Джемаат башы 7 - Мукъаддес Китап

Яшайыш акъкъында тюшюнджелер

¹ Яхшы нам гузель мистен яхшыдыр. Олюм куню де догъгъан куньден яхшыдыр.

² Матем эвине бармакъ шенълик олгъан эвге бармакътан яхшыдыр, чюнки эр бир адамнынъ сонъу будыр. Сагъ олгъанлар шуны акъылларында тутсун.

³ Кедер кулькюден яхшыдыр, бет-сымадаки гъам юрек ичюн яхшы.

⁴ Икметлининъ юреги – матем эвинде, ахмакънынъ юреги исе – шенълик эвиндедир.

⁵ Икметли адамнынъ тенбиесини динълемек ахмакъларнынъ тюркюлерини динълемектен яхшыдыр.

⁶ Чюнки ахмакъларнынъ кулькюси къазан тюбюндеки чалы-чырпынынъ чытырдысы кибидир. Бу да бошуна!

⁷ Башкъаларынынъ джанларыны агъыртып, икметли адам ахмакъкъа айланыр, къапарлар да юрекни бозар.

⁸ Ишнинъ сонъу онынъ башындан яхшыдыр, ве сабырлы рух къопай рухтан яхшыдыр.

⁹ Рухунъ къызма табан олмасын, чюнки гъазап ахмакънынъ юрегинде яшай.

¹⁰ «Эвельки куньлер бугунькилеринден не ичюн яхшы олгъанлар?» – деп сорама. Бойле суаль бермеге икметлиге ляйыкъ дегиль.

¹¹ Мираснен икмет яхшыдыр, кунешни корьгенлер ичюн о файдалы.

¹² Икмет, пара киби, къорчалай, икмет онъа саип олгъанынынъ яшайышыны сакълай, ве бундадыр бильгининъ устюнлиги.

¹³ Алла япкъан ишлерине бакъ: Онынъ бир шейни къыйыш яраткъаныны ким догъурлап олур?

¹⁴ Яхшы куньлеринъде бахтлы ол, яман куньлеринъде исе буны тюшюн: эм яхшы, эм яман куньлерни Алла яраткъан, адам онынъ артындан не оладжагъыны бильмез.

¹⁵ Бош куньлеримде тюрлю шейлерни корьдим: инсафлы озь инсафлыгъында гъайып ола, инсафсыз исе озь инсафсызлыгъында узакъ омюр яшай.

¹⁶ Не зияде инсафлы, не де зияде икметли ол, не ичюн озюнъни ёкъ этесинъ?

¹⁷ Пек яман олма, ахмакълыкъкъа да урулма, вакъытсыз ольмек санъа керекми?

¹⁸ Биринджи огютни алып тут, экинджисини де къолунъдан йиберме. Алладан къоркъкъан адам экисини де тутар.

¹⁹ Икмет икметли адамгъа шеэрнинъ он акимдарындан чокъ кучь берер.

²⁰ Дюньяда тек яхшылыкъ япкъан ве асыл гуна къазанмагъан инсафлы адам ёкъ.

²¹ Эр бир айтылгъан сёзге къулакъ асма. Ёкъса, къулунъ сени яманлагъаныны эшитеджексинъ.

²² Сен де юрегинъде башкъаларыны чокъ яманлагъанынъны билесинъ де.

²³ Эр шейни икметнен сынадым, озюм икметли олмакъ къарарына кельдим, лякин икмет менден узакъ олды.

²⁴ Кечмиш узакътыр ве теренден-терендир, оны ким анълап олур?

²⁵ Икмет ве шейлернинъ манасыны тапмакъ, бильмек ве огренмек, яманлыкъ, ахмакълыкъ ве джаилликни анъламакъ ичюн юрегимнен берильдим.

²⁶ Мен буны таптым: авджынынъ тузагъына ошагъан къадын олюмден аджджыдыр. Юреги – авджынынъ къапкъаныдыр, къоллары – зынджырлардыр. Алланынъ огюнде догъру яшагъан ондан къуртулыр, гунакяр исе онынъ къолуна тутулыр.

²⁷ Джемаат Башы деди ки: «Сынай-сынай, шейлернинъ манасыны къыдырып, мен буларны таптым.

²⁸ Джаным къыдырып тапалмагъан шейлер булардыр: бинъде бир инсафлы акъай таптым, бир инсафлы апай исе тапалмадым.

²⁹ Ялынъыз бир шейни анъладым мен: Алла эписи адамларны догъру оларакъ яраткъан, амма олар чокъ шейлер къыдырып башладылар».