Чыкъыш 26 - Мукъаддес Китап

Мескен акъкъында

¹ Мескенни он дане индже ишленген кетенден ве мор, мавылы къырмызы ве ачыкъ къырмызы юньден япылгъан безлерден яса. Оларнынъ устьлерине усталыкънен Керувларны нагъышла.

² Эр безнинъ узунлыгъы 14 метр олсун, кенълиги – эки метр. Эписи безлер бир ольчюде олсун.

³ Беш безни бири-бирине тиктир, къалгъан беш безни де бири-бирине тиктир.

⁴ Бири-бирине тикильген биринджи безлернинъ бир четинден мор безден ильмеклер яса, экинджи бири-бирине тикильген безлернинъ бир четинден де ойле яп.

⁵ Биринджи тикильген безлерге 50 ильмек яса, экинджи бири-бирине тикильген безлернинъ четине де 50 ильмек яса. Ильмеклер бири-бирине къаршы олмакъ кереклер.

⁶ 50 дёгмени алтындан япып, дёгмелернен безлерни бири-бирине дёгмеле де, бир бутюнлик олур.

⁷ Мескеннинъ устюни къапатмакъ ичюн, эчки юнюнден безлер яп. Безлер он бир дане олсун.

⁸ Бир безнинъ узунлыгъы 15 метр олсун, кенълиги эки метр – бу бир без. Эписи он бир безнинъ ольчюси бир олсун.

⁹ Беш безни бири-биринен айры тиктир, къалгъан алты безни де бири-бирине айры тиктир. Алтынджы безни экиге къатла, о, Мескеннинъ огюни къапатсын.

¹⁰ Безнинъ бир парчасыны башкъасынен багъламакъ ичюн, экисининъ четлеринде 50-шер ильмек яп.

¹¹ 50 дане тунч дёгме япып, оларны ильмеклерге кечир де, экиси бир бутюнлик олсун деп, безлернинъ эки парчасыны дёгмеле.

¹² Мескеннинъ арттаки диварындан асылгъан безнинъ бир къысмындан, четтеки безнинъ ярысы ерде ятсын.

¹³ Эчки юнюнден япылгъан без, ондан ашагъы олгъан индже ишленген кетенден япылгъан безден, Мескенни бутюнлей къапатмакъ ичюн, ярымшар метр асылгъан олсун.

¹⁴ Тёпесинден даа эки орьтю яп – бири къойнынъ дибагъ этилип къырмызы ренкке боялангъан терисинден, экинджи исе индже ишленген терилерден.

¹⁵ Мескен ичюн акация терегинден черчиве яса, олар догъру турсунлар.

¹⁶ Оларнынъ узунлыгъы беш метр, кенълиги – 0,75 метр олсун.

¹⁷ Эр бир черчивенинъ ашагъы къысмында эки багълама яп. Мескеннинъ эписи черчивелеринде ойле яп.

¹⁸ Мескеннинъ дженюбий тарафы ичюн 20 черчиве,

¹⁹ бу 20 черчиве тюбюне кумюштен япылгъан 40 темель яса: бир черчиве тюбюне эки темель, черчивенинъ эки багъламасы тюбюне бирер дане олсун.

²⁰ Мескеннинъ шималь тарафы ичюн де 20 черчиве яса.

²¹ Оларнынъ тюбюне де кумюштен япылгъан 40 темель яса: бир черчиве тюбюне эки темель, черчивенинъ эки багъламасы тюбюне бирер дане олсун.

²² Мескеннинъ арттаки дивары ичюн, гъарп тарафындан алты черчиве яса.

²³ Арттаки тарафынынъ кошелери ичюн даа эки черчиве яса.

²⁴ Черчивелер эки къатлы олмакъ керек. Оларнынъ тюплери бири-бирине багълансын, тёпелери бир алкъагъа багълансын, экиси ичюн ойле олсун. Олар эки кошеде турсунлар.

²⁵ Бойлеликнен, секиз черчиве олур, оларнынъ тюплерине де кумюштен япылгъан он алты темель яса: бир черчиве тюбюне эки темель олсун.

²⁶ Акация терегинден сырыкълар яса. Мескеннинъ бир тарафындаки черчивелери ичюн – беш сырыкъ,

²⁷ экинджи тарафындаки черчивелери ичюн – беш сырыкъ яса ве гъарпкъа бакъкъан арттаки тараф ичюн – беш сырыкъ яса.

²⁸ Ичеридеки сырыкъ черчивелерининъ орталарындан башындан сонъунадже кечеджек.

²⁹ Черчивелерини алтыннен къапла. Сырыкъларны кечирмек ичюн алкъаларны алтындан яп. Сырыкъларны алтыннен къапла.

³⁰ Мескенни санъа байырда косьтерильгени киби къой.

³¹ Мор, мавылы къырмызы, ачыкъ къырмызы юньден ве индже ишленген кетенден перде яп, онынъ устюне усталыкънен Керувларны нагъышла.

³² О пердени, акация терегинден ясалгъан, алтыннен къаплангъан, устьлеринде алтын ченгеллери олгъан ве кумюштен ясалгъан дёрт темель устюне тургъан дёрт дирек устюне ас.

³³ Пердени ченгеллерге ас, ве анда, онынъ артына, Шаатлыкъ Сандыгъыны кирсет. Перде Мукъаддес Ерни Энъ Мукъаддес Ерден айырыр.

³⁴ Энъ Мукъаддес Ерде тургъан Шаатлыкъ Сандыгъынынъ устюне Мерамет Ери олгъан къапакъны къой.

³⁵ Перденинъ огюнде столны ве столнынъ къаршысына къандильни къой. Къандильни Мескеннинъ дженюп тарафында, столны шаркъий тарафында къой.

³⁶ Мескеннинъ къапусы ичюн мор, мавылы къырмызы, ачыкъ къырмызы юньден ве индже ишленген кетенден нагъышлангъан перде яп.

³⁷ Перде ичюн алтын ченгеллерни ве акация терегинден беш дирек яса. Диреклерни алтыннен къапла ве оларнынъ тюбюне беш тунч темель яп.