Чыкъыш 35 - Мукъаддес Китап

Раатлыкъ куню акъкъында эмир

¹ Муса бутюн Исраиль огъулларынынъ джемаатыны джыйып: – РАББИ мына нени япмагъа эмир этти:

² Алты кунь ишлеринъизни этинъиз, единджи кунюнъиз исе сизлерде мукъаддес, РАББИге багъышлангъан раатлыкъ куню олсун. Ким раатлыкъ куню иш япса, ольдюриледжек.

³ Раатлыкъ кунюнде, яшагъан ерлеринъизде атеш биле якъманъыз, – деди.

Алланынъ Мескени ичюн бахшышлар

⁴ Исраиль огъулларынынъ бутюн джемаатына Муса даа бойле деди: – РАББИнинъ эмир эткени мына:

⁵ РАББИге бахшышлар этинъиз. Эр биринъиз юрегинден къопкъан бахшышыны: алтын, кумюш, тунч,

⁶ мор, мавылы къырмызы, ачыкъ къырмызы юнь, индже ишленген кетен ве эчки юнюнден япылгъан безлерни,

⁷ къойларнынъ дибагъ этилип къырмызы ренкке боялангъан терилерини ве индже ишленген терилерни, акация тереклерини,

⁸ къандиль ичюн зейтюн ягъы, чешит тюрлю шейлерни ягъламакъ ичюн зейтюн ягъына къошулгъан гузель къокъулы шейлер ве къандиллерде якъмакъ ичюн зейтюн ягъына къошулгъан къокъулы отларны,

⁹ эфод ве кокректеки торба ичюн шохам деген къыйметли ташлар ве дигер, козьлерге къоюлгъан къыйметли ташларны РАББИге кетиринъиз.

Алланынъ Мескени ичюн эшьялар

¹⁰ Аранъызда олгъан яхшы усталар келип, РАББИнинъ эмир эткенлерини япсынлар:

¹¹ Алланынъ Мескенини, онынъ Чадырыны ве устюндеки орьтюсини, дёгмелерини, черчивелерини, сырыкъларыны, диреклерини, темеллерини;

¹² Сандыкъны сырыкъларынен, къапагъы олгъан Мерамет Ерини ве къапаткъан пердени;

¹³ столны сырыкъларынен ве алетлеринен берабер ве РАББИнинъ булунувыны косьтерген пителерни;

¹⁴ ярыкълатмакъ ичюн къандильни эписи алетлеринен, онынъ лампатларыны ве якъып ярыкълатмакъ ичюн зейтюн ягъыны;

¹⁵ къокъулы отларны якъмакъ ичюн ерни, онынъ сырыкъларыны, бир шей ягъламакъ ичюн зейтюн ягъыны, къокъулы ягъны, Мескеннинъ къапусына асыладжакъ пердени;

¹⁶ айванларны бутюнлей якъмакъ ичюн къурбан ерини, онынъ ичюн тунч пармакълыкъны ве онынъ сырыкъларыны эписи алетлеринен, савутны ве онынъ саджаягъыны;

¹⁷ азбарнынъ безлерини, онынъ диреклеринен темеллерини ве азбарнынъ къапусына асыладжакъ пердени;

¹⁸ Мескеннинъ къазычыкъларыны, азбарнынъ къазычыкъларыны ве оларнынъ йиплерини;

¹⁹ Мукъаддес Ерде ибадет этмек ичюн нагъышлангъан урбаларны, руханийликни беджермек ичюн баш руханий Харунгъа азиз урбаларны ве онынъ огъулларына да урбаларны япсынлар.

Халкънынъ бахшышлары

²⁰ Исраиллилернинъ бутюн джемааты Мусанынъ янындан кеттилер,

²¹ бу ишке къол тутмагъа юреги тарткъан ве джаны истеген эр ким келип, РАББИге Корюшюв Чадырынынъ эписи кереклеринен берабер ве эписи азиз урбалар ичюн олгъан бахшышларны кетирдилер.

²² Акъайларнен апайлар келип, юреклеринден къопкъан тюрлю алтын шейлерни: инелер, купелер, юзюклер ве боюнджакъларны кетирдилер. Эр кес РАББИге багъышлап алтын кетирди.

²³ Мор, мавылы къырмызы ве ачыкъ къырмызы юнь, индже ишленген кетен, эчки юнюнден япылгъан безлер, къойларнынъ дибагъ этильген ве къырмызы ренкке боялангъан ве индже ишленген терилери олгъан эр ким оларны РАББИге кетирдилер.

²⁴ Кумюш я да тунчны берип олгъан эр ким, оны РАББИге бахшыш оларакъ кетирди. Кимде акация тереги олса, эр ким оны Мескеннинъ чешит кереклиги ичюн кетирди.

²⁵ Эписи уста олгъан апайлар, озь къолларынен мор, мавылы къырмызы ве ачыкъ къырмызы юнни ишлеп ве индже ишленген кетенни токъуп, оларны кетирдилер.

²⁶ Апайлар усталыкънен джанлары истеген эчки юнюнден безлер яптылар.

²⁷ Башлыкълар шохам къыйметли ташларны ве эфоднен кокректеки торбанынъ юваларына къоюлгъан ташларны,

²⁸ къандиль ичюн, ягълайджакъ ягъ ичюн ве къокъулы ягъ ичюн гузель къокъулы шейлер ве зейтюн ягъыны кетирдилер.

²⁹ Бойлеликнен, эписи юреклери тарткъан исраилли акъайларнен апайлар, Муса ярдымынен РАББИ япмагъа эмир эткен эр бир ишке, озь истегинен даа чокъ бахшышлар РАББИге кетирдилер.

Мескенни донатмакъ ичюн сечильген усталар

³⁰ Сонъ Муса исраиллилерге бойле деди: – Бакъынъыз, РАББИ Ехуда къабилесинден Хурнынъ торуны, Урийнинъ огълу Бецалелни сайлап алды.

³¹ Оны Алланынъ Рухунен толдурды, онъа икмет, акъыл-ферасет, бильги берди ве эр бир ишни усталыкънен япмагъа огретти.

³² Онынъ ичюн о, планлар чызып, алтыннен, кумюшнен, тунчнен кереги киби чалышмагъа биле,

³³ ташларны кесип, юваларгъа къоймагъа ве эр бир иш ичюн агъач оймагъа да яхшы биле.

³⁴ РАББИ онъа ве Дан къабилесинден олгъан Охолиавнен Ахисамакъкъа башкъа адамларны огретмеге акъыл берди.

³⁵ РАББИ оларгъа чешит тюрлю ишлер япмагъа буюк усталыкъны берди, ве олар оймагъа, токъумагъа ве мор, мавылы къырмызы ве ачыкъ къырмызы юннен индже ишленген кетен устюнде нагъыш нагъышламагъа яхшы огрендилер. Олар тюрлю планлар чызып, чешит шейлерни усталыкънен япмагъа бильдилер.