Джемаат башы 8 - Мукъаддес Китап

¹ Икметли адам ким экен? Шейлернинъ маналарыны ким анълатып олур? Икмет адамнынъ юзюни ачар, бет-сымасынынъ сертлигини йымшатыр.

Падишагъа итаат этюв акъкъында

² Падишанынъ сёзлерини ве Алланынъ огюнде берген антынъны тут.

³ Падишанынъ огюнден кетмеге ашыкъма ве яман ишке къошулма, чюнки падиша озь истеклерининъ эписини япып олур.

⁴ Падишанынъ сёзюнде кучь бар, онъа: «Недир сенинъ япкъанынъ?» – деп, ким айтып олур?

⁵ Онынъ эмирлерини беджерген бир беля корьмез, икметли адам онынъ вакътыны ве ёлуны билир.

⁶ Эр шейнинъ озь вакъты-саати бар, адамлар ичюн исе бу пек агъыр шейдир.

⁷ Кимсе келеджегини бильмез, ким кимге келеджегини бильдирип олур?

⁸ Кимсенинъ ельни бойсундырмагъа къувети ёкъ, олюм куню де онъа къатланмаз. Аскерни дженк вакътында йибермезлер, яманлыкъ да яман япкъанларны йибермез.

Яман ве инсафлы адамлар

⁹ Мен бунынъ эписини корьдим, ер юзюнде бутюн япылгъан шейлерни тюшюнип башладым. Базыда адам башкъа адамнынъ устюнден башлыкъ этип, онъа зарар кетирир.

¹⁰ Мен яман олгъанларны дефн эткенлерини корьдим. Олар азиз ерге келип къайткъан эди, ве шу шейни корьген шеэрде унутылгъан эди. Бу да бош.

¹¹ Яман ишлер тез суд этильмез. Бунынъ ичюн инсан огъуллары яманлыкъ япмагъа къоркъмаз.

¹² Гунакяр юз кере яманлыкъ япса да, узун омюр яшай. Амма мен билем ки, Алладан къоркъкъанларгъа, Оны къоркъып яшагъанларгъа яхшы олур.

¹³ Яман адамларгъа исе яхшы олмаз, олар Алладан къоркъмагъанлары ичюн, оларнынъ куньлери узун талда киби олмаз.

¹⁴ Бойле бош шей де бар дюньяда: инсафлынынъ башына инсафсызнынъ къазангъаны тюше, инсафсызгъа исе инсафлынынъ ишине ляйыкъ олгъаны тюше. Бу да бошуна.

¹⁵ Сонъ мен шенъликни макътадым, чюнки ер юзюнде адамлар ичюн ашап-ичип шенъленмектен яхшы шей ёкъ. Бу – Алла онъа ер юзюнде берген омрю девамында эткен заметлерининъ махсулыдыр.

¹⁶ Мен икметни анъламакъ ве ер юзюнде япылгъан ишлерни бакъмакъ ичюн, бутюн юрегимнен янаштым. Шу ишлери ичюн адамларнынъ козюне гедже-куньдюз юкъу кирмез.

¹⁷ Сонъ мен Алланынъ эписи ишлерини анъладым: адамлар ер юзюнде япылгъан ишлернинъ манасыны анълап оламазлар. Адам шуны анъламагъа не къадар тырышса-тырышсын, манасыны тапмаз. Икметли адам биле: «Буны билем!» – десе де, эписи бир манасыны тапалмаз о.