Джемаат башы 3 - Мукъаддес Китап

Эр шейнинъ озь вакъты-саати бар

¹ Эр шейнинъ озь вакъты-саати бар, ер юзюнде эр бир ишнинъ заманы келир:

² догъмакъ вакъты ве ольмек вакъты; сачмакъ вакъты ве сачылгъан шейни чыкъармакъ вакъты;

³ ольдюрмек вакъты ве тедавийлемек вакъты; йыкъмакъ вакъты ве къурмакъ вакъты;

⁴ агъламакъ вакъты ве кульмек вакъты; матем тутмакъ вакъты ве ойнамакъ вакъты;

⁵ ташларны дагъытмакъ вакъты ве оларны джыймакъ вакъты; къучакъламакъ вакъты ве къучакъламакътан къачынмакъ вакъты;

⁶ къыдырмакъ вакъты ве джоймакъ вакъты; сакъламакъ вакъты ве ташламакъ вакъты;

⁷ йыртмакъ вакъты ве тикмек вакъты; сусып отурмакъ вакъты ве айтмакъ вакъты;

⁸ севмек вакъты ве нефретленмек вакъты; дженк вакъты ве барышыкъ вакъты.

⁹ Чалышкъан адамгъа эткен заметинден не файда?

¹⁰ Мен, Алла адамларгъа огърашмакъ ичюн берген ишни корьдим.

¹¹ Алла яраткъан эр бир шей озь вакътында гузельдир. О, адамларнынъ юреклерине эбедийлик къойды, лякин башындан сонъунадже Онынъ ишлерине адамнынъ акъылы етмез.

¹² Яшайышларында шенъленмектен ве яхшылыкъ япмакътан гъайры адамлар ичюн яхшы шей олмагъаныны анъладым.

¹³ Эгер адам ашап-ичсе ве эр бир эткен заметинде яхшылыкъ корьсе, бу – Алладан бахшыштыр.

¹⁴ Алланынъ бутюн япкъанлары эбедий оладжагъыны да анъладым: онъа бир шей къошмагъа я да алып ташламагъа чаре ёкъ. Адамлар Алладан къоркъсунлар деп, О, бойле иш япа.

¹⁵ Эвель не олгъан олса, шимди де о, оладжакъ, илериде не оладжакъ олса, о, энди олгъан эди, ве Алла кечмишни къайтарыр.

Дюньядаки акъсызлыкъ акъкъында

¹⁶ Даа ер юзюнде мен адалет ерине акъсызлыкъ ве инсафлыкъ ерине акъсызлыкъ корьдим.

¹⁷ «Инсафлы да, инсафсыз да Алланынъ огюнде джевап береджек, – деп тюшюндим. – Эр ишнинъ озь вакъты-саати бар ве эр бир ишнинъ бакъыладжакъ вакъты бар».

¹⁸ «Инсан огъуллары акъкъында исе, Алла оларны сынасын да, олар айван олгъанларыны анъласынлар», – деп тюшюндим.

¹⁹ Инсан огъулларынынъ башына кельгени айванларнынъ да башына келир. Оларнынъ сонъу бир. Бири насыл ольсе, башкъасы да ойле оле. Нефес алгъанлары да бир. Адамнынъ айван огюнде бир устюнлиги ёкъ. Эр шей бош!

²⁰ Эписи бир ерге кете: эр бир шей топракътан кельген, топракъкъа да айланаджакъ.

²¹ Инсан огъулларынынъ руху тёпеге котерильгенини, айванларнынъ руху исе ашагъы тюшкенини ким бильсин?

²² Бойлеликнен, мен, адам ичюн озь япкъан ишлеринден зевкъ сюрмектен гъайры яхшы шей олмагъаныны анъладым. Бу онынъ къысметидир, чюнки ондан сонъ не оладжагъыны онъа ким косьтерип олур?