Чыкъыш 18 - Мукъаддес Китап

Муса ве Йитро

¹ Мусанынъ къайнатасы Мидьяннынъ руханийи Йитро, РАББИ Мысырдан исраиллилерни алып чыкъкъанда, Муса ве Озюнинъ халкъы Исраиль ичюн эписи япкъан шейлери акъкъында эшитти.

² О заман Мусанынъ къайнатасы Йитро ондан эвель эвине къайтарылгъан Мусанынъ апайы Циппораны

³ ве онынъ эки огълуны озюне чагъыртты. Бирининъ ады Гершом эди, чюнки Муса: «Мен ябанджы ерде вакътынджа яшагъан адам олдым», – деди.

⁴ Экинджисининъ ады Элиэзер эди, чюнки Муса: «Бабамнынъ Алласы, манъа ярдымджы олып, мени фыравуннынъ къылычындан къорчалады», – деди.

⁵ Мусанынъ къайнатасы Йитро Мусанынъ апайы ве балаларынен сахрагъа, Алланынъ дагъы янында ордунен ерлешкен Мусагъа ёл алып,

⁶ бойле хабер ёллады: – Мен, къайнатанъ Йитро, сенинъ апайынъ, ве онен берабер эки огълунъ санъа келемиз.

⁷ Муса къайнатасыны къаршыламагъа чыкъты, онъа бель букти ве оны опьти. Бири-биринен сорашкъанларындан сонъ, олар чадыргъа кирдилер.

⁸ Муса къайнатасына Исраиль ичюн РАББИ фыравуннен ве эписи мысырлыларнен япкъанларыны икяе этти. Эм ёлда расткельген эписи къыйынлыкълар акъкъында ве РАББИ оларны фыравуннынъ ве мысырлыларнынъ къолларындан насыл къуртаргъаны акъкъында икяе этти.

⁹ Исраиллилерни мысырлылардан ве фыравуннынъ къолларындан къуртаргъанда, РАББИ исраиллилерге япкъан эйиликлерине Йитро къуванды

¹⁰ ве: – Сизни мысырлыларнынъ ве фыравуннынъ къолундан къуртаргъан ве бу халкъны мысырлыларнынъ укюминден азат эткен РАББИге бинъ шукюрлер олсун!

¹¹ Шимди мен билем ки, РАББИ эписи аллалардан буюк; О, бойле шейлер япып, исраиллилерни гъурурлы мысырлыларнынъ аллаларындан къуртарды, – деди.

¹² Сонъ Мусанынъ къайнатасы Йитро Аллагъа бутюнлей якъылгъан ве башкъа къурбанлар чалды. Алланынъ огюнде Мусанынъ къайнатасынен берабер аш ашамакъ ичюн, Харун ве Исраильнинъ акъсакъаллары кельдилер.

Йитронынъ меслеатлары

¹³ Айланыр куню Муса, халкъны суд этмек ичюн, отурды, ве халкъ Мусанынъ огюнде сабадан акъшамгъадже турды.

¹⁴ Мусанынъ къайнатасы Муса халкънен япкъанларынынъ эписини корип, ондан: – Сенинъ халкънен япкъанынъ недир? Не ичюн сен бутюн кунь отурасынъ, халкъ исе сенинъ огюнъде сабадан акъшамгъадже тура? – деп сорады.

¹⁵ – Халкъ манъа, Алланынъ ирадесини бильмек ичюн, келе, – деди Муса къайнатасына.

¹⁶ – Оларда насылдыр иш чыкъкъанда, олар манъа келелер. Мен даваларыны чезип, оларгъа Алланынъ низамнамелеринен къанунларыны огретем.

¹⁷ Мусанынъ къайнатасы: – Сенинъ япкъанларынъ яхшы дегиль, – деди.

¹⁸ – Сен озюнъни ве сеннен олгъан халкъны къыйнайджакъсынъ. Сен ичюн бу пек агъыр иш; оны бир озюнъ баш этамазсынъ.

¹⁹ Шимди айткъанларымны динъле, мен санъа акъыл огретейим, ве Алла сеннен олур. Халкъ ичюн Алланынъ огюнде араджы олып, Аллагъа оларнынъ даваларыны еткиз,

²⁰ оларгъа Алланынъ низамнамелерини ве къанунларыны, насыл яшамакъ ве насыл ишлер япмакъны огрет.

²¹ Озюнъе бутюн халкътан къабилиетли, Алладан къоркъкъан, ачкозь олмагъан ве адалетли адамларны сайлап ал да, оларны халкънынъ устюне бинъбашы, юзбашы, эллибашы ве онбашы оларакъ къой.

²² Олар даима халкънынъ даваларыны чезсинлер. Эр бир пек муим иш акъкъында сени хабердар этип, чезмесини санъа берсинлер, уфакъ-тюфек даваларны исе озьлери чезсинлер. Санъа къолайджа олур, ишнинъ агъырлыгъы оларгъа да тюшер.

²³ Бу – Алланынъ санъа эмири. Сен буны япсанъ, чыдап олурсынъ. Бутюн халкъ исе къанаатленип, озь ерине эсен-аман къайтыр.

²⁴ Муса къайнатасынынъ айткъанларыны динъледи ве онынъ эписи айткъанларыны япты.

²⁵ Бутюн Исраильден къабилиетли адамларны сайлады ве оларны халкънынъ башлыкълары этти, бинъбашы, юзбашы, эллибашы ве онбашы оларакъ къойды.

²⁶ Олар даима халкънынъ даваларыны чезе эдилер: муим ишлер акъкъында Мусагъа хабер этип, чезмесини онъа бере эдилер, уфакъ-тюфек даваларны исе озьлери чезе эдилер.

²⁷ Сонъ Муса къайнатасынен сагълыкълашты, ве къайнатасы озь топрагъына кетти.