Даниял 1 - Мукъаддес Китап

Даниял Вавилонда

¹ Ехуда падишасы олгъан Ехояким учюнджи йыл падишалыкъ эткенде, Вавилон падишасы Невукъаднеццар Ерусалим янына келип, онынъ этрафыны сарды.

² Рабби онынъ къолуна Ехуда падишасы Ехоякимни ве Алла Сарайынынъ савутларындан бир къысмыны берди. Невукъаднеццар оларны Шинар ерине, озь алласынынъ сарайына ёллап, бу савутларны озь алласынынъ сарайындаки хазинесине кирсетти.

³ Падиша озь баш везири Ашпеназгъа: – Исраиллилерден, падиша ве мырза союндан олгъан орта яшлы огъланларны алып кель.

⁴ Оларда ич бир тюрлю вуджут къусурлыгъы олмасын. Олар дюльбер къыяфетли, эр бир бильгиге зийрек, илимлерни анълагъан, акъыл-идракълы олгъан ве падиша сарайында хызмет этмеге ляйыкъ олсунлар. Оларны къасдийлилернинъ китапларына ве тилине огрет, – деп эмир этти.

⁵ Падиша оларгъа озюнинъ софрасындан эр куньлюк ашны ве озю ичкен шарапны тайинледи. Эм де оларнынъ учь йыл тербиеленмелерини эмир этти. Учь йыл кечкен сонъ, олар падишагъа хызмет этмеге азыр олмакъ керек эдилер.

⁶ Оларнынъ арасында Ехуда огъулларындан Даниял, Хананья, Мишаэл ве Азарья бар эдилер.

⁷ Баш везир оларнынъ адларыны денъиштирди: Даниял – Белтешаццар, Хананья – Шадракъ, Мишаэл – Мешакъ ве Азарья – Авед-Него олдылар.

⁸ Даниял падишанынъ софрасындаки ашларнен ве падиша ичкен шарапларнен арамланмамагъа озь юрегинде къарар берди. Онынъ ичюн, арамланмамакъ ичюн, шуларны ашамамагъа баш везирден разылыкъ сорады.

⁹ Алла бойле этти ки, баш везир Даниялгъа мерамет ве урьметнен бакъа эди.

¹⁰ Баш везир Даниялгъа: – Сизге аш ве шарапны озю тайинлеген падиша-эфендимден къоркъам. Эгер о, бетлеринъиз акъранларынъыз олгъан огъланлардан арыкъча олгъаныны корьсе, падишанынъ огюнде мен башымнен джевап береджегим, – деди.

¹¹ Баш везир Даниялнынъ, Хананьянынъ, Мишаэлнинъ ве Азарьянынъ артындан бакъмакъ ичюн бир къаравул къойды. Даниял онъа:

¹² – Он кунь ичинде бизни, къулларынъызны, сына. Бизге ашамагъа емиш ве ичмеге сув берсинлер.

¹³ Сонъ бизим къыяфетимизге ве падишанынъ ашыны ашагъан огъланларнынъ къыяфетине бакъ. Сонъ кореджегинъе коре бизге яп, – деди.

¹⁴ Къаравул оларны динъледи ве он кунь сынады.

¹⁵ Он кунь кечкен сонъ исе, оларнынъ къыяфети ве вуджутлары падишанынъ ашыны ашагъан огъланлардан дюльбердже ве мазаллыджа эди.

¹⁶ О заман къаравул оларнынъ ашларыны ве ичмеге берильген шарапларыны озюне алып башлады, огъланларгъа исе емиш бере эди.

¹⁷ Алла бу дёрт огълангъа бильги, акъыл ве эр бир китапны анъламакъны берди. Даниялгъа исе даа тюрлю руя ве тюшлерни анъламакъны берди.

¹⁸ Падиша тайинлеген кунь кельген сонъ, баш везир огъланларны Невукъаднеццаргъа алып кельди.

¹⁹ Падиша оларнен лакъырды этти, ве эписи огъланлардан Даниялгъа, Хананьягъа, Мишаэлге ве Азарьягъа тенъ кельген огъланлар тапылмады. Сонъ олар падишагъа хызмет этмеге башладылар.

²⁰ Падиша олардан акъыл ве бильги керек олгъан эр бир иш акъкъында сорай эди, ве бутюн падишалыгъындаки эписи тылсымджылардан ве фалджылардан оларнынъ он къат акъыллы олгъанларыны коре эди.

²¹ Даниял Кореш падишанынъ биринджи йылынадже ойле хызмет этти.