Чыкъыш 40 - Мукъаддес Китап

Мескеннинъ азиз этилюви

¹ РАББИ Мусагъа бойле деди:

² – Биринджи айнынъ биринджи кунюнде Мескенни – Корюшюв Чадырыны къой.

³ Анда Шаатлыкъ Сандыгъыны кирсетип къой, оны перденен къапат.

⁴ Сонъ столны кетирип, устюне эписи шейлерини къой. Къандильни кетирип, онынъ устюне лампатларыны къой.

⁵ Къокъулы отларны якъмакъ ичюн алтындан япылгъан ерни Шаатлыкънынъ огюнден къойып, Мескеннинъ къапусына пердени ас.

⁶ Сонъ айванларны бутюнлей якъмакъ ичюн къурбан ерини Мескеннинъ, Корюшюв Чадырынынъ къапусы огюнде къой.

⁷ Абдест алмакъ ичюн савутны Корюшюв Чадырынен къурбан ерининъ арасына къойып, ичини сувгъа толдур.

⁸ Азбарны безлернен къоралап, азбарнынъ къапусына пердени ас.

⁹ Якъыладжакъ ягъны алып, онен Мескенни ве ичинде олгъан эр бир шейини ягълап, оны ве онынъ эписи алетлерини айырып азиз эт. Сонъ о азизлик олур.

¹⁰ Айванларны бутюнлей якъмакъ ичюн къурбан ерини ве онынъ бутюн алетлерини ягълап, къурбан ерини айырып азиз эт. Сонъ къурбан ери улу азизлик олур.

¹¹ Абдест алмакъ ичюн савутны саджаягъынен ягълап, оларны айырып азиз эт.

¹² Харуннен огъулларыны Корюшюв Чадырынынъ къапусына кетирип, оларны ювундыр.

¹³ Харуннынъ устюне азиз урбаларыны кийдирип, оны ягънен ягълап, айырып азиз эт. О, руханий оларакъ Манъа хызмет этеджек.

¹⁴ Огъулларыны да кетирип, устьлерине руханийлик халатларыны кийдир.

¹⁵ Бабалары киби, оларны ягънен ягъла. Сонъ олар руханий оларакъ Манъа хызмет этеджеклер. Бойле этип, ягънен ягъланып, олар ве оларнынъ эвлятлары эбедиен руханий оладжакълар.

¹⁶ Муса, РАББИ онъа насыл эмир эткен олса, эписини ойле де япты.

¹⁷ Мысырдан чыкъкъанларына экинджи йылнынъ биринджи айындаки биринджи кунюнде Мескен къоюлгъан эди.

¹⁸ Муса Мескенни къойгъанда, темеллерини къойды, черчивелерини котерди, сырыкъларыны кечирди ве диреклерини къойды.

¹⁹ Сонъ Мескеннинъ устюнден орьтюни джайратты, орьтюлернинъ устюни, РАББИ эмир эткени киби, даа бир орьтюнен къапатты.

²⁰ Шаатлыкъны алып, Сандыкънынъ ичине къойды, Сандыкънынъ алкъаларындан сырыкъларны кечирди ве тёпесине къапакъ олгъан Мерамет Ерини къойды.

²¹ Сандыкъны Мескен ичине кирсетип ве оны къапаткъан пердени асып, РАББИ онъа эмир эткени киби, Шаатлыкъ Сандыгъыны къапатты.

²² Корюшюв Чадырында, Мескеннинъ шималь тарафында, перденинъ огюнде столны къойды.

²³ Столнынъ устюне, РАББИ онъа эмир эткени киби, Муса РАББИнинъ огюнде сыранен пителерни къойды.

²⁴ Сонъ Корюшюв Чадырында, Мескеннинъ дженюп тарафында, столнынъ къаршысында къандильни къойып,

²⁵ РАББИ эмир эткени киби, РАББИнинъ огюнде лампатларны къойды.

²⁶ Корюшюв Чадырында, перденинъ огюнден, алтындан япылгъан ерни къойып,

²⁷ РАББИ онъа эмир эткени киби, ернинъ устюнде мис къокъулы отларны якъты.

²⁸ Сонъ Корюшюв Чадырынынъ къапусына пердени асты.

²⁹ Айванларны бутюнлей якъмакъ ичюн къурбан ерини Мескеннинъ, Корюшюв Чадырынынъ къапусы огюне къойды ве, РАББИ онъа эмир эткени киби, онынъ устюнде айван къурбанларыны якъты ве ашлыкъ бахшышларыны кетирди.

³⁰ Корюшюв Чадырынен къурбан ерининъ арасында абдест алмакъ ичюн савутны къойып, ичини сувгъа толдурды.

³¹ О савуттан Муса, Харун ве онынъ огъуллары сув алып, къолларынен аякъларыны ювдылар.

³² РАББИ Мусагъа эмир эткени киби, Корюшюв Чадырына киргенде, къурбан ерине якъынлашкъанда, даима абдест ала эдилер.

³³ Сонъ Мескеннинъ ве къурбан ери азбарынынъ чевре-четини къоралады ве азбарнынъ къапусына перделерни асты. Бойле эттирип, Муса ишини битирди.

Мескен устюндеки булут

³⁴ Сонъ Корюшюв Чадырынынъ устюни булут сарды, ве Мескеннинъ ичини РАББИнинъ Шурети толдурды.

³⁵ Муса Корюшюв Чадырынынъ ичине кирип оламады, чюнки оны булут сарып алды, ве Мескенни РАББИнинъ Шурети толдурды.

³⁶ Исраиллилернинъ бутюн долашкъан вакъытларында, Мескеннинъ устюнден булут котерильгенде, олар ёлгъа чыкъа эдилер.

³⁷ Булут котерильмесе, олар, о, котерильмегендже, ёлгъа чыкъмай эдилер.

³⁸ Бутюн долашкъан вакъытларында, эписи исраиллилернинъ козю огюнде, Мескеннинъ устюнде куньдюз РАББИнинъ булуты, геджесинен исе атеши эди.