Ёэль 3 - Мукъаддес Китап

Алла халкъларны суд эте

¹ Мына, о куньлерде ве о заманларда Ехуда ве Ерусалим халкъыны сюргюнликтен къайтараджагъым.

² Мен эписи халкъларны топлайджагъым ве Ехошафат вадийине алып кетиреджегим. Анда Мен оларны мирасым ичюн, Исраиль халкъым ичюн суд этеджегим, – олар Исраильни халкъларнынъ арасында дагъытты ве Меним топрагъымны пай этти.

³ Олар халкъымны джереп чекип болюштилер, яш огъланларны ороспуларгъа денъиштирдилер, яш къызларны шарапкъа саттылар ве сархошлангъандже ичтилер.

⁴ Эй, Тир ве Сидон шеэрлери, бутюн Фелестин виляетлери, Манъа япаджагъынъыз недир? Сиз Мени джезаламагъа истейсинъизми? Акъкъымны береджек оласынъызмы? Манъа япаджакъ олгъанларынъызны Мен тез ве къолайлыкънен башларынъызгъа тюшюреджегим.

⁵ Сиз алтынымны ве кумюшимни алдынъыз, энъ яхшы къыйметли шейлеримни сизинъ ибадетханелеринъизге кирсеттинъиз.

⁶ Ехудалыларны ве Ерусалим огъулларыны юнанларгъа саттынъыз, озь мемлекетинден оларны узакълаштырдынъыз.

⁷ Мына, Мен оларны сиз саткъан еринъизден къайтараджагъым, оларгъа япкъанларынъызны сизге япаджагъым.

⁸ Мен огъулларынъызны ве къызларынъызны ехудалыларгъа сатаджагъым, олар исе оларны узакъта яшагъан бир халкъкъа, шевалыларгъа сатаджакълар. Бу – РАББИнинъ айткъаныдыр.

⁹ Халкълар арасында буны илян этинъиз: Дженкке азырланынъыз! Батырларны котеринъиз! Эписи аскерлер кельсинлер, дженкке чыкъсынлар!

¹⁰ Сабан тишлеринъизден къылычларны япынъыз, пычакъларынъыздан мызракъларны ясанъыз. Къуветли олмагъан: «Мен – батырым!» – десин.

¹¹ Эй, къомшу халкълар, тез келинъиз, анда топлашынъыз! Я РАББИ! Батырларынъны алып кель!

¹² Халкълар чыкъсынлар ве Ехошафат вадийинде топлансынлар. Мен анда отураджагъым ве чевре-четтеки эписи халкъларны суд этеджегим.

¹³ Оракъларынъызны ишлетинъиз, – ашлыкъ пишти. Келинъиз, юзюмни басынъыз, – юзюм сыкъылгъан ерлер толу, шарап фычылары ташалар. Халкъларнынъ яманлыкълары пек буюк!

¹⁴ Укюм чыкъарылгъан вадийинде – адам сюрюлери, РАББИнинъ куню укюм чыкъарыладжакъ ерге якъынлашты!

¹⁵ Кунеш ве ай къарараджакъ, йылдызларнынъ парылдысы гъайып оладжакъ.

Алла Исраильни багъышлай ве акълай

¹⁶ РАББИ Сиондан гудюрдейджек, Ерусалимден сесини чыкъараджакъ. Коклер ве ер тепренеджек. Лякин РАББИ Озь халкъыны къорчалайджакъ, Исраиль огъулларына сакъланув ери оладжакъ.

¹⁷ О заман биледжексинъиз ки, Мен – РАББИм, сизинъ Алланъыз. Мен Сионда, азиз дагъымда ерлештим. Ерусалим шеэри азиз ер оладжакъ, чет адамлар бир даа оны таптамайджакъ.

¹⁸ О куню дагълардан юзюм шырасы тамлайджакъ, байырлардан сют акъаджакъ, Ехуданынъ эписи озенлери сувгъа толаджакъ. РАББИнинъ Эвинден бир чокъракъ чыкъаджакъ ве Шиттим вадийине сув береджек.

¹⁹ Амма Мысыр мемлекети къуру сахра оладжакъ, Эдом топрагъы бош чёльге чевириледжек, чюнки олар Ехуда огъулларыны чекиштирди, топракъларында къабаатсыз адамларнынъ къаныны тёктилер.

²⁰ Ехудалылар эбедий яшайджакъ, Ерусалим шеэри несильден несильге къаладжакъ.

²¹ Къан тёккенлери ве къабаатлы олгъанлары ичюн Мен оларны даа багъышламадым, лякин эписи бир Мен оларны багъышлайджагъым. Мен, РАББИ, Сионда булунам.