Чыкъыш 12 - Мукъаддес Китап

Песахнынъ тайинленмеси

¹ Мысыр топрагъында РАББИ Мусагъа ве Харунгъа:

² – Бу ай сизде айларнынъ башы олсун. Йылнынъ айларындан о, биринджи олсун, – деди.

³ – Бутюн Исраиль джемаатына айтынъыз, бу айнынъ онунджы куню эр бир адам озь къорантасына коре къой-эчкилеринден бирини алсын. Эр бир къорантагъа бирер айван олсун.

⁴ Эгер къоранта бир айванны ашап битирип оламайджакъ киби уфакъ олса, эвине энъ якъын олгъан къомшусынен берабер джан сайысына коре айван алсын. Ким не къадар ашайджагъына коре, озюнъизге айван сайып алынъыз.

⁵ Айван сизде къусурсыз, эркек ве бир яшлы олмакъ керек. Оны къозулардан я да улакълардан алынъыз.

⁶ О, сизде бу айнынъ 14-юнджи кунюнедже турсун. О заман бутюн Исраиль джемаатынынъ топлашувы оны акъшам сойсун.

⁷ Онынъ къанындан алып, айванны ашайджакъ эвлеринде къапу первазынынъ эки тарафына ве устюне якъсынлар.

⁸ Онынъ этини шу геджеси атешке къызартып, ашап битирсинлер. Оны маясыз хамырдан пишкен питенен ве аджджы отларнен ашасынлар.

⁹ Оны чий я да сувгъа пиширип ашаманъыз, амма башынен, аягъынен ве ич алетынен берабер атешке къызартып ашанъыз.

¹⁰ Ондан сабагъадже бир шей къалдырманъыз. Ондан къалгъаныны сабагъадже атеште якъынъыз.

¹¹ Оны ашагъан вакъытта беллеринъиз багълы олсун, аякъкъапларынъыз аякъларынъызда, таякъларынъыз къолларынъызда олсун. Оны ашыкъчанлыкънен ашанъыз. Бу – РАББИнинъ Песахыдыр.

¹² Мен тамам бу геджеси Мысыр топрагъындан кечерим ве адамдан башлап айванларгъа баргъандже, Мысыр топрагъында олгъан эр бир биринджи догъгъан баланы ольдюририм ве эписи Мысыр аллаларыны джезаларым. Мен – РАББИм.

¹³ Сиз олгъан эвлер устюндеки къан бельги олур. Мен къанны корерим ве сизинъ янынъыздан кечип кетерим. Мысыр топрагъыны къыргъанымда, сизни къыргъан фелякет олмаз.

¹⁴ Бу кунь сиз ичюн хатырлаткъан кунь олсун: оны РАББИге байрам оларакъ несильден несильге япынъыз. Сиз ичюн бу эбедий эмирдир.

Маясыз Пишкен Пите Байрамы

¹⁵ Еди кунь маясыз пишкен пите ашанъыз. Энъ биринджи кунюнден башлап, эвлеринъизден маяны ёкъ этинъиз. Ким биринджи куньден башлап, единджи куньгедже минген хамырдан пишкен пите ашаса, о джан Исраиль халкъындан айырылыр.

¹⁶ Биринджи куню сизде мукъаддес топлашув оладжакъ, единджи куню де мукъаддес топлашув оладжакътыр. Бу куньлери ич бир тюрлю иш япмагъа олмай. Ялынъыз ашамакъ ичюн аш пиширмеге мумкюн.

¹⁷ Маясыз Пишкен Пите Байрамыны япынъыз. Тамам бу куню Мен сизинъ ордуларынъызны Мысыр топрагъындан чыкъардым. Бу кунни эбедий урф-адет оларакъ несильден несильге япынъыз.

¹⁸ Биринджи айнынъ 14-юнджи куннинъ акъшамындан башлап, шу айнынъ 21-инджи куннинъ акъшамынадже маясыз пишкен пите ашанъыз.

¹⁹ Эвлеринъизде еди кунь мая олмамакъ керек. Ким минген хамырдан пишкен пите ашаса, о джан, кельмешекми я да исраиллими олсун, Исраиль джемаатындан айырыладжакътыр.

²⁰ Минген хамырдан бир шей ашаманъыз. Эр бир яшагъан еринъизде маясыз пишкен пите ашанъыз.

Биринджи Песах

²¹ Муса, эписи Исраиль акъсакъалларыны чагъыртып, оларгъа: – Къоранталарынъызгъа коре айванларны сайлап алынъыз ве оларны сойып, Песахны азырланъыз, – деди.

²² – Эзов отунынъ деметини алып, савутта олгъан къангъа батырып, савуттаки къаннен къапу первазынынъ устюне ве эки тарафына якъынъыз. Ич биринъиз озь эвинъизнинъ къапусындан сабагъадже чыкъманъыз.

²³ РАББИ Мысырны къырмагъа чыкъып, къапу первазынынъ устюндеки ве эки тарафындаки къанны корип, къапуларынынъ янларындан кечип кетер ве олюм кетириджи Мелекке, сизге зарар кетирмек ичюн, эвлеринъизге кирмеге бермез.

²⁴ Буны озьлеринъиз ве огъулларынъыз эбедий къанун оларакъ кутюнъиз.

²⁵ Озю айткъаны дайын, сизге РАББИ береджек топракъкъа киргенинъизде, бу адетни кутюнъиз.

²⁶ Балаларынъыз сизден: «Бу насыл адет я?» – деп сорагъанларында,

²⁷ оларгъа: «Бу – РАББИге Песах къурбаныдыр. РАББИ Мысырда мысырлыларгъа зарар кетирди, эвлеримизни исе къуртарды, исраиллилернинъ эвлери янларындан кечип кетти», – айтынъыз. Халкъ, седждеге къапанып, ибадет этти.

²⁸ Исраиль огъуллары кетип, Мусагъа ве Харунгъа РАББИ эмир эткени киби, яптылар.

Биринджи догъгъан балаларнынъ олюми

²⁹ Яры геджеде РАББИ Мысыр топрагъында олгъан эписи биринджи догъгъан балаларны, тахтында отургъан фыравуннынъ биринджи догъгъан баласындан башлап, зинданда отургъан эсирнинъ биринджи догъгъан баласынадже, ве айванларнынъ бутюн биринджи балаларыны ольдюрди.

³⁰ Геджеси фыравун, онынъ эписи къуллары ве бутюн Мысыр турды. Олю олмагъан эв ёкъ эди. Шунынъ ичюн мысырлыларда буюк къыямет къопты.

³¹ Фыравун бу геджеси Мусанен Харунны чагъыртты ве: – Турунъыз! Эм сиз, эм Исраиль огъуллары халкъымнынъ арасындан чыкъып кетинъиз. Барынъыз да, айткъанынъыз дайын, РАББИге ибадет этинъиз.

³² Айткъанынъыз дайын, озь къой-эчкилеринъизни ве туварларынъызны алынъыз. Кетинъиз ве манъа эйилик тиленъиз, – деди.

³³ Мысырлылар: «Эпимиз олермиз», – деп къоркъып, исраиллилерни къувалап, о топракътан тез-тез ёлладылар.

³⁴ Халкъ озюнинъ экшимеген хамырыны алып кетти. Урбаларына сарылгъан оларнынъ хамыр савутлары омузларында эдилер.

³⁵ Исраиллилер, Муса айткъаны киби япып, мысырлылардан кумюш шейлерни, алтын шейлерни ве урбаларны сорадылар.

³⁶ РАББИ мысырлыларнынъ козьлеринде халкъкъа мераметлик косьтерди: мысырлылар халкъкъа эр шейни бердилер, ве исраиллилер мысырлыларнынъ барлыгъыны алып кеттилер.

Исраиллилер Мысырдан чыкъып кетелер

³⁷ Сонъ Исраиль огъуллары Раамсес шеэринден Сукъкъот деген ерге ёл алдылар. Оларнынъ сайысы, къадынлар ве балалардан гъайры, 600 000-ге якъын джаяв кеткен акъайлар эди.

³⁸ Оларнен берабер чешит миллетлерден чокъ адамлар ве баягъы буюк сюрюни асыл эткен къой-эчкилернен туварлар да чыкъып кеттилер.

³⁹ Мысырдан алып чыкъкъан хамырдан, хамыр экшимегени ичюн, маясыз пите пиширдилер. Олар Мысырдан къувалангъан эдилер ве вакъыт джоймагъа имкянлары олмагъанындан, озьлерине ашны биле азырламадылар.

⁴⁰ Исраиль огъулларынынъ Мысырда яшап тургъан вакъты 430 йыл эди.

⁴¹ 430 йыл кечкен сонъ, тамам бу куннинъ геджесинен РАББИнинъ бутюн ордулары Мысыр топрагъындан чыкъып кетти.

⁴² О гедже РАББИ буюк дикъкъат иле Исраиль огъулларыны Мысырдан алып чыкъты. Бунынъ ичюн несильден несильге бутюн Исраиль огъуллары бу геджеси юкъламайып, РАББИге ибадет этсинлер.

Песах акъкъында низамнаме

⁴³ Мусанен Харунгъа РАББИ: – Мына Песахнынъ низамнамеси: ич бир ябанджы оны ашамасын.

⁴⁴ Кумюшке сатын алынгъан эр бир къул сюннет этильген сонъ, Песахны ашамакъ мумкюн.

⁴⁵ Вакътынджа яшагъан адамнен ыргъат исе оны ашамасын.

⁴⁶ Оны эв ичинде, сабагъадже къалдырмайып, ашамакъ керек. Этни эвден чыкъарманъыз, кемиклерини де парламанъыз.

⁴⁷ Исраиль огъулларынынъ бутюн джемааты Песахны тутмакъ кереклер.

⁴⁸ Эгер сенде вакътынджа яшамакъ ичюн кельмешек ерлешип, РАББИнинъ Песахыны япмагъа истесе, онынъ эвинде олгъан эписи эркеклерни сюннет эт. Сонъ о, Песахны япмакъ мумкюн, ве энди исраилли дайын олур. Ич бир сюннет этильмеген исе оны ашамасын.

⁴⁹ Эм исраиллиге, эм аранъызда яшамакъ ичюн ерлешкен кельмешекке бир къанун олсун, – деди.

⁵⁰ Эписи Исраиль огъуллары, РАББИ Мусагъа ве Харунгъа насыл эмир эткен олса, ойле де яптылар.

⁵¹ Тамам бу куню РАББИ Мысыр топрагъындан Исраиль огъулларыны ордуларынен чыкъарды.