Чыкъыш 17 - Мукъаддес Китап

Къаядан чыкъкъан сув

¹ РАББИнинъ эмиринен исраиллилернинъ бутюн джемааты Син сахрасындан чыкъып, озь ёлуны алдылар ве Рефидим деген ерде ордунен ерлештилер. Анда халкъкъа ичмек ичюн, сув ёкъ эди.

² Халкъ Мусанен къавгъа этип: – Бизге ичмеге сув беринъиз, – деди. Муса оларгъа: – Не ичюн сиз меннен къавгъа этесинъиз? Не ичюн РАББИни сынайсынъыз? – деди.

³ Анда халкъ сувсай эди ве Мусагъа къаршы шикяетленип: – Бизни Мысырдан неге алып чыкътынъ? Бизни, балаларымызны ве сюрюлеримизни сувсузлыкътан ольдюрмек ичюн алып чыкътынъмы? – дей эди.

⁴ Муса, ярдым сорап, РАББИге ялварды: – Бу халкънен мен не япайым? Даа бираз вакъыт кечсе, олар мени ташнен урарлар.

⁵ РАББИ Мусагъа: – Халкънынъ огюнден кеч. Янынъа Исраиль акъсакъалларындан бир къачыны ал. Нил дерьясына ургъан таягъынъны къолунъа алып кеч.

⁶ Иште, Мен алдынъа Хоревдеки къая устюнде турарым. Сен къаягъа урарсынъ, ве ондан сув чыкъар. Оны халкъ ичер, – деди. Исраиль акъсакъалларынынъ козьлери огюнде Муса ойле де япты.

⁷ О ернинъ адыны Масса ве Мерива къойдылар, чюнки исраиллилер, къавгъа этип: «Арамызда РАББИ бармы я да ёкъмы?» – деп РАББИни сынай эдилер.

Исраиллилер амалеклилерни енъелер

⁸ Амалеклилер келип, Рефидим деген ерде исраиллилернен дженк эттилер.

⁹ Муса Ехошуагъа бойле деди: – Озюнъе акъайларны сайлап ал да, барып амалеклилернен дженклеш. Ярын мен байыр тёпесинде турарым, къолумда Алланынъ таягъы олур.

¹⁰ Ехошуа, Муса онъа айткъаны киби япып, амалеклилернен дженклешмеге кетти. Муса, Харун ве Хур исе байырнынъ тёпесине чыкътылар.

¹¹ Муса къолларыны котергенде – исраиллилер енъе эдилер, къолларыны тюшюргенде – амалеклилер енъе эди.

¹² Лякин Мусанынъ къоллары болдурды. О вакъыт Харун ве Хур, таш алып, онынъ тюбюне къойдылар, ве Муса онынъ устюне отурды. Харуннен Хур Мусанынъ къолларыны тутып турдылар, бири – бир тарафтан, экинджиси – экинджи тарафтан. Кунь баткъандже Мусанынъ эки къолу котерилип турды.

¹³ Амалекке къаршы къылычларнен дженклешип, Ехошуа онынъ устюнден гъалип чыкъты.

¹⁴ Сонъ РАББИ Мусагъа: – Буны акъылда тутмакъ ичюн, эльязмада язып, Ехошуанынъ къулагъына мытлакъа къой ки, Мен ер юзюнде амалеклилернинъ изини биле къалдырмам, – деди.

¹⁵ Сонъ Муса РАББИге къурбан ерини къурды, онъа Яхве-Нисси деген ад къойды

¹⁶ ве: – Къолларым РАББИнинъ тахтына тараф котерильгенлери ичюн, РАББИ Амалекке къаршы несильден несильге дженк этеджек, – деди.