынъ шуретли джемиети киби: лекесиз, бурюшиксиз, я да бунъа ошагъан эксикликсиз, азиз ве къабаатсыз косьтермеге ниетленди.

²⁸ Акъайларгъа апайларыны, озь беденлерини киби, севмеге керек. Озь апайыны севген озь озюни севе.

²⁹ Ич кимсе ич бир вакъыт озь беденинден нефрет этмеген. Аксине, оны бакъа ве къайгъыра. Месих де Озь иманлылар джемиетини бойле бакъа ве къайгъыра,

³⁰ чюнки биз – Онынъ беден къысымларымыз.

³¹ Шу себептен акъай, ана-бабасыны къалдырып, озь апайына япышаджакъ, ве олар экиси бир вуджут оладжакълар.

³² Бу сыр буюк; мен Месих ве иманлылар джемиети акъкъында айтам.

³³ Бойлеликнен, эр биринъиз озь апайларынъызны, озюнъизни киби, севинъиз. Апай исе озь акъайыны урьмет этсин.