Даниял 2 - Мукъаддес Китап

Невукъаднеццарнынъ тюшю

¹ Экинджи йыл падишалыкъ эткенде, Невукъаднеццар тюшлер корьди. Онынъ юреги тарсыкъты, ве о, юкълап оламады.

² Падиша, онъа онынъ тюшлерини икяе этмек ичюн, эписи тылсымджыларны, фалджыларны, ырымджыларны ве къасдийлилерни чагъыртты. Олар келип, падишанынъ огюнде турдылар.

³ Падиша оларгъа: – Мен тюш корьдим, юрегим тарсыкъа, бу тюшнинъ манасыны бильмеге истейим, – деди. Къасдийлилер падишагъа арамий тилинде:

⁴ – Падиша! Эбедий яша! Къулларынъа тюшюнъни айт, ве биз онынъ манасыны тарифлермиз, – дедилер.

⁵ Падиша джевап берип, къасдийлилерге: – Сёзюм къатты. Эгер сизлер манъа тюшни ве онынъ манасыны айтмасанъыз, парча-парча кесиледжексинъиз, эвлеринъиз де кубре обалары олур.

⁶ Амма, эгер тюшюмни ве онынъ манасыны айтып берсенъиз, мен сизлерге бахшышлар, мукяфатлар ве буюк шерефлер багъышларым. Бойлеликнен, тюшни ве онынъ тарифини манъа айтып беринъиз, – деди.

⁷ Олар экинджи кере джевап берип: – Падиша озь къулларына тюшюни айтсын, ве биз онынъ тарифини берермиз, – дедилер.

⁸ – Ачыкъ-айдын билем ки, вакъыт созмагъа истейсинъиз, чюнки сёзюм къатты олгъаныны коресинъиз.

⁹ Сиз манъа тюшюмни айтып бермесенъиз, сизге тек бир джеза олур. Бир шей денъишмегендже, манъа ялан ве алдавны айтмагъа истейсинъиз. Тюшни манъа айтып беринъиз, ве о заман сиз манъа онынъ тарифини де айтып оладжагъынъызны билирим, – деп джевап берди падиша.

¹⁰ Къасдийлилер исе падишагъа джевап берип: – Падишагъа бу ишни ачып оладжакъ адам дюньяда ёкъ. Онынъ ичюн ич бир буюк ве кучь-къуветли падиша ич бир тылсымджыдан, фалджыдан ве къасдийлиден бунъа ошагъан бир шейни талап этмегендир.

¹¹ Падиша талап эткен иш ойле къыйын ки, адамларнен яшамагъан аллалардан гъайры бу тюшни падишагъа ич бир кимсе ачып оламай, – дедилер.

¹² Падиша бунъа гъазапланды ве пек ачувланды. О, Вавилондаки эписи акъыллы адамларны къырмагъа эмир этти.

¹³ Акъыллы адамларны ольдюрмек акъкъында эмир чыкъкъан сонъ, Даниялны ве онынъ учь достуны ольдюрмек ичюн къыдырып башладылар.

Алла тюшнинъ манасыны Даниялгъа ача

¹⁴ Падиша къаравулларынынъ башлыгъы Арьёкъ эди. О, Вавилондаки акъыллы адамларны ольдюрмеге чыкъты.

¹⁵ Даниял насиат ве акъылнен падишанынъ буюк адамындан Арьёкътан: – Не ичюн падиша бойле мераметсиз къарар чыкъарды? – деп сорады. О вакъыт Арьёкъ Даниялгъа бутюн ишни айтып берди.

¹⁶ Даниял падишагъа кирип, тюшнинъ тарифини айтмакъ ичюн озюне вакъыт бермеге риджа этти.

¹⁷ Сонъ Даниял эвине келип, достлары олгъан Хананья, Мишаэл ве Азарьягъа бутюн ишни айтып берди.

¹⁸ Олар Коктеки Алладан мерамет сорап башладылар, Алла бу сырны ачсын ве Даниял достларынен ве Вавилондаки башкъа акъыллы адамларнен берабер гъайып олмасын.

¹⁹ О геджеси сыр Даниялгъа руяда ачылды,

²⁰ ве Даниял Коктеки Аллагъа шукюр этип бойле деди: – РАББИнинъ Ады асырдан-асыргъа шан-шуретли олсун, чюнки акъыл ве къудрет Онынъкидир!

²¹ О, заман ве йылларны денъиштире, падишаларны алып ташлай ве тахткъа чыкъара, акъыллы адамларгъа – акъыл, бильгили адамларгъа – бильги бере.

²² О, сырлы ве гизли шейлерни ача, къаранлыкъта не олгъаныны биле, ярыкъ Онен яшай!

²³ Мен Санъа, баба-деделеримнинъ Алласына, шукюрлер ве макътавлар этем. Сен манъа акъыл ве къудрет берип, шимди Сенден сорагъанымызны ачтынъ. Сен бизге падишанынъ ишини ачтынъ!

Даниял тюшнинъ манасыны падишагъа анълата

²⁴ Бундан сонъ Даниял Арьёкъкъа кельди (падиша Арьёкъкъа Вавилоннынъ акъыллы адамларыны ольдюрмеге буюргъан эди). Онъа келип: – Вавилондаки акъыллы адамларны ольдюрме. Мени падишагъа кирсет, ве мен онъа тюшнинъ манасыны тарифлерим, – деди.

²⁵ Арьёкъ ашыкъып, Даниялны падишагъа алып кельди ве онъа: – Сюргюн этильген Ехуда огъулларындан мен падишагъа тюшнинъ манасыны тарифлеп олгъан бир адамны таптым, – деди.

²⁶ Падиша Белтешаццар адынен адланылгъан Даниялгъа: – Мен корьген тюшюмни ве онынъ тарифини сен манъа айтып олурсынъмы? – деди.

²⁷ Даниял падишагъа бойле джевап берди: – Падиша сорагъан сырны падишагъа не акъыллы адамлар, не фалджылар, не тылсымджылар, не де ырымджылар ачып оламазлар.

²⁸ Амма коклерде сырларны ачкъан Алла бардыр. О санъа, Невукъаднеццар падиша, ахыр заманда не оладжагъыны ачты.

²⁹ Сен тёшегинъде олгъанынъда, корьген тюшюнъ ве руяларынъ бойле эди: Сен, падиша, тёшегинъде яткъанда, не оладжагъыны тюшюне эдинъ. Сырларны ачкъан Алла не оладжагъыны санъа косьтерди.

³⁰ Бу сырны РАББИ манъа да ачты. Мен эписи адамлардан акъыллы дегилим. Амма сен, падиша, онынъ тарифини анъла деп ве не акъкъында тюшюнгенинъни биль деп, манъа бу сыр ачылды.

³¹ Санъа, падиша, бойле руя олды: Мына бир буюк пут. О пут балабан эди. О, сенинъ огюнъде пек парылдап тура эди. Онынъ корюниши къоркъунчлы эди.

³² Бу путнынъ башы темиз алтындан эди, онынъ кокреги ве къоллары – кумюштен, къурсагъы ве баджакълары – бакъырдан, балдырлары – демирден,

³³ аякъларынынъ табанлары исе – ярысы демирден, ярысы чамурдан япылгъандырлар.

³⁴ Сен онъа бакъкъанда, къолларнынъ ярдымы олмайып, дагъдан бир таш къопып путкъа урды, онынъ демир ве чамурдан япылгъан аякъларынынъ табанларыны парлады.

³⁵ О заман демир, чамур, бакъыр, кумюш ве алтын, – эписи бирден чиль-парча олдылар ве яз арманнынъ тозуна чевирильдилер. Оларны ель алып кетти. Олардан из биле къалмады. Путны парлагъан таш исе балабан дагъ олып, бутюн ер юзюни къаплады.

³⁶ Мына тюш! Энди падишагъа онынъ тарифини де айтайыкъ.

³⁷ Сен – падишасынъ, падишаларнынъ падишасысынъ! Коклердеки Алла санъа падишалыкъ, акимиет, къудрет ве шурет берди.

³⁸ О, даа эписи адам огъулларыны, къайда яшамасалар да, кийик айванларны ве кок къушларыны сенинъ къолунъа берди ве сени оларнынъ эписине акимдар этти. Бу алтын баш – сенсинъдир!

³⁹ Сенден сонъ сенинъ падишалыгъынъдан бетер олгъан башкъа падишалыкъ оладжакътыр. Сонъ даа учюнджи, бакъыр падишалыкъ бутюн дюньяда акимдарлыкъ этеджектир.

⁴⁰ Дёртюнджи падишалыкъ исе демир дайын къатты оладжакътыр. Демир эр шейни насыл парлап-парчаласа, о падишалыкъ да ойле эр шейни йыкъкъан демирге ошап, парчалайджакъ ве йыкъаджакътыр.

⁴¹ Ярысы бардакъ чамурындан, ярысы демирден олгъан аякъларынынъ табанларыны ве аякъ пармакъларыны корьгенинъ исе, о, болюнген падишалыкъ оладжакътыр. Сен бардакъ чамурынен къарыштырылгъан демир корьгенинъ киби, онда бираз демир къаттылыгъы оладжакътыр.

⁴² Аякъ пармакълары ярысы демирден, ярысы исе чамурдан олгъаны киби, падишалыкъ да ойле: ярысы къавий, ярысы морт оладжакътыр.

⁴³ Сен бардакъ чамурынен къарыштырылгъан демирни корьгенинъ исе – олар акъайнынъ урлугъынен, инсанлыкъ союнен къарышырлар, амма, демир чамурнен къарышып бирлешмегени дайын, бири-биринен бирлешмезлер демектир.

⁴⁴ О падишалыкъларнынъ заманларында Коклердеки Алла эбедиен йыкъылмайджакъ падишалыкъ къураджакътыр. Бу падишалыкъ башкъа халкъкъа кечмейджектир. О, эписи падишалыкъларны йыкъып гъайып этеджек, озю исе эбедий тураджакътыр.

⁴⁵ Бунынъ ичюн, къолларнынъ ярдымы олмайып, дагъдан бир таш къопып, демир, бакъыр, чамур, кумюш ве алтынны парчалагъаныны сен корьдинъ. Буюк Алла падишагъа келеджекте не оладжагъыны бильдирди. Тюш де догъру, тарифи де керчектир.

⁴⁶ О заман Невукъаднеццар падиша бет устюне йыкъылып, Даниялгъа урьмет косьтерди, эм де онъа бахшышларны ве къокъулы шейлерни кетирмеге эмир этти.

⁴⁷ Падиша Даниялгъа: – Сен бу сырны ачып олгъанынъ себебинден, керчектен сизинъ Алланъыз – аллаларнынъ Алласы, падишаларнынъ Раббисидир ве сырларны ачкъан Алладыр! – деди.

⁴⁸ Сонъ падиша Даниялны юксельтти ве онъа чокъ буюк бахшышлар берди. Оны бутюн Вавилон виляетине акимдар этип къойды ве эписи Вавилондаки акъыллы адамларгъа баш везир этип къойды.

⁴⁹ Даниял падишагъа риджа этти, ве падиша Шадракъны, Мешакъны ве Авед-Негоны Вавилон виляетининъ ишлерине башлыкъ этип къойды. Даниял исе падишанынъ сарайында къалды.